Wukumbucize wo Wulajilize 14

Wulemezwe we makani gono si ganojeye ga mu vililo

1“Kanyhi anye muli wanhu wo Muwaha Mulungu, u Mulungu wenyu. Holeka lono muli mu vililo ku soko ya wono wakondya kufwa, mulece kwisalanga masale mu miwili yenyu, hamba kwisilula mu vihanda vyo wusu wenyu, nha vyono wanhu wanji wanozaga. 2Anye muli wanhu wo Muwaha Mulungu, u Mulungu wenyu. Nayo Muwaha Mulungu yamuhagulenyi muwe wanhu wakwe mu wulawa mu wanhu wose wono wekaye mono yinze.”

I malimu mavufywe na gono si mavufywe

3“Mulece kulya cinhu cocose cono Muwaha Mulungu yakondya kucilemeza, vyono cinhu cico cavufywe. 4Langa malimu agano ahano go mosuma kulya. Ng'ombe, ngholo, mhene, 5haluzi, nzela, nyonganyonga, mhene ya mu mbago, ne dishoni, ne nhongolo, ne limuhanga. 6Ne nimu yoyose yono yikwasanuce mabangho gayo kanyhi yono yikusindula. 7Langa malimu aga, ngamiya, sungula ne mhimbi, hamba ziwe zina mabangho gakwasanuce kanyhi zikusindula, mulece kuzilya, hambi nha nyavufywe. 8Nayo ngubi hamba yiwe yikwasanuce mabangho gayo, ninga si yisindulaga yaye, holeka nyama yayo mulece kuyilya, hambi nayo, nha nyavufywe ku soko yiyo, hamba no mudunhu wayo mulece kuwupamiza.

9“Mawala gose ge zisomba za mwi'lenga, zono zina malebeto na zono zina makaka, azo mosuma kuzilya. Langa zono zisina malebeto hamba makaka, azo mulece kuzilya hambi nha nyavufywe ku soko yiyo. 10Mawala gose ge zindeje ziswanu, mosuma kuzilya.

11“Langa zindeje azi. 12Nyaciko, na mwacikwanghwala, ne fulugobe, 13Laha ne citema, ne limwewe ku hwani yavyo. 14Ne mahowe ku hwani yavyo. 15Ne nyacihema, ne maluwatu, ne lidudumizi ne mwewe ku hwani yavyo. 16Ne lituwi lidodo, ne lituwi liwaha, ne lituwi lye mahembe. 17Ne zinyamwala, ne zi'ndi, ne nyhinyinha. 18No mung'wa, ne mhuje, ku hwani yavyo, ne limukutwa, ne libudibudi. 19Hamonga na vyono vikutambala, na vye mabawa. Avi vyose mulece kuyilya, hambi nha vyavufywe. 20Ninga zindeje i ziswanu, azo mosuma kuzilya. 21Kanyhi mulecele lukulu kulya nyama ya nimu yoyose yono yifwiliye yeneco. Langa mosuma kuwaleka i wajenzi wono mwikalane nawo wo wayilye, hamba mosuma kuyiguza kuli wanya makungugo. Hambi anye nha muli wanhu wo Muwaha Mulungu, u Mulungu wenyu, muli wanhu wakwe. Kanyhi mulece kusola nyama ye nyana ye ngholo, hamba ye nyana ye mhene no kuyitelecela mu mele ge nyina yayo.”

U wulajilize ku so zaka

22“Mweze kukumbucila kuwika ha mhelo zaka zenyu, nha cinji monga kwe 'kumi ya mu vilimwa vyose vyono mukutuga mwaka kwa mwaka mu migunda yenyu. 23Muwe kuvitegula i hanhu hono Muwaha Mulungu, u Mulungu wenyu, yahahagula hawe ho hanhu ho kumuhembela mwene. Nanye baho ho mweze kulila hali mwene, zi zaka zenyu zo wuhemba, na ze divayi, ne mafuta. Hamonga ne zinyana zinongozi kulelwa ze zing'ombe zenyu na ze zingholo zenyu. Mweze kwituma nhavivi, ho musume kwiyijiza vyono yinojeye, mumupele cogopo nhondo zose Muwaha Mulungu, u Mulungu wenyu. 24Na hono yiwe i hanhu ho wuhembelo hali kutali muno, ku wulawa ha zikaya zenyu hono mwikaye, mu nghango yono si mosuma kuvidinghula vye zaka ku wulawa mu vilimwa vyono Muwaha Mulungu, u Mulungu wenyu kamumotyenyi.

25“Ale mosuma kuviguza vyose, muzitegule zipesa ze cifo cazo ku hanhu ho wuhembelo. 26Nanye kolo mweza kufika kuko, mosuma kugula mu zipesa zizo, cocose cono mowa mwendile nyenye, hono ng'ombe, hamba ngholo, hamba divayi hamba cocose cono wendile gwegwe. Nagwe kosuma kulya hali Muwaha Mulungu, u Mulungu wako, nagwe kosangalala, gwegwe hamonga na we mhuga yako yose. 27Ninga mulanjilile, mulecele lukulu kuwasemwa i Walawi wono mwikalane nawo mu makaya genyu, hambi nha wasina ligawo lyawo lyolyose. 28Na mu ndumilizo yo mwaka we kadatu wa mu myaka yose, mweze kumbucila mumulavizye Mulungu zaka ya mu vilimwa vyenyu vyose, muvitajile mu madongha gono mowa mugawicile mu makaya genyu gose. 29Ne ndigwa yiyo, yowa so Walawi. Hambi wene nha wasina sawo yinji yo yose. Kanyhi ndigwa yiyo yiwe so wajenzi, ne wana wono wasina walezi wawo, ne wacekulu wafwile, wawo wose wono mwikalane nawo mu makaya genyu. Kolo wakumuzizenyi, nanye muwapele visakwa vyawo. Mweze kunoza nhavivi, nayo Muwaha Mulungu komumotyenyi mu milimo yenyu yose.”

Currently Selected:

Wukumbucize wo Wulajilize 14: LLKWW

Highlight

Compare

Copy