Walamuzi 10
10
Tola
1Lono Abimeleki yali yakondya kufwa, Tola u mwana wa Puwa kanyhi mwizukulu wa Dodo, yakenuka yawaponye Isilayeli. Mwene yali yo wo mulango wa Isakali yekalaga ku Shamili mu yisi ye matunda ya Efulayimu. 2Yali mulongola we Waisilayeli myaka makumi mejete na midatu. Tola yakafwa, yakazikwa kuko ku Shamili.
Yayili
3Lono Tola yali yafwiza, yakenuka Yayili munya Gileyadi. Nayo yakawa mulamuzi we Waisilayeli myaka makumi mejete na myejete. 4Yakawa yena wana we cilume makumi madatu wono wapandaga zindogowe makumi madatu. Wali wena makaya makumi madatu mu yisi ya Gileyadi, gono sunga na lulu gakali kucemwa matumbi ga Yayili. 5Yayili yakafwa yakazikwa ku Kamoni.
Yefuta
6Waisilayeli waketuma wubi kanyhi hali Muwaha Mulungu, so wuhemba milungu ya Baali na Ashitaloti hamonga ne milungu ya ku Siliya ya Zidoni. Ne milungu ya Wamowabi ne milungu ye Waamoni, na ye Wafilisiti. Wakamuleka Muwaha Mulungu, wakapela no kumuhemba. 7Na ku soko yiyo, Muwaha Mulungu yakawakolelwa yikuwo yiwaha muno muno Waisilayeli, yakawa kuwaleka. Yakawa kuwakombola Wafilisiti ne Waamoni, wawasume no kuwatema. 8Nawo Waisilayeli wose wono wekalaga mu yisi ye Waamoli ku lubavu lwa kucilima ye likolongo lya Yoludani, mu Gileyadi, wakewonelwa muno no kugazwa, myaka yikumi na munana. 9Waamoni wakalowoka likolongo lya Yoludani, wakawahoma wo mulango wa Yuda, na wa Benyamini, na wa Efulayimu. Nawo Waisilayeli wakagazika muno muno.
10Nhondo Waisilayeli wakamulilila Muwaha Mulungu, wakutya, “Gwe go Muwaha Mulungu, ase cetuma wubi hali'gwe, kanyhi cakuleka gwegwe go Mulungu wetu, no kuyihemba milungu ya Baali.”
11Nayo Muwaha Mulungu yakawapela lipitulo, yakawatya, “Ninga mumanye vyono lono Wamisili, ne Waamoli, ne wana wa Amoni, ne Wafilisiti, 12ne Wazidoni, ne Waamaleki, ne Wamayoni, wamugazenyi 'nye halulongozi, nanye mukandilila, wule, sinamuponyenyi yaye mu miwoko yawo? 13Ninga hamba nhavivyo, anye vyo mukali mukundeka du no kuhemba milungu yinji. Holeka nane luno hamba sinomuponyenyi kanyhi. 14Langa mubite muyililile milungu yono mwayihagula, yiyo yo yomuponyenyi lone muli mu magazo.”
15Ninga Waisilayeli wakamulonjela Muwaha Mulungu wakamutya, “Gwe go Muwaha Mulungu, ase cituma wubi hali'gwe, holeka wucitendelaje nha vyono wukusaka gwegwe. Langa cikukunena du, wuciponyaje zuwalili.” 16Hobaho wakayileka milungu yawo mijenzi, wakamuhemba Muwaha Mulungu. Nayo Muwaha Mulungu, yakawawonela lusungu, yakagazika muno mu mutima wakwe so wugazwe we Waisilayeli.
17Lulo wasilikale we Waamoni, wakawa kwiwikaniza so wihomi. Wakasimya nghambi yawo ha Gileyadi. Nawo Waisilayeli, wakasimya nghambi yawo ha Mizipa mu Gileyadi. 18Baho, i wanhu, hamonga ne walongola we milango yose ye Waisilayeli, wakanza kwiwuza weneco munhu na muyagwe wakutya, “Nani lo mono kolongola kwihoma ne Waamoni mu wulugu wuwu? Wo wose mono kolongola, yuyo yo kowa mulongola mu Gileyadi.”
Currently Selected:
Walamuzi 10: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
