Wukumbucize wo Wulajilize 6
6
I lilajilizo liwaha
1“Na gagano go malajilizo gose gono Muwaha Mulungu, u Mulungu wenyu, yandajilize nimwijizenyi. Holeka mweze na cihuliko, kanyhi mugakamise muno, mumo mu yisi yono aluno mweza kwinjila no kuyisola yiwe yenyu. 2Nanye hamonga ne wana wenyu mweze muli cogopo kuli Muwaha Mulungu, u Mulungu wenyu, muwukamise wutemye wakwe malajilizo gakwe gono nghumulajilizenyi izuwali, mu vilo vyose vyo wikale wenyu, ho musume kwikala vilo vinji mumo mu yisi yiyo. 3Holeka mweze ne cihuliko anye nyo Waisilayeli, mugakamise muno malajilizo gakwe! Holeka mowa no wulugutwe, kanyhi mowa nghungugo ye vilungo muno muno. Nanye ho mosuma kwikala mu yisi yono yina moso, nha vyono Muwaha Mulungu, u Mulungu we walezi wenyu yehuwiza.
4“Anye nyo Isilayeli, ta mukumbucile! Muwaha Mulungu, yo Muwaha Mulungu yumonga du, yo Muwaha Mulungu wetu. 5Holeka mumwendaje Muwaha Mulungu wetu, kwe zinhumbula zenyu zose, na kwe mitima yenyu yose, na kwe vilungo vyenyu vyose. 6Kanyhi mulecele lukulu kugasemwa malajilizo gaga gono nghumulajilizenyi izuwali. 7Nanye mupiligale kuwejiza wana wenyu. Kanyhi mweze mupiligaye kuwejiza lono muli ha kaya, na lono muli mu mihinzo, na lono mwi'kaye mucehile, sunga na lono muli mu milimo yenyu. 8Kanyhi mugawope mu zimuhukumhuku ze miwoko yenyu, na haciligati ye meso, mu vihanda vyo wusu wenyu viwe nha citanjilo co kumukumbucizenyi nhondo zose. 9Kanyhi mugandice na mu fulemu ze milango ye zikaya zenyu, na mu malango ge ziluwa zenyu.”
Wusugulwe kuli zo wu wula cihuliko
10“Muwaha Mulungu, u Mulungu wenyu, komupelenyi yisi yono yina makaya mawaha, kanyhi maswanu muno, gono si mwagazenga nyenye nyo weneco, nha vyono yawehuwiza walezi wenyu, Abulahamu, na Isaka, na Yakobo. 11Ne zikaya zolowa zimemile vinhu viswanu vyono si mwavisawa nyenye. Kanyhi ne masima gono si mwagahimba nyenye nyo weneco, ne migunda ya zabibu na ye mizeyituni yono si mwayihadika nyenye nyo weneco. Na kolo Muwaha Mulungu yakondya kumwinjizenyi mu yisi yiyi, nanye muwe mwakondya kuvituga vinhu vyose vyono mowa kuhila kulya, 12mulanjilile, mulecele lukulu kumusemwa Muwaha Mulungu, mono yamuwusenyi ku wulawa ku Misili, kono mwali muli wawanda. 13Munojeye mweze ne cogopo kuli Muwaha Mulungu, u Mulungu wenyu, mumuhembe mweneco du yali wene, sunga no wihuwizo wenyu wose, mweze kuwunozeza mwi'tagwa lyakwe mweneco du. 14Mulecele lukulu kuhemba milungu yinji yoyose, ya muli milungu ye wanhu wono wamupilimenyi yono wakuyihemba. 15Na hono mwijelele du muyihembe milungu yinji, ale, likuwo lyo Muwaha Mulungu lyomuzizenyi nha moto mukali, nalyo lyomongomezezenyi lukulu. Hambi Muwaha Mulungu, u Mulungu wenyu mono yali haciligati yenyu, nha Mulungu mono si kosuma kwisumaniza na yunji wo wose.
16“Kanyhi mulecele lukulu kumujela u Muwaha Mulungu, u Mulungu wenyu, nha vyono mwanoza ha Masa. 17Holeka mwilanjililaje, mweze ne cihuliko, kanyhi mwibate wulajilize wakwe wose wono yamulajilizenyi. 18Kanyhi mweze kwituma zono Muwaha Mulungu yakuzilajiza, iziswanu na zo mugoloka. Na holeka mosuma kumoteswa muli zenyu zose, no kuyisola yisi yiwe yenyu, i yisi yono yina moso, yisi yono Muwaha Mulungu yawehuwiza i walezi wenyu. 19Kanyhi kowawinjila kutali i walugu wenyu, nha vyono yehuwiza.
20“Na mu vilo vyono vikuza, i wana wenyu hono wamuwuzenyi wawe kutya, ‘Alu ku sokoci Muwaha Mulungu yacilajiliza ciwukamise wulajilize wuwu wose?’ 21Nanye muwapitule mutye, ‘Ase cali cili wawanda wo mutemi Falawo ku yisi ya Misili, nayo Muwaha Mulungu yakaciwusa kuko kwe vilungo vyakwe viwaha. 22Nase cewonelela co weneco ne meso getu vyono yetuma mapoto, ne zinghani zo wogofye kuli Wamisili, no mutemi wawo Falawo, na kuli walongola wakwe wose. 23Muwaha Mulungu yakaciwusa kuko ku Misili, yakacileta sunga ho bahano, yakacipela ne yisi yiyi, nha vyono yawehuwiza walezi wetu vyono kocipela. 24Hanyuma ho Muwaha Mulungu, u Mulungu wetu, yakawa kucilajiliza vyono, yinojeye ciwukamise wulajilize wose, kanyhi cimupele mwene cogopo. Na hono citume nhavivyo, nayo koyidima nghungugo yetu, no kuyimotya. 25Na hono cizibate ko wihuwilwa zose zono Muwaha Mulungu yacilajilize, nayo kokwendezwa nase.’ ”
Currently Selected:
Wukumbucize wo Wulajilize 6: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
