Ezekiyeli 43
43
U Muwaha Mulungu yakwinjila mu Nyumba yakwe
1Hanyuma yayo u munhu yuyo, yakasola, yakanhegula sunga ko ku mulango wulya, wono wali wulanjile ku lubavu lwa kucilima. 2Na lanje, nghayiwona nhojo yo Muwaha Mulungu wa Isilayeli, yikuza yikulawilila ku lubavu lwa kucilima. Ne lizi lyo Mulungu likahulikwa likukoloma nho mukukunzo we lilenga. Ne yisi nayo yikang'alala so nhojo yiyo yo Mulungu. 3No wugubulilwe wuwu, wukawa vihwanile no wugubulilwe wono nawuwona lono Mulungu yayongomezeza Yelusalemi, no wugubulilwe kanyhi wono nawuwona he kolongo lya Kebali. Nane ho baho baho nghagwa hasi wugubama. 4Nayo i nhojo yo Muwaha Mulungu, yikawa kuza yikakolela mu mulango wa ku lubavu lulo lwa kucilima, yikawa kwinjila mu Nyumba yo Mulungu.
5Ale baho, u Muhe wo Muwaha Mulungu, yakanyinula, yakanhegula sunga ko kwi'kumbo lya mugati. Nane kuko, nghayiwona Nyumba yo Mulungu yakondya kumemywa no lukumyo lo Muwaha Mulungu. 6Nayo u munhu yuyulya, yali yemile baho behi nane. Hanyuma nghamuhulika u Muwaha Mulungu, yakulonga nane mu wulawa mu Nyumba yakwe mugati, yakunyitya, 7“Gwe go munhu, lanje, bahano ho he 'goda lyangu lyo wutemi. Nane nokwikala bahano hamonga ne wanhu wangu Isilayeli, kanyhi nowa mutemi wawo cibitilila. Na ku wulawa lulu, i wanhu wangu Waisilayeli, hamonga ne watemi wawo wose, si wolokwijelela kanyhi kulikoza cevu litagwa lyangu lyono lyelile, so wuhemba kanyhi milungu yinji, hamba kuyizika kanyhi i mivimba ye watemi wawo i hanhu baha. 8Hambi i watemi wawo, nha wejelela, wakaviwika vipimbilamulango vyawo, hamonga ne zifulemu ze milango ye zikaya zawo zo wutemi, behi muno muno ne vipimbilamulango vyangu, hamonga ne zifulemu ze milango ye Nyumba yangu. Na haciligati yangu na wene, hali ho lili 'jinji lyono lyali licitemanuye. Nawo wakalyavufya litagwa lyangu lyono lyelile ku soko ye makani gawo i mabi gono wetuma. Holeka nane nghawongomezeza mwi'kuwo lyangu. 9Ninga aluno, yowa yiwanojeye walecele lukulu kuyihemba milungu yinji, kanyhi wayiwuse i mivimba ye watemi wawo yiwe kutali nane. Na hono wanoze nhavivyo, nane, nokwikala muli wene cibitilila.”
10U Muwaha Mulungu yakajendelela kunonjela kanyhi yakatya, “Gwe go munhu, wuwalonjelaje i wanhu wa Isilayeli ze Nyumba yangu, vyono yinha zo wajele wayo hamonga na ze nzengwa yayo. Ho wakozwe cevu so metumo gawo mabi gono wetuma. 11Na kolo wakolwa cevu ku soko ye mabi gono wetuma, nagwe baho, wuwaloloseze ze Nyumba yo Mulungu vyono zinha, ze cizenjele cayo, ne hwani yayo, ne ndawililo zayo, ne menjililo gayo, no wutemye wayo, wuwamanyize no wulajilize wayo hamonga ne malajilizo gayo gose. Nagwe wuzandicile zizi zose ha meso gawo, ho wasume kuziwona zizo zose, nawo ho wasume kuwukamisa wutemye wayo wose, hamonga no wulajilize wayo, no kuwitumama. 12Awu wo wulajilize we Nyumba yo Mulungu. Mbavu zose ze mipaka yono yiyipilime Nyumba yo Mulungu, sunga ko kucanyha ye litunda, hakondya kuwikwa helile ha hono helile muno.”
