Wuwale 16
16
Wufyule wa Kola, na Datani, na Abilamu
1Nayo Kola u mwana wa Izihali, mulawa mu Walawi we ndelwa ye Wakohati, yakawubedegala wulongola wa Musa. Mwene, yakelunza ne wayagwe wanji wadatu, wo mulango wa Lubeni, nha cinji, Datani na Abilamu i wana wa Eliyabi, hamonga na Oni u mwana wa Peleti. 2Hamonga na wanji we wanhu Waisilayeli, waficile wanhu magana mejete na makumi mahano, wanhu watambule, walongola, wahagulwa ne mhuga ye Waisilayeli. 3Wakekongholela hali Musa na Haluni, wakawa kutya, “Alu nanye nhondo mwacila muno! I wanhu wose, nha wanhu wo Muwaha Mulungu, nayo Muwaha Mulungu nha yali hamonga na sese wose. Alu 'gwe Musa, nhawule wukwilongoleza hali mhuga yiyi yose yo Muwaha Mulungu?”
4Nayo Musa yali yeza kuzihulika zizi, hobaho yakagwa gubama, yakawa kumulomba Mulungu. 5Hanyuma, yakawa kumulonjela Kola, hamonga ne watyati wakwe, yakawatya, “Ale, i mitondo hakali mitondo, u Muwaha Mulungu kocilajila, nani mono munhu wakwe, kanyhi wa hayi mono wakwe, nha cinji mono yamuhagula, komusejeleza ha cikumbicilo. 6Holeka i mitondo hakali mitondo, gwegwe Kola, hamonga ne watyati wako wose, musole vifusizo muvitajile moto, muwutajile no wuvumba muli vyene, hanyuma muvilete ku cikumbicilo. 7Ale baho ho cowonela, nani wa muli sese mono Muwaha Mulungu komuhagula, yuyo yo yelile. Ane nghuwona vyono yiyo langa yo yomukwilenyi nyo Walawi!”
8Musa yakajendelela kulongana na Kola yakutya, “Ale ta, muhulicize anye nyo Walawi. 9Alu mwene, anye mukwihwesa nha vyono nghani yiyi ndodo hongo, vyono u Mulungu we Waisilayeli yamusiwanulenyi nyenye mu wulawa mu mhuga ye wanhu, ho mumusejelele no kunoza wuhembi wenyu mwi 'Hema lyo Muwaha Mulungu, no kuwetumamila mhuga yose ye Waisilayeli lo? 10Mulungu yo yamunozenyi nyenye, hamonga ne Walawi wanji, ho muwe ne lilumbo lilino. Ninga luno, anye mukuhila muwutuje no mulimo wuwu wo wukohani hongo! 11Holeka lono mukumung'ung'ulicila Haluni, mukumung'ung'ulicila Muwaha Mulungu, na mu nzila yiyo, nyenye, hamonga ne watyati wenyu wose, mweza muli wabedegazi.”
12Hanyuma Musa yakatuma wanji wawaceme Datani na Abilamu i wana wa Eliyabi, waze kuli mwene. Ninga wene wakalema kuza, wakatya, “Ase si cokuza! 13Agwe wukwihwesa nghani yiyi ndodo yo kuciwusa mu yisi yono yina moso, yisi ya Misili, no kucileta ahano hono nyika, ho wuciwulaje? Alu hongo wukusaka kwitemezya muli sese? 14Na mbeka, wukali nacifisa mu yisi yono yina moso, hamba wukali nacipela migunda, hamba migunda ya zabibu, nha vyono cali cina navyo ku Misili. Naluno agwe, wukujela kucikonga du bwete. Holeka nase calema, hamba si cokuza yaye!”
15Hobaho nayo Musa yakawa kukolwa ne likuwo, yakawa kumulonjela Muwaha Mulungu yakutya, “Gwe go Muwaha Mulungu, wulecele lukulu kubocela cilavywa ce liwala lyolyose lyono wanhu wawano wokuletela. Ane nghali si namusutizya yunji wowose wa muli wene. Nane nghali si nasola hamba ndogowe yawo monga.”
