Matayo 26
26
U wihehe wo kumuwulaga Yesu
(Mlk. 14:1-2; Lk. 22:1-2; Yoh. 11:45-53)
1Nayo Yesu yaza kukondya kuzilonga zizo zose, yakawalonjela iwejizwa wakwe, yakawatya, 2“Mumanyile vyono, vilawa vyeza kupuluta vilo vyejete cowa mwizuwa lye sikukuu ya Pasaka, no Mwana wo Munhu kolavywa ho yatumbikwe mu musalaba.”
3Na mwipango lilyo i Wakohani wawaha hamonga ne wanyamhala we wanhu, waketangʼanila hamonga mwikumbo lya Kayafa, Mukohani Muwaha. 4Wakalongana weneco wose wakulondola i nzila yo kumwibatila Yesu ko wusugu, ho wamuwulaje. 5Ninga hamba nha vivyo, si wakasaka inghani yiyo ho yitumwe mwipango lye Sikukuu, ho halece kuwa wuma muli wanhu.
Yesu yakubakwa mafuta ku Betaniya
(Mlk. 14:3-9; Yoh. 12:1-8)
6Nayo Yesu lono yali yali kuko ku Betaniya, mu nyumba ya Simoni mono kacemagwa Mukoma, 7hakawa na mucekulu yunji mono yali yena supa ye mafuta ge mhunjile swanu muno go wuguzi wukamu muno, yakamuziza Yesu lono yali yekaye ha meza ha wulye we zindigwa, yakamujidila mu mutwe gago i mafuta maswanu. 8Nawo i wejizwa wakwe waza kuziwona zizo, wakasimba muno wakatya, “Alu wambuce wose wuwu wa cici?” 9Imafuta gaga, gali gasume kuguzwa ko wuguzi wuwaha, ne waciwa wapegwe izipesa zizo. 10Yesu yakagamanya i mahweso gawo, holeka yakawatya, “Alu nhawule mukumugaza u mucekulu yuyu? Mwene kunyitumamila mulimo muswanu muno muno. 11Iwaciwa mwina nawo nhondo zose, ninga ane si nowa hamonga nanye nhondo zose. 12U mucekulu ayu, kanjidila mafuta, so wuwikanizwe we maziko gangu. 13Nghumulonjelenyi mbeka, vyono ho hose mono yinze yiyino, hono lowa kuganulwa u Luganuzi Luswanu, ilitumo lilino lyono yetumile u mucekulu yuyuno, lyowa kulongwa so kumukumbucila mwene.”
Yuda yakulamula kumugaluka Yesu
(Mlk. 14:10-11; Lk. 22:3-6)
14Hanyuma ayulya Yuda Isikaliyota muyagwe na awalya we likumi na wejete, yakabita kuli Wakohani wawaha, 15yakawawuza yakutya, “Alu momhela cinhuci ho nimukombolelenyi Yesu?” Nawo wakamuwalila pesa makumi madatu, 16hodu mwene Yuda kulawa lulo baho, yakawa yakulondola icilejeho co kumugaluka.
Yesu yakunoza indigwa ye Pasaka hamonga ne wejizwa wakwe
(Mlk. 14:12-21; Lk. 22:7-14, 21-23; Yoh. 13:21-30)
17Na mwizuwa lilongozi, lono lyali likali lizuwa lye sikukuu ye mikate yono siyisasize iwejizwa wakwe, wakamubitila Yesu, wakamuwuza wakutya, “Alo wukusaka cikutenjele hanhuci i sikukuu ye Pasaka?” 18Nayo yakawapitula yakawatya, “Mubite mwinjile Mwikaya, ku kaya ya nhendu, mukamutye, Mwijizi yakutya, icipango cangu cafika, holeka ane hamonga ne wejizwa wangu, coyinozeza i sikukuu ye Pasaka mu kaya yako.” 19Nawo i wejizwa wakwe, wakanoza nha vyono Yesu yawalajiliza, wakayitenga i ndigwa ye Pasaka. 20Na lono yali yeza kuwa cinyamihe, Yesu yakekala ha meza, hamonga ne wejizwa wakwe ikumi na wejete. 21Na lono walizaga, Yesu yakawatya, “Ane nghumulonjelenyi mbeka, vyono u muyenyu yunji muli nyenye, kongaluka.”
