Mwamulizo 47

1Ale, Yusufu yakawa kumubitila Falawo, yakawa kumulonjela yakatya, “Baba, hamonga ne wawaha zangu, hamonga ne zingholo ne zing'ombe, sunga ne zisawo zawo zose, wakondya kuza ku wulawa ku yisi ya Kanani. Alu wali ku yisi ya Gosheni.” 2Yusufu nayo baho, yali yawasola ne wawahaze wahano, yali hamonga nawo, yakawamanyiza kuli Falawo. 3Nayo Falawo yakawawuza yakutya, “Alu mulimoci wono mwitumaga?” Nawo wakamupitula wakatya, “Gwe go mulumbwe, ase co wetumami wako, cili wadima mitugo nha vyono wali iwa kuku zetu.” 4Hanyuma kanyhi wakamulonjela Falawo wakatya, “Ase co wetumami wako ciza cikale nha wajenzi du mu muno mu yisi yi yino, hambi lizala nha yiwaha muno muno kuko ku Kanani, sunga ne zimitugo zetu nha zisina na ha wudimo. Holeka go mulumbwe, ase co wetumami wako, cikukunena wucikombole cikale mu yisi ya Gosheni.” 5Nayo Falawo yakawa kumulonjela Yusufu yakatya, “Sogo hamonga ne wawahazo wakuziza gwegwe. 6Ne yisi yiyi ya Misili yo yako, holeka wuwalekaje sogo hamonga ne wawahazo, wekale mu yisi ya Gosheni, hambi nha ho hanhu haswanu mono yisi yiyi. Na hono wawe mowali wanhu we mahala muli wene, ale, wawikaje wawe walanjilizi we mitugo yangu.”

7Hanyuma ya zizo, Yusufu yakawa kumuleta sogwe kuli Falawo, yamulamuse, nayo Yakobo yakamulugutiza Falawo. 8Nayo Falawo yakamuwuza Yakobo yakatya, “Alu mwene Yakobo, lulu waficila myaka milinga?” 9Yakobo nayo yakamupitula Falawo yakatya, “Wayiko, lizika lyono Mulungu yakondya kumhela mu wikale wangu, naficila myaka yigana limonga na makumi madatu. Ne myaka yiyi yikwijela micefu, ninga yimemile magazo. Kanyhi hamba nhavivyo, yikali si yinaficila mwi'walo lye myaka yono wekalaga wa baba mu wikale wawo.” 10Yakobo yakamulugutiza kanyhi Falawo, hodu yakawa kutuluka. 11Ale, Yusufu yakawa kuwapela sogwe hamonga ne wawahaze yisi ya Lamasesi, yisi yono yo swanu muno muno kuciza mu yisi yose ya Misili, wuwe wo wikalo wawo, nha vyono Falawo yalajiliza. 12Nayo Yusufu yakawa yakuwapela ndigwa, sogwe, ne wawahaze, ne mhuga yose yo sogwe, mu nghango ye liwalo lye wanhu wono wali wawetumbiye.

Nzala mbaha mu yisi ya Misili

13Zindigwa zikajililila lukulu mu yisi yose ya Misili. Nzala yikawa mbaha muno muno, sunga wanhu wose wanya Misili, sunga na wanya ku Kanani wose, wakaganda muno muno so nzala. 14Nayo Yusufu yakawa kuzikongholeza zipesa zose za mu yisi ya Misili, na za mu'si yose ya Kanani, mu wulawa mu wuhemba wono mwene yawaguzizaga. Yusufu yakawa kuzitegula zipesa zizo kwi 'kulu kuli Falawo. 15Na lono wanhu wose wa mu yisi ya Misili, na wa mu yisi ya Kanani, wali wakondya kuzitumamila zipesa zawo zose, hodu, Wamisili wakawa kumubitila Yusufu no kumutya, “Ale cipelaje ndigwa! Alu sokoci cifwile ha meso gako? Cilondolele wutazi. Alu lanje wayiko, zipesa zetu zose camala!” 16Nayo Yusufu yakawalonjela yakatya, “Alu hono mukutya mwamala zipesa, ale lu mumhelaje zimitugo zenyu, ane nane nimupelenyi wuhemba.” 17Nawo wakawa kumuletela Yusufu zimitugo zawo zose, zifwalasi, zing'ombe, zingholo, zimhene, sunga ne zindogowe zose, nayo Yusufu yakawa yakuwapela zindigwa. Na mu mwaka wuwo wose, Yusufu yakawa yakuwapela ndigwa mu nzila yo wukawane ne mitugo yawo yose. 18Mu mwaka wono wukatyatya, wanhu wakamuziza kanyhi Yusufu wakamutya, “Alu gwe go mulumbwe, i mbeka, zipesa zose zamalika, sunga ne zimitugo zetu, alu vyose vyawa vyako du gwegwe. Alu gwe go mulumbwe, ase co wetumami wako, hamba si cisigaliywe na cinji kanyhi, cono cosuma kukupela, langa casigalilwa ne miwili yetu ne migunda yetu, hodu du. 19Alu cono coleka ase cifwile ha meso gako cicici, sunga ne migunda yetu nayo yihodanjice? Ale lu wucigulaje sese, hamonga ne migunda yetu, ciwe wetumami wa Falawo, ase soko du wucilise. Wucipelaje wuhemba, ho cilece kufwa ne nzala, kanyhi wucipelaje sunga ne zimbeyu, cikahadice mu migunda yetu.”

