Ezekiyeli 44
44
Witumamilwe wo mulango wo lubavu lwa kucilima
1Hanyuma yayo kanyhi, u munhu yuyo yakasola, yakangomola kanyhi ku nzila ya ku mulango wa kudeha, wa ku lubavu lwa kucilima ye Nyumba yo Mulungu. Nawo mulango wuwo wali mudindwe. 2Nayo Muwaha Mulungu yakanonjela yakatya, “U mulango wuwuno, wokwikala mudindwe du nhavivi, hamba wulece kudigulwa yaye. Hamba hasina munhu wo wose, mono kokombolwa yawitumamile, ng'o. Hambi ane no Muwaha Mulungu u Mulungu wa Isilayeli, nha ngholela mu mulango wu wuno. Holeka yinojeye wikale mudindwe du. 3Ninga hamba nhavivyo, u mutemi, yali wene du mono yatemile, yo yuyo mono kosuma kwinjila no kulya hali'ne, i ndigwa yono yelile. Nayo kokwinjilila mu nzila ye likumbo lyo mulango, kanyhi kolawaniziza mu nzila yiyo du kolo yakulawila kunze.”
I malajilizo, vyono yinojeye mu winjila mu Nyumba yo Mulungu
4Hanyuma yayo kanyhi, u munhu yuyo, yakasola, yakanghoza mu mulango wo lubavu lwa kusumuka, wono wali wuli ku mwande ye Nyumba yo Mulungu. Nane nali neza kulanga nhavi, nghawona Nyumba yo Mulungu yimemile nhojo yo Muwaha Mulungu. Nane hobaho nghagwa hasi wugubama. 5Nayo Muwaha Mulungu yakanonjela yakatya, “Gwe go munhu, alu wuhulicize viswanu, wuzikamise zose zono wukuziwona, na zono wukuzihulika. Hambi'ne nha nghusaka luno, nghuloloseze ze malajilizo, hamonga no wityatye wa mu Nyumba yo Mulungu. Wuzilanjilile muno muno ho wuwamanye i wanhu wono wanojeye kwinjila no kulawila mu Nyumba yo Mulungu kanyhi ne wanhuci wono si wakomboywe kwinjila.
6“Kanyhi wuwalonjele wawo we cibede, i wanhu wa Isilayeli, wuwatye nhavi, vyono ane no Muwaha Mulungu, si nosuma kugakangalila i mawifyo gawo gono wagetumaga. 7Hambi nha wawenjiza mu Nyumba yangu i wajenzi wono si walame, wono wasina cihuliko kuli'ne, ho wawe mugati, mwi'pango lono wakundavizya mafuta ne sakami vye makumbiko, vyono vikulavywa kuli'ne. Na mu nzila yiyo, wakawa kuyavufya Nyumba yangu. Holeka i wanhu wangu wakondya kucibena i cilagane, ku soko ye makani gawo gose ge mawifyo gono wakwituma. 8Hamba si wasuma kuvikamisa vinhu vyangu vyono vyelile vya mu Nyumba yangu yaye, langa wene wakewicila i wanhu wajenzi, wawe wo wetumami wo mulimo wangu, mu Nyumba yangu.
9“Ninga aluno nane, ane no Muwaha Mulungu nghutya nhavi, Hasina munhu wo wose mujenzi mono si yalame hamba munhu mono yasina cihuliko kuli'ne, hamba mujenzi wo wose mono vikalane ne wanhu wangu Isilayeli, mono kosuma kukombolwa ho yenjile mu Nyumba yangu.”