22Iwejizwa wakakalala muno muno, hodu wakawa kwanza kuwuza yumonga yumonga wakutya “Ati, Muwaha, wukwihwesa yowa nene?” 23Ninga Yesu yakawapitula yakawatya, “Yuyo mono cililizane nhonje hamonga na nene mu ciya ce mboga, ale yo yuyo mono kongaluka. 24Heya u Mwana wo Munhu yakubita, nha vyono i Mandiko Gono Gelile gakulonga, ninga woyi he, kuli munhu yuyo yali yiwe yili ciba hono yali yalece kulelwa.” 25Ale, nayo Yuda yakamuwuza, yakutya, “Ati Mwijizi, alo wukwihwesa kowa nene?” Nayo Yesu yakamupitula yakamutya, “Agwe langa kulonga.”
I ndigwa yo Muwaha
(Mlk. 14:22-26; Lk. 22:14-20; 1 Kol. 11:23-25)
26Na lono walizaga, Yesu yakawusola mukate, yakalumba, yakawubegula, yakawapela iwejizwa wakwe akuno yakutya, “Ale solenyi mulye, awu wo muwili wangu.” 27Hanyuma kanyhi, yakasola cikombe, yakamulumbo u Mulungu, yakawapela, akuno yakutya, “Ale, mungʼwe wose, 28hambi ayi nha yo sakami yangu yono yikukangaza i cilagane co Mulungu, isakami yono yikwitika ku soko yo kuwanenela i wanhu wubi wawo. 29Ane nghumulonjelenyi nha vyono si nongʼwela lukulu idivayi ye zizabibu, sunga mwizuwa alilya lyono nilangʼwela idivayi yimhya hamonga nanye mu Wutemi wa Baba.”
30Wali weza kukondya kwimba lwimbo, hodu wakawa kutuluka wakawa kubita kwitunda lye Mizeyituni.
Yesu yakulonga nha vyono Petelo komukana
(Mlk. 14:27-31; Lk. 22:31-34; Yoh. 13:36-38)
31Hanyuma Yesu yakawatya, “Icilo cici ce zuwalili, anye wose motiza mondeka nili wene, hambi i Mandiko Gono Gelile nha gakutya,
‘Nomutowa u mudimi,
Nazo izingholo zokwiyagala.’
32Ninga nila neza kuzuka, ale nomulongolelenyi ku Galilaya.” 33Petelo yakamutya Yesu, “Hamba wose wawe na mahwele ku soko yako, no kutiza, no kukuleka, ninga ane hamba si nokulecela lukulu.” 34Yesu yakamutya “Petelo, ane nghukulonjela mbeka, vyono i cilo ce zuwalili du, lono i nzongolo yikali si nalila, agwe kowa wanghana kali kadatu.” 35Nayo Petelo yakamutya, “Hamba hono yiwe yinojeye nifwe hamonga nagwe, ane langa, hamba si nokulecela lukulu.” Ne wejizwa awalya wanji wose, nawo wakalonga nha vivyo.
Yesu yakulomba mu busitani ya Getisemane
(Mlk. 14:32-42; Lk. 22:39-46)
36Hanyuma Yesu yakawa kubita nawo sunga ku busitani ya Getisemane, yakawalonjela iwejizwa wakwe yakatya, “Ale mwikalaje bahano, nane mbite hamwande hadodo nghalombe.” 37Yakawasola wa Petelo hamonga ne wana wejete wa Zebedayo, yakawa kwanza kuwona wuzinguce hamonga no wugazice mu nhumbula yakwe. 38Yakawalonjela yakawatya, “Ane nina wukalale wuwaha mu nhumbula yangu, behi no kufwa. Holeka mwikalaje baha meso hamonga nane.” 39Hanyuma yakatela tela hamwande hadodo, yakagwa funama, yakalomba, yakutya, “Gwe Baba, hono yiwe yisumice, ale icikombe cicino co wusungu cimhulutaje, ninga yilece kuwa nha vyono nyendile nene ngʼo, langa yiwe nha vyono wendile du gwegwe.” 40Yakawabitila i wejizwa wakwe, kumbe, yakawagana wagona. Yesu yakawa kumutya Petelo, “Alu hongo si musumile kwikala meso hamonga nane hamba saa monga du bwete? 41Ale mwikalaje meso akuno mukulomba ho mulece kwinjila mu wujelwe. Mbeka nhumbula yendile ninga muwili wusoceye.”
