Wutuluce 2
2
U wulelwe wa Musa
1Na mu madaha gago, munhu yunji wa mu mhuga ya Lawi, yakatola mucekulu we mhuga yiyo ya Lawi, 2Nayo yakamulelela mwana we cilume. Yali yeza kumuwona mwana yuyo vyono muswanu muno, yakamuhundika myezi midatu. 3Ninga yali yeza kuwona vyono si kosuma kujendelela kumuhundika kanyhi, yakasola litenga lyono lyali yihonwe ne madetelulenga, yakalihiliwa na lami hamonga ne ngholeko, yakamuwika yuyo mwana mugati, yakalisosomeka mu madete lulenga ha mwejelele we likolongo lya Nile. 4Nayo lumbulye lyo mwana yuyo, yakawa yamulindilize yemile cidaha, yalanjiliye cono comwijelela yuyo mwana.
5Ale baho, yakawa kuza u mwana we cicekulu wa Falawo ho yehovuje mumo mwikolongo, lono wetumami wakwe we cicekulu, wajendajendaga ha mwejelele we likolongo. Nayo yakaliwona kwa nhinicizo litenga yisosomece mugati ye madete lulenga. Yakamutuma mwitumami wakwe we cicekulu yakalisole yamuletele. 6Nayo yuyo mwana we cicekulu wa Falawo, yali yeza kuligubula litenga lilyo, yakamuwona mwana mugalika wa cilume mugati, yakulila. Yakamuwonela lusungu muno, yakatya, “Ayu yo yumonga we wana we Wahebelaniya.” 7Nayo lumbulye yo mwana yuyo yakamuwuza yakatya, “Wule, kokwenda nghakulondolele mucekulu we Cihebelaniya mono kosuma kukukoceza mwana yuyo?”
8Nayo yakapitula yakatya, “Heya, dedede, bite kanondolele.” Nayo muhinza yuyo yakamangha mbela mbela, yakamuleta u nyina yo mwana yuyo mugalika. 9Nayo mwana we cicekulu wa Falawo yakamutya yuyo mucekulu, “Gwe yaya, musolaje mwana yuyuno wukanyoseze, nane nokulipa.” Mucekulu yuyo yakamusola mwana no kumosa. 10Mwana yuyo yali yeza kuwa yawiluka, u mucekulu yuyo yakamutegula kuli mwana we cicekulu wa Falawo, nayo yakamubocela yakawa mwanagwe. Yakawa kumucemela litagwa lyakwe Musa, yakutya, “Vyono namunimula mu malenga.”
Musa yakutiziza ku Midiyani
11Nayo Musa lono yali yawiluka yawa munhu mututu, mwi'zuwa linji yakabita kuwalamusa wanduguze Wahebelaniya. Yakawona vyono Wamisili wawetumyaga no kuwadindimiza kwituma cifugwa fugwa. Kanyhi yakamuwona Mumisili yunji yakumutowa Muhebelaniya yunji muyagwe ne wanduguze za Musa. 12Nayo Musa yali yeza kulanga ako na ako, hamba kuwona munhu mono yamulanjiliye, hodu yakawa kumuzumhila yu yulya Mumisili yakawa kumuwulaga, yakawufuciza muwili wakwe mu musawawa. 13Ale, na mwi'zuwa lye kejete Musa yakabita kanyhi kuli wanduguze, na kuko yakawawona Wahebelaniya wejete wakwitowa. Nayo yakamulonjela yumonga wawo mono yali yo musutyi, yakamutya, “Alu nye wazelelo, nhawulenyi mukwitowa, nanye kumbe ho muli Wahebelaniya wose?”
14Munhu yuyo nayo yakamupitula yakatya, “Alu mwene 'gwe, mono yakuwicile nani wuciteme, na kanyhi wuwe mulamuzi muli sese? Hamba weza kusaka wumbulaje nane, nha vyono wukamuwulaga ayulya Mumisili lo?” Baho, Musa yakenjilwa na woga muno, yakatya, “Nye! Kumbe wanhu wakondya kuzimanya zono netuma.” 15Nayo Falawo yali yeza kuzihulika zizo zono Musa yetuma, hodu yakawa kwanza kumulondola Musa yamuwulaje.
Ninga Musa yakatiza yakabita kwikala ku yisi ya Midiyani. 16Ninga mwi'zuwa linji lono Musa yali yekaye he'sima, baho i wana mupunghati we cicekulu wa Lewuyeli mono kacemwaga Yetelo, u mukohani wa Midiyani, wakaza kunega malenga he'sima lilyo, wakamemya mapugu, ho wang'wese mitugo yo sogo yawo, zingholo ne zimhene. 17Wadimi wanji wakawawinga wawo wahinza. Ninga Musa yaza kuziwona zizo, yakabita kuwataziza, yakazing'wesa ne zimitugo zawo. 18Nawo wali weza kuwuya kuli Yetelo sogo yawo. Sogo yawo yakawawuza yakatya, “Alu nhawulenyi zuwali nha mwiyandila muno kuwuya?” 19Nawo wahinza wakamupitula sogo yawo wakatya, “Mumisili yunji kaciponya mu miwoko ye wadimi, kacinejela ne malenga, kazing'wesa ne zimitugo zetu.” 20Nayo Yetelo yakawawuza kanyhi wanagwe yakatya, “Alu munhu yuyo yali hayi mwene? Hamba nhawule kanyhi mumuleka kuko? Alu mubite mukamulete cilizane nayo zindigwa.” 21Musa yakavumila ku wikala baho, nayo Yetelo yakawa kumukombolela mwanagwe we cicekulu mono yacemwaga Zipola yamutole. 22Zipola yakamulelela Musa mwana wa cilume. Musa yakamucemela yuyo mwana litagwa lya Gelishomu, yakutuniliza yakutya, “Ane nili mutizizi mono yisi yiyi.”
23Na yali yeza kupuluta myaka minji, yuyo Falawo mutemi wa Misili yakafwa, ninga Waisilayeli wali wakali wajendeleye mu wuwanda, akuno wakulila, wakulondola wutazi. Cililo cawo cikamuficila Mulungu, 24nayo Mulungu yakacihulika cililo cawo, yakacikumbucila nhavivilya ne cilagane cakwe muli Abulahamu, na Isaka, na Yakobo. 25Yakawuwona no wuwanda we Waisilayeli, Mulungu yakawakamisa.
Currently Selected:
Wutuluce 2: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