16Hobaho Musa yakawa kumutya Kola, “Imitondo, gwegwe, hamonga ne watyati wako wose, magana mejete na makumi mahano, nhondo muze he Hema lyono Lyelile lyo Muwaha Mulungu, na Haluni nayo kowa yali baho. 17Na muli nyenye wose, yumonga yumonga, nhondo yasoleleze ne cifusizo cakwe, yatajile no wuvumba mucanyha yaco, hanyuma yacilete ha cikumbicilo.” 18Hodu, wose wakasola cifusizo munhu na cakwe, wakacitajila ne makala hamonga no wuvumba mucanyha yayo. Wakawa kwima ha mulango we Lihema, hamonga na Musa na Haluni. 19Nayo Kola, yakawa kuwakonghola hamonga, mhuga yose ye Waisilayeli, nawo wakatandala wawalanjile Musa na Haluni, ha mulango we lihema. No lukumyo lo Muwaha Mulungu lukejela nhinicizo kuli mhuga yose. 20No Muwaha Mulungu yakalongana na Musa na Haluni yakawatya, 21“Ale, mutele, mwime cidaha ne wanhu wawa, nane nowongomeza lwa kamonga.”
22Ninga Musa na Haluni wakenama sunga no wusu wawo wukapamiza ho hasi, wakatya, “Gwe go Muwaha Mulungu, nha yo gwegwe du mono yo ndawililo yo wumi wose. Alu hono munhu monga yasutye, agwe hodu kowakolelwa likuwo mhuga yose?”
23Nayo Muwaha Mulungu yakawa kumutya Musa, 24“Wuwalonjele wanhu hodu wahame, wawuse mahema gawo behi ne mahema ga Kola, na Datani, na Abilamu.”
25Hodu Musa yakawa kutuluka hamonga ne walongola we Waisilayeli, wakawa kubita kuli Datani na Abilamu. 26Musa yakawa kuwalonjela wanhu yakatya, “Ale muhame, muwuse mahema genyu behi ne mahema ge wanhu wawa wabi. Kanyhi mulecele lukulu kupamiza cinhu cawo cinji co cose. Vyono hono mupamize, hodu mokongomezezwa lukulu hamonga nawo mu wubi wawo.” 27Hodu wanhu wakawa kuwuka behi ne mahema ga Kola, na Datani, na Abilamu.
Nawo Datani hamonga na Abilamu, wakalawila kunze ye mahema gawo, wakawa wemile ha milango ye mahema gawo, hamonga ne wagolece zawo ne wana wawo. 28Nayo Musa yakawa kuwalonjela wanhu yakatya, “Na mu nzila yiyi, mo momanyila vyono, Muwaha Mulungu yo yanhuma 'ne ho nizitume zizino zose, holeka ane si nghwitumila zizi mu vilungo vyangu no mweneco yaye. 29Holeka i wanhu wawa hono wafwe lifwa lyono wanhu wose wafwizaga, walece kufwila mwi'fwa lyono Muwaha Mulungu kowalipiciziza, Muwaha mulungu yeze si yanhuma. 30Ninga hono Muwaha Mulungu yanoze nghani yono yikali hamba sinejela, yisi yahame, yiwamele wene, hamonga ne vinhu vyawo vyose vyono wena navyo, nawo wenjile hasi, kusi, vyo womi du, wafice ku yisi ye wafu, baho langa ho momanyila vyono i wanhu wawa, wamulema Muwaha Mulungu.”
31Nayo Musa, yali yeza malila wulonje wakwe wuwo, hodu ho baho baho, i hanhu hono wali wemile wa Datani na Abilamu, yisi yikawa kwahama. 32Yikawa kuwamela Datani na Abilamu, ne zimhuga zawo wose, hamonga na Kola ne mhuga yakwe wose ne watyati wa Kola wose hamonga ne vinhu vyawo vyose. 33Hodu wakawa wabita ku yisi ye wafu, akuno vyo womi du, hamonga ne vinhu vyawo vyose. Nayo yisi hodu yikawa kudinda, nawo hodu wukawa wo mudumo wawo. 34Ne wanhu wose Waisilayeli wono wazilanjililaga zizo, wali weza kucihulika cililo cawo, vyono wawowaga wa Kola hamonga ne wayagwe, hobaho wene wakawa kwitula, wakawa kutiza, akuno wazozize wakutya, “Nye, alenyi citize! Yisi yidahile kucimela sunga na sese!”