I cikumbicilo
13Avi navyo vyo vipimo vye cikumbicilo, vyono cali cinha, ne vipimo vivi vyali vipimo vivilya du vyono vyetumamilwa mu wupime we Nyumba yo Mulungu. Cikumbicilo cico, u musinji waco, wali wina musopeko wa cuma wo wugazi wa sentimita makumi mahano, no wukangazi wa sentimita makumi mahano nhavivilya, kanyhi cali ciwiciligwe mugo wo wutali wa sentimita makumi mejete ne'hano, wupilime musinji waco. 14No wulawa baho ha musinji waco, cali cizenjeywe lijinji lye mhamba nongozi, yo wutali wa mita monga ku wubita kucanyha. Hanyuma kanyhi, baho hacanyha ye mhamba yiyo nongozi, hali hazenjigwe kanyhi lijinji linji lye mhamba ye kejete, lyono lyali lisulutiye linjiye mugati hadodo, sentimita makumi mahano, mugati ye lijinji lya hasi yayo. Ne lijinji lilyo lyali lina wutali wa mita nyejete ku wubita kucanyha. Na hacanyha yayo kanyhi ye mhamba yiyo, naho hali hajeleceze lijinji linji kanyhi lye mhamba ye kadatu. Nalyo lilyo lyali lisulutiye linjiye mugati hadodo sentimita makumi mahano, mugati ye lijinji lya hasi yayo. 15Na mu mhamba yiyi ye kadatu, ya kucanyha, hali ho hanhu hono walavizyaga i makumbiko ge vilavywa vinyanywe. Naho hali nhavivyo no wutali wa mita nyejete. Ne mahembe ga mu zinhuzi zaco gose vyono mane, gali matali-tali, gacizize wutali we mayawo gono gali mapilimywe baho hacanyha ye cikumbicilo. 16Na baho hacanyha ye cikumbicilo, hali heling'aniye du mbavu zose. Cali cina mita mutandatu mutandatu mbavu zose. 17Na haciligati yayo, mu mhamba ye kejete, naho cali ciling'aniye mbavu zose. Cali cina mita mupunghati mupunghati mbavu zose, hamonga no mugo mugo wo wugazi wa sentimita makumi mejete ne 'hano kunze yayo. (No musopeko wayo wa cuma, wali wina wugazi wa sentimita makumi mahano.) Ne zingazi zo kubitila kucanyha ye cikumbicilo, zali zili ku lubavu lwa kucilima ye cikumbicilo.
U wusiwanulwe we cikumbicilo
18Hanyuma u Muwaha Mulungu yakanonjela yakatya, “Gwe go munhu, ale wuhulicize zono nghukulonjela. Kolo cikumbicilo cakondya kuzengwa, yikunojeye wucisiwanulile mu nzila yo kulavizya makumbiko ge vilavywa vinyanywe muli cene. Hamonga no kucimiziza i sakami ye zi mitugo zono zowa zilavigwe so makumbiko gago. 19Ne wakohani wo mulango wa Lawi, wo lulelo lwa Zadoki, wo wawo du wono wanojeye wanyizize no kunyitumamila'ne. Ane yo nene Muwaha Mulungu mono nghuzilajiliza zizi. Yikunojeye wuwapele ng'ombe nzeku ndodo, yo yiwe ye cilavywa co wubi. 20Hanyuma wuyisole sakami yayo yinji, wuyibace mu mahembe ge cikumbicilo gose vyono mane, na mu zinhuzi zayo zose ze cikumbicilo, sunga na mu mugo wayo mbavu zose. Na mu nzila yiyo, kowa wakondya kuceza cikumbicilo no kucinozeza mulamu. 21Hanyuma yayo wuyisole yiyo nzeku yono yilavigwe yikumbiko, so cilavywa co wubi, wuyikongojezeze i hanhu hono hahagulwa, kunze ye Nyumba yo Mulungu. 22Ne lizuwa lye kejete, wusole mvulati yono yisina cilema co cose, wuyilavye yiwe cilavywa co wubi. Hanyuma wuceze cikumbicilo ne sakami, nha vyono wunozize ne sakami ye nzeku. 23Na kolo wazituma zizo zose wakondya, wusole kanyhi nzeku yinji ndodo, hamonga na ngholo nduwilu ndodo, zose ziweze zono zisina vilema yaye. 24Wundetele zose vyono nyejete. Nawo wakohani wazinyunyile mwino mucanyha yayo, hanyuma wazikongoje ziwe cilavywa kuli'ne. 25Nagwe wujendelele kulavya nhondo zose nzeku, na mvulati, hamonga na ngholo nduwilu, sunga vifice vilo mupunghati, ziwe vilavywa vyo wubi. Ninga wulanjilile, zizo zose ziwe zisina cilema co cose. 26Na mu vilo vyose vivyo mupunghati, i wakohani weze wajendeleye du nhondo zose kuceza cikumbicilo no kucinozeza mulamu, ho ciwe cakondya kuwikanizwa so witumamilwe. 27Na kolo vyakondya kupuluta vivyo vilo mupunghati, nawo i wakohani nhondo, ho wokwanza kucitumamila cikumbicilo so mulimo wo kulavya vilavywa vye wanhu, i vilavywa vinyanywe hamonga ne vilavywa vyo mulamu. Nane nhondo ho nokwendezwa nanye wose, yo nene Muwaha Mulungu vyo nghutya.”
