Wuwale 1
1
Wuwalwe wulongozi we Waisilayeli
1Mwi'zuwa lilongozi lya mu mwezi we kejete, wa mu mwaka we kejete, ku wulawa lizuwa lyono Waisilayeli wawucila ku Misili, Muwaha Mulungu yakalongana na Musa, mwi 'Hema lyakwe lyono Lyelile, lono yali yali mu nyika ya Sinayi. Muwaha Mulungu yalonga yakatya, 2“Agwe Musa hamonga na Haluni, muwawale wanhu wose wa Isilayeli mu nghango vyono wenha mu milango yawo na mu mhuga zawo. Mwandice matagwa ge we cilume wose, wono waficile myaka makumi mejete, 3no kuciza wono mowona wakwiliye kwinjila mu mulimo wo wusilikale wo kwihoma ku wulugu. 4Agwe na Haluni, muwalombaje walongola monga monga, mu wulawa mu milango yose ye Waisilayeli, nawo wawo wo womutazenyi mu mulimo wuwo.” 5Na agano go matagwa ge walongola wa mu milango yawo; wono mokwitaziliza nawo mu mulimo wuwo.
Wo mulango wa Lubeni, umulongola yo Elizuli
mwana wa Shedewuli.
6Wo mulango wa Simiyoni, u mulongola yo
Shelumiyeli mwana wa Zulishadayi.
7Wo mulango wa Yuda, u mulongola yo Nashoni
mwana wa Abinadabu.
8Wo mulango wa Isakali, u mulongola yo Nataneli
mwana wa Zuwali.
9Wo mulango wa Zabuloni, u mulongola yo
Eliyabi, mwana wa Heloni.
10Wo mulango wa Efulayimu, u mulongola yo
Elishama mwana wa Amihudi.
11Wo mulango wa Benyamini, u mulongola yo
Abidani mwana wa Gidiyoni.
12Wo mulango wa Dani, u mulongola yo
Ahiyezeli, mwana wa Amishadayi.
13Wo mulango wa Asheli, u mulongola yo
Pagiyeli mwana wa Ocilani.
14Wo mulango wa Gadi, u mulongola yo
Eliyasafu, mwana wa Dewuyeli.
15Wo mulango wa Nafutali, u mulongola yo
Ahila mwana wa Enani.
16Awa wo wacemwa mu wulawa mu zimhuga zose, ze milango yose ye wasogo zawo, ho wawe walongola wa mu milimo yawo.
17Ne wanhu wawa we cilume we likumi na wejete, wakawataza muno Musa na Haluni. 18Wakawakongholela hamonga mhuga yose ya Waisilayeli, mwi'zuwa lilongozi lyo mwezi we kejete. Wakawa kuwandika Waisilayeli wose, mu nghango vyono wenha mu milango yawo, na mu mhuga zawo. Wakawandika we cilume wose wono waficile myaka makumi mejete, hamonga na wose wono wena myaka yono yicizize yiyo, wakandikwa no kuwalwa liwalo lyawo, 19nha vyono Muwaha Mulungu yali yalajilize. Musa yakawawala wanhu no kuwandika, lono yali yali mwi 'nyika lya Sinayi.
20Nawo i wanhu we cilume wose wono wali we lizika lya myaka makumi mejete hamba kuciza, wono wawonwa wakwiliye kwinjila mu mulimo wo wusilikale wo kwihoma ku wulugu, wose matagwa gawo gakandikwa, mu nghango vyono wenha mu milango yawo na mu mhuga zawo, wakamulilwa we mhuga ya Lubeni u mwana wa Yakobo, u mulongozi kulelwa. Ne liwalo lyawo lyoli: 21Wo mulango wa Lubeni, wali waficile elufu makumi mane na mutandatu, na magana mahano.
22Wo mulango wa Simiyoni, wali waficile 23elufu makumi mahano ne cenda, na magana madatu.
24Wo mulango wa Gadi, wali waficile, 25elufu makumi mane ne 'hano, na magana mutandatu na makumi mahano.
26Wo mulango wa Yuda, wali waficile, 27elufu makumi mupunghati na yine, na magana mutandatu.
28Wo mulango wa Isakali, wali waficile 29elufu makumi mahano na yine, na magana mane.
30Wo mulango wa Zabuloni, wali waficile, 31elufu makumi mahano na mupunghati, na magana mane.
32Wo mulango wa Yusufu, wo wana wa Efulayimu, wali waficile, 33elufu makumi mane na magana mahano.
34Wo mulango wa Manase, wali waficile 35elufu makumi madatu na nyejete na magana mejete.
36Wo mulango wa Benyamini, wali waficile, 37elufu makumi mutandatu ne 'hano, na magana mane.
38Wo mulango wa Dani, wali waficile, 39elufu makumi madatu na nyejete, na magana mupunghati.
40Wo mulango wa Asheli, wali waficile, 41elufu makumi mane na monga na magana mahano.
42Wo mulango wa Nafutali, wali waficile, 43elufu makumi mahano na yidatu, na magana mane.
44Ne liwalo lyawo wose hamonga wali waficile 45wanhu elufu magana mutandatu na yidatu, 46na magana mahano, na makumi mahano.
47Na mwi'walo lilino, Walawi si wawalilizwa yaye wahanzwe na we milango yinji. 48Hambi Muwaha Mulungu nha yamulonjela Musa vyono, 49lono weza kuwawala wanhu wono wokwila kwinjila mu mulimo wo wusilikale, wulece kuwenjiza wo mulango wa Lawi mu mulimo wuwo. 50Langa wene Walawi, wawikaje wawe walanjilizi du we Lihema lyangu lyono Lyelile, hamonga ne vitumamilwa vyayo vyose vyono vili mumo. Wawe kwitumama mumo mugati, kanyhi wakome mahema gawo walipilime Lihema lyono Lyelile. 51Na mu cipango co cose lono mweza kuyihamya nghambi yenyu, wawo Walawi wowa wo mulimo wawo kulimwagula Lihema. Kanyhi wo weneco du wono wowa kulikoma Lihema lyono Lyelile kolo mwafika hanhu hono moyisimya nghambi yenyu. Kanyhi mulanjilile, hono munhu wo wose yejelele yasejelele behi ne Lihema lyono Lyelile, munhu yuyo yawulagwe. 52Ne Waisilayeli nawo, mulimo wawo wowa kukoma mahema gawo vibuto vibuto, munhu na mhuga yakwe, munhu na bendela yakwe. 53Ninga Walawi wanojeye wakome mahema gawo gapilime Lihema ho wasume kulidima, munhu wo wose ho yalece kulisejelela Lihema no kunghoza likuwo, nane niwatowe mhuga ya Isilayeli. 54Nawo wanhu Waisilayeli wakanoza nha vyono Muwaha Mulungu yamulajiliza Musa.
Currently Selected:
Wuwale 1: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