20Ale nayo Yusufu yakawa kuyigula yisi yose ya Misili yiwe sawo ya Falawo. Ne Wamisili wose yikawa yiwanojeye waguze migunda yawo, vyono nzala yali yeza mbaha muno. Holeka yisi yose yikawa sawo ya Falawo. 21Nayo Yusufu yakawanoza wanhu wose wawe wetumami ku wulawilila ku lubavu aluno lwe yisi ya Misili sunga ko ku lubavu luyagwe. 22Hanhu hono wekalaga Wakohani du hali wene, ho Yusufu si yahagula. Vyono wene Falawo yawapelaga ndigwa zawo vyono wakohani, holeka si yali yiwanojeye wayiguze yisi yawo. 23Hanyuma Yusufu yakawa kuwalonjela wanhu yakatya, “Alu ta mulanje, ane nakondya kumugulenyi anye wanhu wose, hamonga ne migunda yenyu, vyose vyawa sawo ya Falawo. Holeka alu mopegwa zimbeyu mukazihadice mu migunda yenyu. 24Na mwi'pango lye nhwanga, momupela Falawo lifungu limonga kwe hano. Ne mafungu mane gono gosigala, ago mogetumila so mbeyu, na so zindigwa zenyu, ku soko yenyu, ne zimhuga zenyu, hamonga ne wana wenyu.” 25Nawo wakamupitula wakatya, “Gwe go mulumbwe, mbeka wakondya kuciponya wumi wetu! Nase cikukulumba du muno muno, so wuswanu wako, nase du kanyhi, cowa cili wetumami wa Falawo.” 26Nayo Yusufu ku wulawa lulo, yakayinoza nghani yiyo, yiwe yilajilizo mu yisi yose ya Misili, vyono yimunojeye munhu wo wose ku wulawa lulu, yawe kulavya lifungu limonga kwe hano lye nhwanga yakwe kuli Falawo. Ne lilajilizo lilyo, likwitumamilwa sunga nalu. Langa hono si zisi ze Wakohani du, zo si zanozwa ziwe sawo ya Falawo.

Cisakwa ca Yakobo ce ndumilizo

27Ale, wanhu wa Isilayeli, wakekala mu'si ya Gosheni mu yisi ya Misili. Na lono wali wali kuko, wakasawa sawo nyinji muno muno, nazo zikelela no konjelezeka muno muno. 28Yakobo yekala mu yisi ya Misili myaka yikumi na mupunghati, sunga yali yeza kuficila myaka yigana limonga na makumi mane na mupunghati yo wikale wakwe. 29Lipango lyakwe lyo kufwa lyaza kusejelela, Yakobo yakamucema mwanagwe Yusufu, yakamutya, “Alu manangu, hono wuwe mbeka wunyendile, ale, wuwice muwoko wako hagati ye vima vyangu, wihuwize vyono konhendela kwe cogopo ne ling'ani. Wulecele lukulu kunzika ku kuno kono Misili, 30langa wukanzikaje hamonga ne wasogo zangu. Wundinghulaje ku wulawa ku kuno kono Misili, wubite wukanzice hamonga ne wasogo zangu, hanhu hawo hono wakuwa kuzikwa.” Nayo Yusufu yakamupitula sogwe yakatya, “Baba, ane nonoza nha vyono wulonjile.” 31Nayo Yakobo yakatya, “Ale nyilahilaje!” Nayo Yusufu yakelaha. Hodu Isilayeli yakawa kwinamizya mutwe wakwe ku lubavu lwa ku mutwe ye citanda cakwe.

Currently Selected:

Mwamulizo 47: LLKWW

Highlight

Compare

Copy