42Yakabita kanyhi lwe kejete yakalomba yakutya, “Baba hono yiwe si yisumice icikombe cicino co wusungu cimhulute ndece kucigʼwa, ale, hodu, u wuhile wako witumwe.” 43Yakawabitila iwejizwa wakwe, yakawagana kanyhi wagona, hambi i meso gawo nha gali gebatwe na nhongo.
44Hodu, yakawa kuwaleka, yakabita kanyhi, kulomba lwe kadatu, yakulonga izinghani zizilya du. 45Hanyuma yakawabitila wawalya wejizwa yakawatya, “Wulenyi, alu mukali mugonile du no kuceha? Lanjenyi ta! Alu icipango ceneco langa ho cafika, no Mwana wo Munhu kolavywa kuli i wanhu wanyo wubi. 46Holeka alu mwinukaje cibite. Lanjenyi ta, ayulya mono kongaluka yalawila.”
Yesu yakwibatwa
(Mlk. 14:43-50; Lk. 22:47-53; Yoh. 18:3-12)
47Nayo Yesu lono yali yakali kulonga nawo, hobaho nayo Yuda yakawa kuza u muyagwe na awalya we likumi na wejete. Wakaza wanhu wenji wali hamonga nayo, nawo wali wena, ne mimaje ne zinhumbi, wono watumwa kulawa kuli wakohani wawaha ne wanyamhala we wanhu. 48Nayo yuyo mono yasakaga kumugaluka Yesu, yali yakondya kuwapela icitanjilo yakutya, “Yuyo mono nomunonela, ale, yo yuyo, yo mumwibataje.” 49Hobaho Yuda yakamusejelela Yesu, yakamutya, “Lamucenyi, Mwijizi!” Hanyuma yakawa kumunonela. 50Nayo Yesu yakamuya, “Gwe muyangu, witumaje du cono wuzize kwituma.” Baho i wanhu wawalya nawo, wakawa kuza wakawa kumwibata Yesu.
51Yumonga naʼwalya wono wali wali hamonga na Yesu, yakagolola muwoko wakwe, yakawusomola mumaje wakwe, yakamutowa u mwitumami wo Mukohani Muwaha yakamubuha likutu. 52Baho Yesu yakamulonjela yakutya, “Leka ta, wugomolaje u mumaje hanhu hayo, hambi muli wose mono yakwitumamila mumaje nha kolofwa nayo na mumaje. 53Wulenyi, si mumanyile vyono ndahile kumulomba Baba, nayo kosuma kundetela lwa kamonga, mapuga ikumi na mejete ge wamalayika? 54Ninga alu, ho goficilicila nhawule i Mandiko Gono Gelile, gono gakutya, nha vivyo vyo yinojeye yiwe?”
55Lo lulo lulo, Yesu yakawa kulilonjela ilipuga lye wanhu wono wazaga ho wamwibate, yakawatya, “Alu mwene ho muza kunyibata akuno mwina ne mimaje ne zinhumbi, kotya ane nha nili muhizi? Alu ane, nha nhondo zose nali kuwezaga hamonga nanye mu Nyumba yo Mulungu nghwijiza, nanye kumbe hamba si mwanyibata! 56Ninga azi zose ziwa nha vivi, ho i Mandiko ge wawizi gaficilicile.” Hanyuma iwejizwa wakwe wose wakamuleka wakatiza.
Yesu yali he balaza
(Mlk. 14:53-65; Lk. 22:54-55, 63-71; Yoh. 18:13-14, 19-24)
57Hodu, iwanhu wawalya wono wamwibata Yesu, wakamutegula sunga ku kaya ya Kayafa, Mukohani Muwaha, kuko kono wali wekongholeye i wejizi wo Wulajilize ne Wanyamhala. 58Nayo Petelo yakawa yamutyatyizye Yesu kwa kutali, sunga vikenjilana mwikumbo lyo Mukohani Muwaha, nayo yakenjliana hamonga ne walindilizi, ho yasume kuziwona zose vyono zowa zinha.
