Yoshuwa 3
3
Waisilayeli, wakulowoka likolongo lya Yoludani
1Ale, Yoshuwa ne Waisilayeli wose, i mitondo yaco hakali mitondo muno, wakelawa kuyikula nghambi ha Akasiya, wakawa kubita sunga he 'kolongo lya Yoludani, wakayisimya nghambi baho, walindiye ku wulowoka likolongo. 2Vikapuluta vilo vidatu wali baho, hanyuma i walongola we wanhu, wakawa kuwapilimila wanhu wose mu nghambi, 3no kuwalonjela wanhu wakutya, “Kolo mukuwawona i wakohani walidinghula Lisanduku lye Cilagane lyo Muwaha Mulungu, u Mulungu wenyu, ale nanye muyikulaje nghambi mwanze kuwatyatya. 4Hambi i hanhu baha, nha mukali sinaza wulawa wulelwe wenyu, holeka wene wakohani wo womutonjenyi nzila. Ninga langa, mulece kulisejelela Lisanduku lye Cilagane. Hagati yenyu ne Lisanduku, mweze mulecile cilejeho ca kilometa monga.”
5Yoshuwa yakawalonjela wanhu yakawatya, “Ale mwiyezaje, hambi i mitondo, Muwaha Mulungu nha kolajila mapoto mawaha muli nyenye.” 6Hanyuma yakawalonjela i wakohani walidinghule Lisanduku lye Cilagane, ho walongolele ku mwande ye wanhu. Nawo waketuma nha vyono yawalonjela.
7U Muwaha Mulungu yakamulonjela Yoshuwa yakamutya, “Zono nokwituma zuwali, zo zowalajila i wanhu wose wa Isilayeli, ho wanze kukumanya nha vyono, agwe Yoshuwa wuli munhu we lilumbo, nawo wakupele cogopo. Kanyhi ho womanya vyono mbeka nili hamonga nagwe nha vyono nali nili hamonga na Musa. 8Wuwalonjelaje ne wakohani wono walidinghuye Lisanduku lye Cilagane, vyono, kolo weza kufika he kolongo, nhondo weme mu malenga behi ne nyenje ye likolongo.”
9Hobaho Yoshuwa yakawalonjela wanhu yakawatya, “Ale muze muhulicize zono Muwaha Mulungu, u Mulungu wenyu yakulonga. 10Munghango yono mocila kwinjila, u Muwaha Mulungu nayo vyo kocila kuwawinga Wakanani, Wahiti, ne Wahivi, ne Wapelizi, hamonga ne Wayebusi, ne Wagiligashi, ne Waamoli. Ho momanya vyono u Mulungu mumi yali hamonga nanye. 11Na kolo Lisanduku lye Cilagane lyo Muwaha Mulungu we yinze yose, lyeza kulowoka likolongo lya Yoludani ha mwande yenyu, 12ale, wuhagule wanhu yikumi na wejete we cilume, yumonga yumonga wulawa mu milango yose ye Waisilayeli. 13Na kolo wakohani wono walidinghuye Lisanduku lye Cilagane lyo Muwaha Mulungu we yinze yose, wakukanyaga migulu yawo mu malenga du, likolongo lyoleka kuhuluma, ne malenga gono gakuza gakulawa ku ndawililo ye likolongo, gokwidumula geme nhe 'jinji hanhu hamonga.”
14Zizi zejela mu vipango vye nhwanga, ne likolongo lya Yoludani lyali limemile muno, ne malenga galapuce na mu zinyenje zayo.
Wanhu waza kuyileka nghambi no kwanza kulowoka likolongo lya Yoludani, i wakohani wali wawalongoleye, akuno walidinghuye ne Lisanduku lye Cilagane lyo Muwaha Mulungu. 15Nawo wakohani wali weza kwinjila mwikolongo no kwima mu malenga, 16hodu malenga gakaleka kuhuluma, gakawa kwima nhe'jinji kutali ku ndawililo ye likolongo, ha Adamu, likaya liwaha lye behi na Zaletani. Ne malenga ga kono sika, gono genjilaga mwilenga lyo mwino, gakahuluma gose, ne likolongo likanyala, ne wanhu wakalowoka hakavu, wakalowocela behi na Yeliko. 17Lono wanhu walowokaga likolongo wakujenda hakavu, i wakohani nawo wali wemile muciligati ye likolongo lya Yoludani mu muhangha mukavu, akuno walidinghuye ne Lisanduku lye Cilagane, sunga lono i wanhu wose wali wakondya kulowoka.
Currently Selected:
Yoshuwa 3: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
