Wuwale 17
17
Nghome ya Haluni
1Muwaha Mulungu yakamulonjela Musa yakatya, 2“Walonjele wanhu Waisilayeli, wakupele nghome yikumi na nyejete, zeze nghome monga monga ku wulawa mu walongola we milango yose vyono yikumi na myejete. Nagwe wandice munhu ne litagwa lyakwe mu nghome yakwe. 3Ninga mu nghome yono yowa so Walawi, wandice litagwa lya Haluni. Nazo zowa nghome monga monga nha vyono linha liwalo lye walongola we milango yawo. 4Wuzisole wuzilete mwi 'Hema lyangu lyono Lyelile, wuziwice ha mwande ye Lisanduku lye Cilagane, hono nghwitang'anilila nagwe. 5Ne nghome yo munhu mono nimuhaguye nene, yotula. Na mu nzila yiyi, mo nowudumizya wung'ung'ulice wono si wukuduma, wono wakukung'ung'ulicila wawa Waisilayeli.”
6Nayo Musa yakawalonjela Waisilayeli. Nawo walongola wawo, wose wakamuletela Musa nghome monga monga, munhu na mulango wakwe, wakaleta nghome yikumi na nyejete zose hamonga. Ne nghome ya Haluni nayo, wakayihanziliza hamonga na zizo. 7Nayo Musa yakawa kuziwika mwi 'Hema, ha mwande ye Lisanduku lye Cilagane.
8Ne mitondo yaco. Lono Musa yali yali mwi Hema, yakawona vyono nghome ya Haluni, yono yali so mhuga ye Walawi, yakondya kutula, yibonhoye, kanyhi yilelile malozi! 9Nayo Musa yakawa kuzisola nghome zose vyono zinha, yakawa kuwalajila Waisilayeli. Nawo Waisilayeli wakaziwona zono ziweye. Nawo walongola wakawa kuzisola zinghome munhu na nghome yakwe. 10Muwaha Mulungu yakamulonjela Musa yakatya, “Ale, wuyigomolezaje nghome ya Haluni ha mwande ye Lisanduku lye Cilagane. Nayo wuyilece yiwe kwikala baho du, yiwe yo suguzi kuli Waisilayeli wono wali cibede, hambi nha wofwa du, hono wawe wakali wajendeleye ne mang'ung'uliko gawo.” 11Nayo Musa yakanoza du, nha vyono Muwaha Mulungu yamulajiliza.
12Nawo wanhu Waisilayeli, wakamulonjela Musa wakatya, “Alu, awu nhondo, weza wo mudumo wetu! 13Hambi hono yeza vyono, munhu wo wose mono kosejelela behi ne Lihema kofwa, alu kumbe ase wose cofwa du!”
Currently Selected:
Wuwale 17: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