59Hodu i Wakohani wawaha ne libalaza lyose, wakalondola wuhomelezi wo wulambi kuli Yesu, ho wamuwulaje, 60ninga hamba nha vivyo, si wasuma kuwutuga wuhomelezi wo wose, hamba yiwe wakaza wahomelezi wenji wo wulambi. Ha ndumilizo wakawa kuza wahomelezi wejete, 61wono watya, “U munhu ayu, yalonga yakatya, ati, ‘Ane nosuma kuyimwagula i Nyumba yo Mulungu, no kuyizenga kanyhi mu vilo vidatu du.’ ” 62Hobaho u Mukohani Muwaha yakema yakamuwuza Yesu yakutya, “Ati gwe, si wukupitula hamba nghani hongo? Alu i wanhu wawa wakuhomelela nghanici kuliʼgwe?” 63Ninga Yesu yakanyamala twii du. Nayo u Mukohani Muwaha yakamutya, “Nghukwilahiza kuli u Mulungu mumi, wucilonjelaje hono yo gwegwe Kilisito u Mwana wo Mulungu!” 64Yesu yakamutya, “Nha kulonga gwegwe! Ninga nghumulonjelenyi mbeka, vyono kulawa lulu momuwona u Mwana wo Munhu yekaye ku lubavu lo kulume lo Mulungu u Mudaha vyose, yakuziza mu mavunde go wulanga.”
65Baho nayo Mukohani Muwaha yakavidemulanga i vivwalo vyakwe akuno yakutya, “Katovula! Alu cina sokoci kanyhi yo kusaka wahomelezi? Nha muhulika nyo weneco i zinhovu zakwe. 66Alu anye, mukuwona nhawule?” 67Iwene wakapitula wakatya, “Yimunojeye yafwe!” 68Hanyuma wakawa kumufunyila mate mu wusu wakwe, kanyhi wakamutowa ne makofi. Na wanji wamutowaga makofi, akuno wakulonga wakutya, “Ale ta wucitambulilaje, agwe nha wuli muwizi, agwe Kilisito, mono yakutowile lu nani?”
Petelo yakumukana Yesu
(Mlk. 14:66-72; Lk. 22:56-62; Yoh. 18:15-18, 25-27)
69Nayo Petelo yali yekaye hadeha mwikumbo. Hobaho u mwitumami yunji we cicekulu, yakamubitila, yakamutya, “Agwe nagwe wali wuli hamonga na Yesu wa ku Galilaya.” 70Nayo Petelo yakakana hamwande ya wose yakutya, “Ane si niyimanyile hamba hadodo yono wukuyilonga.” 71Nayo Petelo lono yalawilaga ha mulango, u mwitumami yunji kanyhi we cicekulu yakamuwona, nayo yakawalonjela awalya wono wali wali baho, yakawatya, “U munhu ayu nye, yali yali hamonga na Yesu wa ku Nazaleti.” 72Nayo Petelo yakakana kanyhi, akuno yakwilahiza, yakutya, “Ane si nimumanyile u munhu yuyu ye!” 73Hanyuma kanyhi hadodo iwanhu wono wali wali baho, wakamubitila Petelo, wakamutya, “Ninga mbeka nagwe wuli muyagwe na wawo, ku soko imilonjele yako yikukulajila.” 74Ale baho nhondo, Petelo yakanza kwilijita no kwilahiza, yakutya, “Ane si nimumanyile u munhu yuyo ye.” Hobaho nayo inzogolo nhondo yikawakulila. 75Nayo Petelo, hobaho yakazikumbucila izinghani zono yalonjelwa na Yesu yakumutya, “Lono inzogolo yikali si yinalila, agwe Petelo kowa wakondya kunghana kali kadatu.” Hobaho yakalawila kunze yakalila muno muno.
Currently Selected:
Matayo 26: GOG91
Highlight
Share
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.