35Hanyuma Muwaha Mulungu yakaleta moto, wukawakongoga wawalya wanhu magana mejete na makumi mahano wono walavyaga wuvumba.
36Hanyuma ya zizo, Muwaha Mulungu yakamulonjela Musa yakatya, 37“Wumulonjele Eleyezali u mwana wa Haluni mukohani, yawuse vifusizo vye shaba mu wulawa mu mivimba ye wanhu wono moto wuwakongoje, hanyuma yasole mavu gono gali mumo mu vifusizo, yagamwaje hanhu ho hose du, hambi vifusizo vivyo nha vyelile. 38Hambi nha vyezwa du, lono vyali vyeza kuletwa ha cikumbicilo co Muwaha Mulungu. Holeka lu, wuvisole vifusizo vivyo vye wanhu wawo wono wawulagwe so wubi wawo, wuvityane viwe nha vibati, ho vitumamilwe so wugubika cikumbicilo. Ne nghani yiyi yowa suguzi kuli Waisilayeli.” 39Nayo Eleyezali u mukohani, yakawa kuvisola vifusizo, yakawa kuvityana viwe nha vibati, ho vitumamilwe so wugubika cikumbicilo. 40Ne nghani yiyi, yikawa suguzi kuli Waisilayeli, wakamanya vyono, kumbe si yinojeye munhu wowose mono si we ndelwa ye Walawi, yasejelele ha cikumbicilo, yafuse wuvumba kuli Muwaha Mulungu. Na vyono hono yunji yejelele yanoze nhavivyo, u munhu yuyo kokongomezwa nha vyono yongomezwa Kola, hamonga ne wanhu wakwe. Na zose ziketumwa nha vyono Muwaha Mulungu yamulajiliziza Eleyezali muli Musa.
Haluni yakuwaponya wanhu
41Na mwizuwa lye kejete, mhuga yose ye Waisilayeli wakanza kumung'ung'ulicila Musa na Haluni wakutya, “Alu anye, ta mulanje, mwakondya kuwawulaga wanhu wanji wo Mulungu.” 42Nawo lono wali wekongholela hamonga, lono wamulemaga Musa na Haluni, wali weza kwi'lenga kunyuma, kono kolili Lihema, wakaliwona livunde ligubice mwi 'Hema, hamonga no lukumyo lo Muwaha Mulungu lukwijela. 43Musa na Haluni wakawa kubita, wakema ha mwande ye Lihema lyono Lyelile, 44nayo Muwaha Mulungu yakamulonjela Musa yakatya, 45“Ale mutele, mwime cidaha ne wanhu wawa, nane niwongomeze lwa kamonga!”
Nawo wose vyono wejete wakenama sunga no wusu wawo wukapamiza ho hasi, 46Musa yakamutya Haluni, “Ale wusole cifusizo cako, wucitajile ne makala gono gakulawa mu cikumbicilo, hanyuma, wutajile wuvumba mucanyha yayo. Wuwabitile wanhu musunho, wukawanozeze wilamule. Ale Wiyohaje! Hambi likuwo lyo Muwaha Mulungu nha lyakolela muno, ne lihuhuji lyakondya kuza.”
47Nayo Haluni yakawa na cihuliko, yakasola cifusizo cakwe lwa kamonga, yakawa kumanyhila ha ciligati ye wanhu lono wali wehangulize hamonga. Nayo yali yeza kuwona vyono wutamwa we lihuhuji wakondya kwanza muli wanhu, hobaho yakawa kuwutajila wuvumba mu moto, yakawa kuwanozeza wanhu wilamule. 48Ne litumo lilyo likemila lihuhuji lilece kujendelela. Haluni yakekala vyo yemile du ha ciligati ya wono wali wakondya kufwa, na wono wali wakali womi. 49Ne liwalo lye wanhu wono wali wakondya kufwa, lyali lificile wanhu elufu yikumi na yine, na magana mupunghati. Awalya wono wafwa so cibede ca Kola, awo si wawalilizwe mwi'walo lilino. 50Na lono lihuhuji lyali lyapuluta, Haluni nayo yakawa kuwuya kuli Musa, ha mulango we Lihema.
Currently Selected:
Wuwale 16: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
