Wuwale 2
2
Nzila yo wukoma mahema, wanhu no mulango wawo mu nghambi
1Muwaha Mulungu yakawalajiza Musa na Haluni nzila yono yiwanojeye wayityatye, lono weza kukoma mahema mu nghambi, yakatya, 2Kolo Waisilayeli weza kukoma mahema mu nghambi, yiwanojeye munhu na lwakwe, mu mulango wakwe, yakome lihema lyakwe hasi ye bendela, i hanhu hono yalajiywe. Kanyhi yalajile ne citanjilo ce wasogwe. Ne mahema ganojeye gakomwe gawe gapilime mbavu zose ze Lihema lyono Lyelile, viwe vidomile ne Lihema.
3Na ku lubavu lwe cilima, wawo wono wali hasi ye bendela ya wo mulango wa Yuda, hamonga na wono vyokwihegama nawo, yiwanojeye wakome mahema gawo wawe wegawile mu vipuga vipuga, mu nghango ye liwalo lye walongola wawo, mu zimhuga zawo nha vyono nhavi.
4Wo mulango wa Yuda, u mulongola yo Nahashoni
mwana wa Aminadabu, wanhu elufu makumi mupunghati
na yine, na magana mutandatu.
5Wo mulango wa Isakali, u mulongola yo Nataneli
mwana wa Zuwali,
6wanhu elufu makumi mahano na yine,
na magana mane.
7Wo mulango wa Zabuloni, u mulongola yo Eliyabi
mwana wa Heloni,
8wanhu elufu makumi mahano na mupunghati na
magana mane.
9Ne liwalo lyawo wose hamonga wono wawalwa
wa mu nghambi ya Yuda, wali waficile wanhu
elufu yigana limonga na makumi munana na
mutandatu, na magana mane.
Nawo wawo wo walongole kutuluka.
10Nawo wono wali hasi ye bendela ya wo mulango
wa Lubeni, hamonga na wono vyokwihegama nawo,
yiwanojeye wakome mahema
gawo ku lubavu lwe takama,
wawe wegawile mu vipuga vipuga, mu nghango ye
liwalo lye walongola wawo mu zimhuga zawo
nha vyono nhavi.
11Wo mulango wa Lubeni u mulongola yo Elizuli
mwana wa Shedewuli, wanhu elufu makumi mane
na mutandatu na magana mahano. Vihegame na:
12Wo mulango wa Simiyoni, u mulongola yo Shelumiyeli
mwana wa Zelishadayi,
13wanhu elufu makumi mahano ne 'cenda na magana madatu.
14Wo mulango wa Gadi, u mulongola yo Eliyasafu
mwana wa Lewuyeli,
15wanhu elufu makumi mane na yihano, na
magana mutandatu, na makumi mahano.
16Ne liwalo lyawo wose hamonga, waficile
wanhu elufu yigana limonga na makumi mahano
na monga, na magana mane na makumi mahano.
Nawo wawo, wo weze we kejete ku wutuluce.
17Hanyuma yayo, kolo wawo we zimhuga zi nyejete,
mhuga ya Yuda ne mhuga ya Lubeni, wakondya kutuluka,
ale, we mhuga ye Walawi nawo ho wawe kutyatya mu nyuma
yawo, akuno walidinghuye ne Lihema lyono Lyelile.
Kanyhi yinojeye mhuga zose, wajende wetyatizye,
nha vyono winha wityatye wawo wo wukoma
mahema gawo mu nghambi, wanhu na mhuga yawo
hasi ye bendela yawo.
18Nawo wono wali hasi ye bendela ya
wo mulango wa Efulayimu, yiwanojeye wakome mahema
gawo ku lubavu lwe mwezi, hamonga na wono vyokwihegama
nawo, wawe wegawile vipuga
vipuga, mu nghango ye liwalo lye walongola
wawo, mu zimhuga zawo nha vyono nhavi.
19Wo mulango wa Efulayimu, u mulongola yo
Elishama mwana wa Amihudi,
wanhu elufu makumi mane na magana mahano. Vihegame na:
20Wo mulango wa Manase, u mulongola yo Gamaliyeli
mwana wa Pedazuli,
21wanhu elufu makumi madatu na nyejete na magana mejete.
22Wo mulango wa Benyamini, u mulongola yo Abidani
mwana wa Gidiyoni,
23wanhu elufu makumi madatu na yihano, na magana mane.
24Ne liwalo lyawo wose hamonga waficile wanhu
elufu yigana limonga na munana, ne 'gana limonga.
Nawo wawano wo we kadatu mu wutuluce.
25Nawo wono wali hasi ye bendela ya wo mulango
wa Dani, na wono vyokwihegama nawo, yiwanojeye
wakome mahema gawo ku lubavu lwe sumuka,
weze wegawile vipuga vipuga, mu nghango ye
liwalo lye walongola wawo, mu milango yawo
nha vyono nhavi.
26Wo mulango wa Dani, u mulongola yo Ahiyezeli
mwana wa Amishadayi, wanhu elufu makumi mutandatu
na nyejete, na magana mupunghati. Vihegame na:
27Wo mulango wa Asheli, u mulongola yo Pagiyeli
mwana wa Ocilani
28wanhu elufu makumi mane na monga, na magana mahano.
29Wo mulango wa Nafutali, u mulongola yo Ahila mwana
wa Enani,
30wanhu elufu makumi mahano na yidatu,
na magana mane.
31Ne liwalo lyawo wose hamonga, waficile wanhu
elufu yigana limonga na makumi mahano na mupunghati,
na magana mutandatu. Nawo wa wano weze wo we
ndumilizo kutuluka.
32Ne liwalo lye wanhu Waisilayeli, wose wono wandikwa mu nghango ye zi mhuga zawo, cipuga na cipuga, wakawa waficile liwalo lyawo, wanhu elufu magana mutandatu na yidatu, na magana mahano na makumi mahano. 33Ninga Walawi si wenjila mwi'walo hamonga ne Waisilayeli.
34Nawo Waisilayeli, wakanoza zose nha vyono Muwaha Mulungu yamulajiliza Musa. Wose wakakoma mahema gawo wanhu na bendela yawo. Na lono watulukaga, wajendaga wanhu na mhuga zawo ze wasogo zawo.
Currently Selected:
Wuwale 2: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.