Wukumbucize wo Wulajilize 15

Mwaka wo Mupunghati

(Lawi 25:1-7)

1“Mu mwaka wo mupunghati wa mu myaka yose, weze kuli'nye wo mwaka wo kuwalecela wanhu no kuyinenela migawa yose kuli wose wono anye mukuwadaya mapesa. 2Na yiyi yo munojeye mwitume nhavivyo. Munhu wo wose mono kowa yamukopeshe Mwiisilayeli muyagwe, hodu yalece kanyhi kumudaya, hamba yalece kwijelela kumudaya, hambi Muwaha Mulungu, u Mulungu wenyu, nha yo yatemizye zizo. 3Langa mosuma kuwadaya wajenzi vyono muwakopeshe. Ninga mulece kuwadaya vyono muwakopeshe wandugu zenyu Waisilayeli wayenyu.

4“Nayo Muwaha Mulungu komumotyenyi mu yisi yono yakumupelenyi. Na muli nyenye wose, hasina hamba monga mono kowa muciwa, 5hono mumuhulice mwene no kwibata zose zono nghumulajilizenyi izuwali. 6Nayo Muwaha Mulungu, u Mulungu wenyu, komumotyenyi muno, nha vyono yehuwiza. Anye yo mowa kuwakopesha we makungugo ganji menji, ninga hamba si motuga wanjile, wono womunozenyi nanye sunga mubite mu makungugo ganji ho mukakope kuli wene. Kanyhi mowatema we makungugo menji, ninga hasina hamba yikungugo limonga, lyono lyomutemenyi 'nye.

7“Na hono hawe hoyuli yunji muciwa muli wandugu zenyu Waisilayeli, mwi'kaya lyolyose lya mu yisi yenyu, yono yakumupelenyi Muwaha Mulungu, u Mulungu wenyu, ale, mulanjilile, mulece kuwa muli wakamu, hamba mulece kulema kumupela wutazi muyenyu yuyo. 8Langa munojeye mweze no lusungu, mumukopeshe mu nghango ye visakwa vyakwe. 9Kanyhi mulece kulema kumukopesha cono yakusaka, lunji mukutya vyono mwaka wo mupunghati wo kunenela wanhu migawa nha wuli behi kuza. Mulecele lukulu kuleceleza mahweso gago mabi gamuzizenyi mu zinhumbula zenyu. Na hono wuleme kumukopesha, nayo munhu yuyo komulilila Muwaha Mulungu ku soko yako, nagwe kowa wuli musutyi. 10Holeka viswanu muwapele ko mutima muzelu, nayo Muwaha Mulungu komumotyenyi mu milimo yenyu yose. 11Kanyhi mweze kumanya vyono, si moleka kuwa na wa muli wandugu zenyu Waisilayeli, wono wowa waciwa na wono wali mu wanjile. Holeka nghumulajilizenyi vyono, mweze no lusungu kuli wanhu we liwala lilyo.”

Vyono munojeye mwikale ne wetumami

(Wut 21:1-11)

12“Na hono nduguyo Mwiisilayeli we cilume hamba we cicekulu, yeguze mweneco kuli'gwe, yawe mwitumami wako, yikunojeye wumukombole, yalaza kuwa yafisa myaka mutandatu yo kukwitumamila. Kolo wafika mwaka wo mupunghati, hodu, wumukombole yabite. 13Na hono wukumukombola, wulece kumukombola yabite yali mawoko. 14Langa yikunojeye wumupele kulawa muli vyono Muwaha Mulungu yakumotizye, muli ze zingholo, no wuhemba, ne divayi. 15Mweze kukumbucila vyono, nanye mwali muli wawanda ku Misili, ninga Muwaha Mulungu yakamukombozenyi no kumuwicenyi welecele. Na yiyi yo soko yono yikuleka nane nghumulajilizenyi lilajilizo lili. 16Ninga hono mwitumami wako yalece kwenda kuwuka baho hako, vyono yakwendile gwegwe, hamonga ne mhuga yako, nayo yawe yakuhila kujendelela kwikalana nagwe. 17Ale, wumusole wumuwice ha cipimbilamulango ce kaya yako, wumutobole likulu no muhonelo. Nayo alu, kowa mwitumami wako sunga ko ku wufwe wakwe. Ne wetumami we cicekulu, muwatendele nawo nhavivyo. 18Hamba wulece kuwona vikamu kumukombola mwitumami, hambi nha yakondya kukwitumamila myaka mutandatu, nusu ye cifo cono wali wumulipe mwitumami wo musahala. Mweze kunoza nhavivi, nayo Muwaha Mulungu komumotyenyi mu milimo yenyu yose.”

Zinyana zinongozi kulelwa ze zing'ombe na ze zingholo

19“Mweze kukumbucila kumuwicila Muwaha Mulungu, u Mulungu wenyu, zinyana zinume zinongozi kulelwa ze zing'ombe na ze zingholo zenyu. Mulece kuzitumamila ko mulimo wo wose zi mitugo zizi. Hamba mulece kuzicenyenha zingholo wukunzeje wazo. 20Nanye hamonga ne zimhuga zenyu, mweze kuzilila hali Muwaha Mulungu mwaka na mwaka, mweze kuzilila i hanhu ha wuhembelo. 21Ninga hono mutugo wunji wutuje cilema, lunji yiwe yikusenzegula, hamba yabofula, hamba lunji yiwe yina cilema co cose. Hodu mutugo wuwo, mulece kumulavizya Muwaha Mulungu, u Mulungu wenyu. 22U mutugo wuwo kosuma kuwulya gwegwe go mweneco baho ha kaya yako. Ne nyama yayo munhu wo wose du kosuma kuyilya, u mwavufywe na mono si mwavufywe, nha vyono wosuma kulya nyama ya nzela na ye haluzi. 23Ninga wulece kwitumamila sakami yazo nha ndigwa, langa wuyimwaje hasi du kotya malenga.”

Currently Selected:

Wukumbucize wo Wulajilize 15: LLKWW

Highlight

Compare

Copy