I Walawi wakuwuswa mu mulimo wo wukohani
10U Muwaha Mulungu yakanonjela yakatya, “Alu ane neza kuwalipiciza wawo i Walawi, hamonga ne wanhu wanji wa muli Waisilayeli, wono vyahangana hamonga, wakawa kundeka no kuhemba i vihwani viseswe. 11Holeka luno i wakohani wawa, wonyitumamila mu Nyumba yangu, u mulimo wo wulindilizi du we milango, hamonga ne milimo yinji yinji ya mu Nyumba yo Mulungu. Wowa wo wawulaji we mitugo zono wanhu wakulavya so vilavywa vinyanywe na so makumbiko, hamonga no kuwetumamila wanhu. 12Na kanyhi vyono wene wali wo watonji we wanhu wa Isilayeli, mu wuhembi wo kuhemba vihwani viseswe, no wituma wubi. Holeka nane, ane no Muwaha Mulungu, nghelahiza nha vyono nane nowalipiciza du. 13Holeka ku wulawa lulu, hamba si wonyitumamila kanyhi nha wakohani, hamba si wosuma kanyhi kuvipamiza i vinhu vyangu vyono vyelile, hamba si wokwinjilila lukulu kanyhi i Hanhu Hono Helile Helile, muno. Na wuwu wo wulipicizwe wawo, ku soko ye makani ge cevu gono wali kwituma. 14Na ku wulawa lulu, ane nawanoza wawe walindilizi mu wulindilizi we Nyumba yo Mulungu du, na muli zose zono zikwitumwa mugati yayo.”
I wakohani
15Kanyhi u Muwaha Mulungu yakatya, “Ale, wawo i wakohani Walawi, wo mulango wa Lawi, wo lulelo lwa Zadoki, wo wawo du wono wojendelele kunyitumamila mu Nyumba yangu ko wihuwilwa, hambi i wanhu wanji wa Isilayeli nha wakondya kwajilila no kundeka. Holeka wo wawo du wo lulelo lwa Zadoki, wono wosuma kunyitumamila no kusejelela hali'ne wawe kundavizya mafuta hamonga ne sakami vye makumbiko. 16Kanyhi wo weneco du wono wosuma kwinjila mu Nyumba yangu, wawe kwitumama ha cikumbicilo, hamonga no kulongoza wuhembi mu Nyumba yo Mulungu. 17Ninga nawo, lono wakwinjila mu mulango wa mwi'kumbo lya mugati, ye Nyumba yo Mulungu, yiwanojeye wawe wavwalile myenda ya bafuta. Walecele lukulu kuvwala cinhu co cose cihone no hamba, lono wali mu mulimo mu gati ye likumbo lya mugati, hamba lono wali mugati mu Nyumba yo Mulungu. 18Heya, yiwanojeye wawe wavwalile vitambala vya bafuta mu mitwe yawo, kanyhi wavwalile suluwale za bafuta. Ninga langa walece kwiwopa ne misipi mu viwino vyawo, ho walece kugazwa ne lituguti. 19Nawo yiwanojeye wawe kuyivula myenda yawo yose yono wowa wavwalile, lono wali mu mulimo, mu Nyumba yo Mulungu, no kuyiwika mumo mu vinyumba vyono vyelile, lono wakali si nalawila kwi'kumbo lya kudeha, kono ko wali wanhu. Heya, yowa yiwanojeye wayikawanize myenda yiyo, wavwale myenda yinji, ho walece kuwataciza wanhu wele, so vivwalo vyawo.
20“Nawo i wakohani, yiwanojeye walece kuceta zimvwili zose mu mitwe yawo, hamba walece kuzileka ziwiluce sunga ziwe nhali muno. Langa wazilekaje ziwe no wutali wa hagati du. 21Kanyhi i wakohani yiwanojeye walecele lukulu kung'wa divayi ye liwala lyo lyose lono wakwinjila mwi'kumbo lya mugati. 22Kanyhi hasina mukohani wo wose mono kokombolwa yamutole mucekulu mono yafwiliywe no mulume, hamba yapejigwe talaka no mulume yunji. Langa yimunojeye yatole du muhinza we Ciisilayeli mono yakali namanya walume, hamba mucekulu we Ciisilayeli mono yafwiliywe no mulume wakwe mono yali mukohani.
23“Kanyhi i wakohani yiwanojeye wawejize wanhu wangu wasume kumanya no kuziwagula zono zelile, na zono si zelile, no kuwamanyiza u wisimajile we vinhu vyavufuywe na vyono si vyavufywe. 24Na hono wijele wiwanganile wowose muli wanhu, ale, wakohani wowozilamula mu wulunji we malajilizo gangu. Kanyhi yiwanojeye webate ne vilo vye zisikukuu ze cidini hamonga no wityatye wayo, na vyono winha wulajilize wangu, hamonga no kunozeza Sabato zangu.