Currently Selected:
Ezekiyeli 43: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
Ezekiyeli 43
43
U Muwaha Mulungu yakwinjila mu Nyumba yakwe
1Hanyuma yayo u munhu yuyo, yakasola, yakanhegula sunga ko ku mulango wulya, wono wali wulanjile ku lubavu lwa kucilima. 2Na lanje, nghayiwona nhojo yo Muwaha Mulungu wa Isilayeli, yikuza yikulawilila ku lubavu lwa kucilima. Ne lizi lyo Mulungu likahulikwa likukoloma nho mukukunzo we lilenga. Ne yisi nayo yikang'alala so nhojo yiyo yo Mulungu. 3No wugubulilwe wuwu, wukawa vihwanile no wugubulilwe wono nawuwona lono Mulungu yayongomezeza Yelusalemi, no wugubulilwe kanyhi wono nawuwona he kolongo lya Kebali. Nane ho baho baho nghagwa hasi wugubama. 4Nayo i nhojo yo Muwaha Mulungu, yikawa kuza yikakolela mu mulango wa ku lubavu lulo lwa kucilima, yikawa kwinjila mu Nyumba yo Mulungu.
5Ale baho, u Muhe wo Muwaha Mulungu, yakanyinula, yakanhegula sunga ko kwi'kumbo lya mugati. Nane kuko, nghayiwona Nyumba yo Mulungu yakondya kumemywa no lukumyo lo Muwaha Mulungu. 6Nayo u munhu yuyulya, yali yemile baho behi nane. Hanyuma nghamuhulika u Muwaha Mulungu, yakulonga nane mu wulawa mu Nyumba yakwe mugati, yakunyitya, 7“Gwe go munhu, lanje, bahano ho he 'goda lyangu lyo wutemi. Nane nokwikala bahano hamonga ne wanhu wangu Isilayeli, kanyhi nowa mutemi wawo cibitilila. Na ku wulawa lulu, i wanhu wangu Waisilayeli, hamonga ne watemi wawo wose, si wolokwijelela kanyhi kulikoza cevu litagwa lyangu lyono lyelile, so wuhemba kanyhi milungu yinji, hamba kuyizika kanyhi i mivimba ye watemi wawo i hanhu baha. 8Hambi i watemi wawo, nha wejelela, wakaviwika vipimbilamulango vyawo, hamonga ne zifulemu ze milango ye zikaya zawo zo wutemi, behi muno muno ne vipimbilamulango vyangu, hamonga ne zifulemu ze milango ye Nyumba yangu. Na haciligati yangu na wene, hali ho lili 'jinji lyono lyali licitemanuye. Nawo wakalyavufya litagwa lyangu lyono lyelile ku soko ye makani gawo i mabi gono wetuma. Holeka nane nghawongomezeza mwi'kuwo lyangu. 9Ninga aluno, yowa yiwanojeye walecele lukulu kuyihemba milungu yinji, kanyhi wayiwuse i mivimba ye watemi wawo yiwe kutali nane. Na hono wanoze nhavivyo, nane, nokwikala muli wene cibitilila.”
10U Muwaha Mulungu yakajendelela kunonjela kanyhi yakatya, “Gwe go munhu, wuwalonjelaje i wanhu wa Isilayeli ze Nyumba yangu, vyono yinha zo wajele wayo hamonga na ze nzengwa yayo. Ho wakozwe cevu so metumo gawo mabi gono wetuma. 11Na kolo wakolwa cevu ku soko ye mabi gono wetuma, nagwe baho, wuwaloloseze ze Nyumba yo Mulungu vyono zinha, ze cizenjele cayo, ne hwani yayo, ne ndawililo zayo, ne menjililo gayo, no wutemye wayo, wuwamanyize no wulajilize wayo hamonga ne malajilizo gayo gose. Nagwe wuzandicile zizi zose ha meso gawo, ho wasume kuziwona zizo zose, nawo ho wasume kuwukamisa wutemye wayo wose, hamonga no wulajilize wayo, no kuwitumama. 12Awu wo wulajilize we Nyumba yo Mulungu. Mbavu zose ze mipaka yono yiyipilime Nyumba yo Mulungu, sunga ko kucanyha ye litunda, hakondya kuwikwa helile ha hono helile muno.”
