Mwamulizo 46

Yakobo hamonga ne wanagwe, wakubita ku Misili

1Nayo Isilayeli, yakawa kutuluka na vyose vyono yali yena navyo. Nayo yali yeza kufika ha Beli-sheba, yakamulavizya Mulungu wo sogwe Isaka makumbiko. 2Nayo Mulungu yakalongana na Isilayeli ne cilo mu wugubulilwe, yakamucema yakutya, “Yakobo gwe! Yakobo!” Nayo Yakobo yakedika yakatya, “Ane hano.” 3Mulungu yakamulonjela yakatya, “Ane yo nene Mulungu, u Mulungu wo sogo. Holeka wulece kogopa ku wubita ku Misili. Na lono wuli kuko, ane nokunoza wuwe yikungugo yiwaha. 4Nene no mweneco, nowa nili hamonga nagwe sunga kuko ku Misili, yo nene du mono nokugomola ku kuno kanyhi. Ne miwoko ya Yusufu yo yologagomoleza meso gako ha wufwe wako.”

5Nayo Yakobo yakawa kutuluka ku wulawa ku Beli-sheba. Wanagwe wakawa kumudinghulila mu magali go kukwegwa gono Falawo yagategula ho gamusole, mwene hamonga ne wana wawo wagalika, hamonga ne wagolece zawo. 6Wakasoleleza hamonga ne zimitugo zawo, ne sawo yawo yose, yono wali wakwawa mu yisi ya Kanani, wakawa kubita ku Misili. Yakobo yakawasola we mhuga yakwe wose, 7wanagwe we cilume na we cicekulu wose, hamonga ne wezukulu, yakawategula wose ku Misili. 8Agano go matagwa ge wana wa Isilayeli wono wabitana no sogo yawo ku Misili. Lubeni, mulelwa mulongozi wa mwene Yakobo, 9hamonga ne wana wa Lubeni awano, Hanoki, Palu, Hezeloni, na Kalimi. 10Ne wana wa Simiyoni nawo wo wano, Yemuyeli, Yamini, Ohadi, Yakini, Sohali, na Shawuli mono yali mulelwe no mucekulu we Cikanani. 11Nawo wana wa Lawi wo awa, Gelishoni, Kohati, na Melali. 12Ne wana wa Yuda nawo wo awano, Eli, Onani, Shela, Pelezi, na Zela. (Ninga Eli na Onani, wafwila ku yisi ya Kanani.) Nawo wana wa Pelesi, wali awa, Hezeloni, na Hamuli. 13Ne wana wa Isakali wo wano, Tola, Puva, Yashubu na Shimuloni. 14Nayo Zabuloni, wanagwe wali awano, Seledi, Eloni na Yahiliyeli. 15Wawa wo wana wa Leya wono yamulelela Yakobo ku Padani-alani, hamonga na Dina u mwanagwe we cicekulu. Na mu wutowelele, wanagwe we cicekulu, hamonga ne wezukuluwe wose, wali waficile wanhu makumi madatu na wadatu liwalo lyawo.

16Wana wa Gadi nawo wali awano, Sifiyoni, Hagi, Shuni, Eziboni, Eli, Alodi, na Aleli. 17Nayo Asheli, wanagwe wali awa, Imuna, Ishiva, Ishivi, Beliya, na Sela u lumbu lyawo. Nayo Beliya, wanagwe wali awano, Hebeli, na Milikiyeli. 18Awano we likumi na mutandatu, lo lulelo lwa Yakobo, lono lwalawilila muli Zilipa, u mwitumami we cicekulu mono Labani yamupela mwanagwe we cicekulu Leya. 19Na Laheli nayo yamulelela Yakobo wana wejete, nawo wo awano, Yusufu na Benyamini. 20Nako kuko ku Misili, Asenati mwana we cicekulu wa Potifela, mono yali mukohani we likaya lya Oni, nayo yamulelela Yusufu wana wejete nawo wo wano, Manase na Efulayimu. 21Nawo wana wa Benyamini wali awa, Bela, Bekeli, Ashibeli, Gela, Namani, Ehi, Loshi, Mupimu, Hupimu, na Alidi. 22Nawo wanhu wawa we likumi na wane, wo wana wa Yakobo, wono Laheli mugolece wakwe yamulelela.

23Mwana wa Dani, yali Hushimu. 24Nawo wana wa Nafutali, wali, Yahiseyeli, Guni, Yeseli, na Shilemu. 25Nawo wawo vyono wali mupunghati, lo lulelo lwa Yakobo wono walawilila muli Biliha, u mwitumami we cicekulu, mono Labani yamupela mwanagwe we cicekulu Laheli. 26Holeka liwalo lye wana wose wa Yakobo wono yabita nawo ku Misili, hono wulece kuwawaliliza i wagolece wose we wanagwe ale wali waficile wanhu makumi mutandatu na mutandatu liwalo lyawo. 27Nako kuko ku yisi ya Misili, Yusufu yali yalela wana wejete. Holeka liwalo lye wanhu wose we mhuga ya Yakobo wono wenjila ku Misili, wali wanhu makumi mupunghati liwalo lyawo.

Yakobo hamonga ne wanagwe mu yisi ya Misili

28Ale, Yakobo yakawa kumutuma Yuda kuli Yusufu, yakamulonjele vyono wetang'anilile ku Gosheni, nawo wakafika ku yisi ya Gosheni. 29Nayo Yusufu yakasola ligali lyakwe, yakawa kubita kumuhinjiliza sogwe Isilayeli kuko ku Gosheni. Nayo Yusufu yali yeza kumuwona sogwe, yakamukumbatila akuno yakulila sunga yidaha likabita. 30Nayo Isilayeli yakamulonjela Yusufu yakatya, “Alu langa mwanangu, hamba nifwe luno, si cinji, vyono lu nakondya kukuwona, namanya vyono kumbe agwe wukali cawumi!”

31Nayo Yusufu yakawa kuwalonjela wawahaze, hamonga ne mhuga yose yo sogwe, yakawatya, “Alu ane neza kubita nghamumanyize Falawo vyono wawaha zangu, hamonga ne mhuga yose ya baba, wono wekalaga ku yisi ya Kanani, wakondya kunyiziza wali baha. 32Nane nomuloloseza vyono anye muli wadima mitugo wo mulimo wenyu, na vyono muli wadima mitugo, holeka muza akuno hamonga ne zimhene, zingholo ne zing'ombe, sunga ne sawo yenyu yose. 33Holeka nayo Falawo hono yamucemenyi no kumuwuzenyi yawe kutya, ‘Alu muzoweye kwituma mulimoci?’ 34Nanye mumutezaje nhavi, ‘Gwe go mulumbwe, ase co wetumami wako, cili wadimi wa mitugo, ku wulawa wudodo wetu sunga nalu, hambi nha vyo wali ne wa kuku zetu.’ Ale, mumulonjelaje nhavivyo, nayo ho yamukombolenyi mwikale mu yisi ya Gosheni.” Nayo Yusufu yazilonga zizo, ku soko vyono, munhu wo wose mudima mitugo, lyali yiwifyo yiwaha kuli Wamisili.

Currently Selected:

Mwamulizo 46: LLKWW

Highlight

Compare

Copy