25“Kanyhi mukohani, yimunojeye yalecele lukulu kwiyavufya so wupamiza muvimba, lunji langa hono wuwe muvimba wo sogwe du, hamba wo nyina, hamba wo mwanagwe, hamba wo muwahawe hamba wo mwanakwawe, hamba wo lumbulye mono yakali natolwa. 26Ninga nayo kolo yakondya kwiyeza kanyhi, yimunojeye yamule yekale vilo mupunghati, 27hanyuma ho yenjile mwi'kumbo lya mugati lya mu Nyumba yo Mulungu, yalavye cilavywa cakwe co wubi. Nayo mu nzila yiyo, ho kosuma kwitumama kanyhi mu Nyumba yo Mulungu. Vyo nghutya ane no Muwaha Mulungu.
28“Kanyhi i wakohani, wena wuhazi wo wukohani, nawo wo wuwezaga lye 'fungu lyawo lyono nawapela Isilayeli, wawe kwihaza lulelo na lulelo. Ninga si yiwanojeye wene, wawe na sawo yo yose mu Isilayeli, yono wosuma kutya vyono, ayi yo sawo yetu. Hambi ane nha yo nene du mono nowakwiza mu visakwa vyawo vyose. 29Langa i wene, ndigwa yawo, yowa i vilavywa vyo wusaje, ne vilavywa vyo wubi, hamonga ne vilavywa vye masutya, hamonga ne vinhu vyose vyono wanhu wa Isilayeli wowa kundavizya, ane no Mulungu wawo. 30Kanyhi i wakohani, yiwanojeye wapegwe i vilavywa vyose viswanu vye malimbuko, hamonga ne vilavywa vyose, vyono Waisilayeli wakundavizya ane no Mulungu wawo. Ne wanhu wose lono wakuteleka mikate yawo, yiwanojeye wawapele i wakohani i ligawo lilongozi lyo wusaje wenyu, ciwe cilavywa, nane nowamotya muno mu zinyumba zawo. 31Kanyhi i wakohani, yiwanojeye walecele lukulu kulya ndeje, hamba nimu yo yose yono yifwiliye yeneco, hamba yono yiwulagwe ne nimu nzagwe.”
Currently Selected:
Ezekiyeli 44: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
Ezekiyeli 44
44
Witumamilwe wo mulango wo lubavu lwa kucilima
1Hanyuma yayo kanyhi, u munhu yuyo yakasola, yakangomola kanyhi ku nzila ya ku mulango wa kudeha, wa ku lubavu lwa kucilima ye Nyumba yo Mulungu. Nawo mulango wuwo wali mudindwe. 2Nayo Muwaha Mulungu yakanonjela yakatya, “U mulango wuwuno, wokwikala mudindwe du nhavivi, hamba wulece kudigulwa yaye. Hamba hasina munhu wo wose, mono kokombolwa yawitumamile, ng'o. Hambi ane no Muwaha Mulungu u Mulungu wa Isilayeli, nha ngholela mu mulango wu wuno. Holeka yinojeye wikale mudindwe du. 3Ninga hamba nhavivyo, u mutemi, yali wene du mono yatemile, yo yuyo mono kosuma kwinjila no kulya hali'ne, i ndigwa yono yelile. Nayo kokwinjilila mu nzila ye likumbo lyo mulango, kanyhi kolawaniziza mu nzila yiyo du kolo yakulawila kunze.”
I malajilizo, vyono yinojeye mu winjila mu Nyumba yo Mulungu
4Hanyuma yayo kanyhi, u munhu yuyo, yakasola, yakanghoza mu mulango wo lubavu lwa kusumuka, wono wali wuli ku mwande ye Nyumba yo Mulungu. Nane nali neza kulanga nhavi, nghawona Nyumba yo Mulungu yimemile nhojo yo Muwaha Mulungu. Nane hobaho nghagwa hasi wugubama. 5Nayo Muwaha Mulungu yakanonjela yakatya, “Gwe go munhu, alu wuhulicize viswanu, wuzikamise zose zono wukuziwona, na zono wukuzihulika. Hambi'ne nha nghusaka luno, nghuloloseze ze malajilizo, hamonga no wityatye wa mu Nyumba yo Mulungu. Wuzilanjilile muno muno ho wuwamanye i wanhu wono wanojeye kwinjila no kulawila mu Nyumba yo Mulungu kanyhi ne wanhuci wono si wakomboywe kwinjila.