I cikumbicilo
13Avi navyo vyo vipimo vye cikumbicilo, vyono cali cinha, ne vipimo vivi vyali vipimo vivilya du vyono vyetumamilwa mu wupime we Nyumba yo Mulungu. Cikumbicilo cico, u musinji waco, wali wina musopeko wa cuma wo wugazi wa sentimita makumi mahano, no wukangazi wa sentimita makumi mahano nhavivilya, kanyhi cali ciwiciligwe mugo wo wutali wa sentimita makumi mejete ne'hano, wupilime musinji waco. 14No wulawa baho ha musinji waco, cali cizenjeywe lijinji lye mhamba nongozi, yo wutali wa mita monga ku wubita kucanyha. Hanyuma kanyhi, baho hacanyha ye mhamba yiyo nongozi, hali hazenjigwe kanyhi lijinji linji lye mhamba ye kejete, lyono lyali lisulutiye linjiye mugati hadodo, sentimita makumi mahano, mugati ye lijinji lya hasi yayo. Ne lijinji lilyo lyali lina wutali wa mita nyejete ku wubita kucanyha. Na hacanyha yayo kanyhi ye mhamba yiyo, naho hali hajeleceze lijinji linji kanyhi lye mhamba ye kadatu. Nalyo lilyo lyali lisulutiye linjiye mugati hadodo sentimita makumi mahano, mugati ye lijinji lya hasi yayo. 15Na mu mhamba yiyi ye kadatu, ya kucanyha, hali ho hanhu hono walavizyaga i makumbiko ge vilavywa vinyanywe. Naho hali nhavivyo no wutali wa mita nyejete. Ne mahembe ga mu zinhuzi zaco gose vyono mane, gali matali-tali, gacizize wutali we mayawo gono gali mapilimywe baho hacanyha ye cikumbicilo. 16Na baho hacanyha ye cikumbicilo, hali heling'aniye du mbavu zose. Cali cina mita mutandatu mutandatu mbavu zose. 17Na haciligati yayo, mu mhamba ye kejete, naho cali ciling'aniye mbavu zose. Cali cina mita mupunghati mupunghati mbavu zose, hamonga no mugo mugo wo wugazi wa sentimita makumi mejete ne 'hano kunze yayo. (No musopeko wayo wa cuma, wali wina wugazi wa sentimita makumi mahano.) Ne zingazi zo kubitila kucanyha ye cikumbicilo, zali zili ku lubavu lwa kucilima ye cikumbicilo.
U wusiwanulwe we cikumbicilo
18Hanyuma u Muwaha Mulungu yakanonjela yakatya, “Gwe go munhu, ale wuhulicize zono nghukulonjela. Kolo cikumbicilo cakondya kuzengwa, yikunojeye wucisiwanulile mu nzila yo kulavizya makumbiko ge vilavywa vinyanywe muli cene. Hamonga no kucimiziza i sakami ye zi mitugo zono zowa zilavigwe so makumbiko gago. 19Ne wakohani wo mulango wa Lawi, wo lulelo lwa Zadoki, wo wawo du wono wanojeye wanyizize no kunyitumamila'ne. Ane yo nene Muwaha Mulungu mono nghuzilajiliza zizi. Yikunojeye wuwapele ng'ombe nzeku ndodo, yo yiwe ye cilavywa co wubi. 20Hanyuma wuyisole sakami yayo yinji, wuyibace mu mahembe ge cikumbicilo gose vyono mane, na mu zinhuzi zayo zose ze cikumbicilo, sunga na mu mugo wayo mbavu zose. Na mu nzila yiyo, kowa wakondya kuceza cikumbicilo no kucinozeza mulamu. 21Hanyuma yayo wuyisole yiyo nzeku yono yilavigwe yikumbiko, so cilavywa co wubi, wuyikongojezeze i hanhu hono hahagulwa, kunze ye Nyumba yo Mulungu. 22Ne lizuwa lye kejete, wusole mvulati yono yisina cilema co cose, wuyilavye yiwe cilavywa co wubi. Hanyuma wuceze cikumbicilo ne sakami, nha vyono wunozize ne sakami ye nzeku. 23Na kolo wazituma zizo zose wakondya, wusole kanyhi nzeku yinji ndodo, hamonga na ngholo nduwilu ndodo, zose ziweze zono zisina vilema yaye. 24Wundetele zose vyono nyejete. Nawo wakohani wazinyunyile mwino mucanyha yayo, hanyuma wazikongoje ziwe cilavywa kuli'ne. 25Nagwe wujendelele kulavya nhondo zose nzeku, na mvulati, hamonga na ngholo nduwilu, sunga vifice vilo mupunghati, ziwe vilavywa vyo wubi. Ninga wulanjilile, zizo zose ziwe zisina cilema co cose. 26Na mu vilo vyose vivyo mupunghati, i wakohani weze wajendeleye du nhondo zose kuceza cikumbicilo no kucinozeza mulamu, ho ciwe cakondya kuwikanizwa so witumamilwe. 27Na kolo vyakondya kupuluta vivyo vilo mupunghati, nawo i wakohani nhondo, ho wokwanza kucitumamila cikumbicilo so mulimo wo kulavya vilavywa vye wanhu, i vilavywa vinyanywe hamonga ne vilavywa vyo mulamu. Nane nhondo ho nokwendezwa nanye wose, yo nene Muwaha Mulungu vyo nghutya.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.