Yoshuwa 4
4
I mabwe ge cikumbucizo, gakuwikwa
1Hobaho nghungugo yose ye Waisilayeli yali yeza kuwa yakondya kulowoka Yoludani, Muwaha Mulungu yakamulonjela Yoshuwa yakamutya. 2“Alu wuhagule wanhu we cilume yikumi na wejete, yumonga yumonga ku wulawa mu milango yose yikumi na myejete ye Waisilayeli, 3wuwalajilize wadinghule mabwe yikumi na mejete, galawe haciligati ye likolongo lya Yoludani, hono i wakohani wali wemile. Walonjelaje wagadinghulaje, ho mubite nago sunga i hanhu hono mosimya nghambi yenyu mu cilo ce zuwali.”
4Hobaho Yoshuwa yakawa kuwacema wanhu we cilume yikumi na wejete wono yawahagula, 5yakawatya, “Alu mwinjile mu Yoludani sunga haciligati, ha mwande ye Lisanduku lye Cilagane lyo Muwaha Mulungu, u Mulungu wenyu, mudinghule yibwe limonga limonga mu mawega genyu, nha vyono linha liwalo lye milango yenyu yikumi na myejete ye Waisilayeli. 6Mabwe gaga cowa cikumbucizo kuli wanhu, muli zono Muwaha Mulungu yazitumile. Na mu vilo vyono vikuza, i wana wenyu hono wawe kumuwuzenyi, vyono i mabwe gaga gena nhunizoci kuli'nye, 7nanye ho molowalonjela vyono i malenga ga Yoludani, gakema gakaleka kuhuluma, mwi'zuwa lyono Lisanduku lye Cilagane lyo Muwaha Mulungu, lyalowocela mwi'kolongo. Kanyhi i mabwe gaga, gowa kuwakumbuciza wanhu Waisilayeli Cibitilila, zono zawejelela baho.”
8Wanhu wawo we cilume, wakazityatya zinghani zono Yoshuwa yalajiliza. Nha vyono Muwaha Mulungu yali yamulonjela Yoshuwa yazitume, wakasola mabwe yikumi na mejete, ku wulawa haciligati, ye likolongo lya Yoludani, yibwe limonga limonga nha vyono lyali linha liwalo lye milango ye wanhu wa Isilayeli. Wakagategula i hanhu hono wali wahahagula, ho wakayisimye nghambi yawo, wakawa kugawika baho. 9Yoshuwa nayo yakawika mabwe yikumi na mejete haciligati ya Yoludani bahalya hono i wakohani wali wemile akuno walidinghuye ne lisanduku lye cilagane. (Ne mabwe gago, gakali gali baho sunga nalu.) 10Nawo wakohani, wakajendelela kwima haciligati ye likolongo lya Yoludani du, sunga milimo yose yikakondya yono Muwaha Mulungu yali yamulajiliza Yoshuwa yawalonjele wanhu wayitume. Na zizi zo Musa yali yalajilize kuli Yoshuwa.
Baho wanhu wose wakeyoha mbela mbela wakalilowoka likolongo.
11Kukawa lono wose wali wakondya kulowoka ku nhumbi nzagwe, wakohani nawo wono wali walidinghuye Lisanduku lye Cilagane lyo Muwaha Mulungu, wakalongola kumwande ye wanhu. 12Ne wanhu we milango ya Lubeni na Gadi, na we nusu ya wo mulango wa Manase, wo walongola kulowoka, akuno wewikanize ne vitwalo vyo wulugu. Wakalowoka ku mwande ye Waisilayeli, nha vyono Musa yali yawalonjela wetume. 13Nawo wakawa waficile wanhu elufu makumi mane, liwalo lyawo, wono walowoka ha mwande yo Muwaha Mulungu, akuno wewikanize so wulugu, wakenjila mu yisi yo wuhihi ya Yeliko. 14Cinhu cono Muwaha Mulungu yetuma mwi'zuwa lililya, cawalajila wanhu Waisilayeli, wamanye vyono, kumbe Yoshuwa mbeka yali munhu we lilumbo. Holeka nawo ku wulawilila baho, hodu wakajendelela kumupela cogopo mu vilo vyose vyo wikale wakwe, nha vyono wamupelaga cogopo Musa.
15Hanyuma, u Muwaha Mulungu, yakamulonjela Yoshuwa yakamutya, 16“Ale lu, wuwalonjelaje i wakohani wono walidinghuye Lisanduku lye Cilagane lyo Muwaha Mulungu, walowoce nawo lu ku nhumbi, wawuce mwi'kolongo lya Yoludani. 17Yoshuwa yaketuma nhavivyo. 18Na lono i wakohani wali waza kufika ku nhumbi ye likolongo, hobaho ne malenga ge likolongo lya Yoludani, gakawa kuwuya hanhu hago, gakamema sunga likalapuka mu zinyenje zayo, nha vyono lyali ha mwamulizo.”
19Wanhu wakalilowoka likolongo lya Yoludani mwi'zuwa lye likumi, lya mu mwezi mulongozi. Wakasimya nghambi yawo ha Giligali, ha mhelo yo lubavu lwe cilima ya Yeliko. 20Baho ha Giligali, Yoshuwa yakagasimya mabwe ga galya yikumi na mejete gono gasolwa haciligati ye likolongo lya Yoludani. 21Yakawalonjela i Waisilayeli yakawatya, “Mu vilo vyono vikuza, lono i wana wenyu wawe kumuwuzenyi ze mabwe gaga vyono gena nhunizoci, 22mowalonjela vyono, gakukumbuciza lizuwa lyono wanhu wa Isilayeli walowocela mwi kolongo lya Yoludani hakavu. 23Muwalonjele vyono, u Muwaha Mulungu, u Mulungu wenyu, yalinyaza lilenga lya Yoludani so nyenye, sunga lono mwali mwakondya kulowoka, nha vyono bahalya lono yalinyaza lilenga lya Shamu so sese. 24Ku soko yiyo holeka wanhu wose wa kono'nze yiyi, wovimanya vilungo vyo Muwaha Mulungu, u Mulungu wenyu, vyono vinha. Nanye ho mojendelela kumupela cogopo u Muwaha Mulungu u Mulungu wenyu cibitilila.”
Currently Selected:
Yoshuwa 4: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