6“Kanyhi wuwalonjele wawo we cibede, i wanhu wa Isilayeli, wuwatye nhavi, vyono ane no Muwaha Mulungu, si nosuma kugakangalila i mawifyo gawo gono wagetumaga. 7Hambi nha wawenjiza mu Nyumba yangu i wajenzi wono si walame, wono wasina cihuliko kuli'ne, ho wawe mugati, mwi'pango lono wakundavizya mafuta ne sakami vye makumbiko, vyono vikulavywa kuli'ne. Na mu nzila yiyo, wakawa kuyavufya Nyumba yangu. Holeka i wanhu wangu wakondya kucibena i cilagane, ku soko ye makani gawo gose ge mawifyo gono wakwituma. 8Hamba si wasuma kuvikamisa vinhu vyangu vyono vyelile vya mu Nyumba yangu yaye, langa wene wakewicila i wanhu wajenzi, wawe wo wetumami wo mulimo wangu, mu Nyumba yangu.
9“Ninga aluno nane, ane no Muwaha Mulungu nghutya nhavi, Hasina munhu wo wose mujenzi mono si yalame hamba munhu mono yasina cihuliko kuli'ne, hamba mujenzi wo wose mono vikalane ne wanhu wangu Isilayeli, mono kosuma kukombolwa ho yenjile mu Nyumba yangu.”
I Walawi wakuwuswa mu mulimo wo wukohani
10U Muwaha Mulungu yakanonjela yakatya, “Alu ane neza kuwalipiciza wawo i Walawi, hamonga ne wanhu wanji wa muli Waisilayeli, wono vyahangana hamonga, wakawa kundeka no kuhemba i vihwani viseswe. 11Holeka luno i wakohani wawa, wonyitumamila mu Nyumba yangu, u mulimo wo wulindilizi du we milango, hamonga ne milimo yinji yinji ya mu Nyumba yo Mulungu. Wowa wo wawulaji we mitugo zono wanhu wakulavya so vilavywa vinyanywe na so makumbiko, hamonga no kuwetumamila wanhu. 12Na kanyhi vyono wene wali wo watonji we wanhu wa Isilayeli, mu wuhembi wo kuhemba vihwani viseswe, no wituma wubi. Holeka nane, ane no Muwaha Mulungu, nghelahiza nha vyono nane nowalipiciza du. 13Holeka ku wulawa lulu, hamba si wonyitumamila kanyhi nha wakohani, hamba si wosuma kanyhi kuvipamiza i vinhu vyangu vyono vyelile, hamba si wokwinjilila lukulu kanyhi i Hanhu Hono Helile Helile, muno. Na wuwu wo wulipicizwe wawo, ku soko ye makani ge cevu gono wali kwituma. 14Na ku wulawa lulu, ane nawanoza wawe walindilizi mu wulindilizi we Nyumba yo Mulungu du, na muli zose zono zikwitumwa mugati yayo.”
I wakohani
15Kanyhi u Muwaha Mulungu yakatya, “Ale, wawo i wakohani Walawi, wo mulango wa Lawi, wo lulelo lwa Zadoki, wo wawo du wono wojendelele kunyitumamila mu Nyumba yangu ko wihuwilwa, hambi i wanhu wanji wa Isilayeli nha wakondya kwajilila no kundeka. Holeka wo wawo du wo lulelo lwa Zadoki, wono wosuma kunyitumamila no kusejelela hali'ne wawe kundavizya mafuta hamonga ne sakami vye makumbiko. 16Kanyhi wo weneco du wono wosuma kwinjila mu Nyumba yangu, wawe kwitumama ha cikumbicilo, hamonga no kulongoza wuhembi mu Nyumba yo Mulungu. 17Ninga nawo, lono wakwinjila mu mulango wa mwi'kumbo lya mugati, ye Nyumba yo Mulungu, yiwanojeye wawe wavwalile myenda ya bafuta. Walecele lukulu kuvwala cinhu co cose cihone no hamba, lono wali mu mulimo mu gati ye likumbo lya mugati, hamba lono wali mugati mu Nyumba yo Mulungu. 18Heya, yiwanojeye wawe wavwalile vitambala vya bafuta mu mitwe yawo, kanyhi wavwalile suluwale za bafuta. Ninga langa walece kwiwopa ne misipi mu viwino vyawo, ho walece kugazwa ne lituguti. 19Nawo yiwanojeye wawe kuyivula myenda yawo yose yono wowa wavwalile, lono wali mu mulimo, mu Nyumba yo Mulungu, no kuyiwika mumo mu vinyumba vyono vyelile, lono wakali si nalawila kwi'kumbo lya kudeha, kono ko wali wanhu. Heya, yowa yiwanojeye wayikawanize myenda yiyo, wavwale myenda yinji, ho walece kuwataciza wanhu wele, so vivwalo vyawo.
20“Nawo i wakohani, yiwanojeye walece kuceta zimvwili zose mu mitwe yawo, hamba walece kuzileka ziwiluce sunga ziwe nhali muno. Langa wazilekaje ziwe no wutali wa hagati du. 21Kanyhi i wakohani yiwanojeye walecele lukulu kung'wa divayi ye liwala lyo lyose lono wakwinjila mwi'kumbo lya mugati. 22Kanyhi hasina mukohani wo wose mono kokombolwa yamutole mucekulu mono yafwiliywe no mulume, hamba yapejigwe talaka no mulume yunji. Langa yimunojeye yatole du muhinza we Ciisilayeli mono yakali namanya walume, hamba mucekulu we Ciisilayeli mono yafwiliywe no mulume wakwe mono yali mukohani.
23“Kanyhi i wakohani yiwanojeye wawejize wanhu wangu wasume kumanya no kuziwagula zono zelile, na zono si zelile, no kuwamanyiza u wisimajile we vinhu vyavufuywe na vyono si vyavufywe. 24Na hono wijele wiwanganile wowose muli wanhu, ale, wakohani wowozilamula mu wulunji we malajilizo gangu. Kanyhi yiwanojeye webate ne vilo vye zisikukuu ze cidini hamonga no wityatye wayo, na vyono winha wulajilize wangu, hamonga no kunozeza Sabato zangu.
25“Kanyhi mukohani, yimunojeye yalecele lukulu kwiyavufya so wupamiza muvimba, lunji langa hono wuwe muvimba wo sogwe du, hamba wo nyina, hamba wo mwanagwe, hamba wo muwahawe hamba wo mwanakwawe, hamba wo lumbulye mono yakali natolwa. 26Ninga nayo kolo yakondya kwiyeza kanyhi, yimunojeye yamule yekale vilo mupunghati, 27hanyuma ho yenjile mwi'kumbo lya mugati lya mu Nyumba yo Mulungu, yalavye cilavywa cakwe co wubi. Nayo mu nzila yiyo, ho kosuma kwitumama kanyhi mu Nyumba yo Mulungu. Vyo nghutya ane no Muwaha Mulungu.
28“Kanyhi i wakohani, wena wuhazi wo wukohani, nawo wo wuwezaga lye 'fungu lyawo lyono nawapela Isilayeli, wawe kwihaza lulelo na lulelo. Ninga si yiwanojeye wene, wawe na sawo yo yose mu Isilayeli, yono wosuma kutya vyono, ayi yo sawo yetu. Hambi ane nha yo nene du mono nowakwiza mu visakwa vyawo vyose. 29Langa i wene, ndigwa yawo, yowa i vilavywa vyo wusaje, ne vilavywa vyo wubi, hamonga ne vilavywa vye masutya, hamonga ne vinhu vyose vyono wanhu wa Isilayeli wowa kundavizya, ane no Mulungu wawo. 30Kanyhi i wakohani, yiwanojeye wapegwe i vilavywa vyose viswanu vye malimbuko, hamonga ne vilavywa vyose, vyono Waisilayeli wakundavizya ane no Mulungu wawo. Ne wanhu wose lono wakuteleka mikate yawo, yiwanojeye wawapele i wakohani i ligawo lilongozi lyo wusaje wenyu, ciwe cilavywa, nane nowamotya muno mu zinyumba zawo. 31Kanyhi i wakohani, yiwanojeye walecele lukulu kulya ndeje, hamba nimu yo yose yono yifwiliye yeneco, hamba yono yiwulagwe ne nimu nzagwe.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.