Matayo 25
25
I cihwanicizo ce wahinza ikumi
1“Lulo baho, u Wutemi wa ku wulanga wolokwihwananizwa ne wahinza ikumi wono wasola zitala zawo, wakawa kubita kumuhinjliiza bwana halusi. 2Muli wahinza wawo ikumi, mwali mowali wahinza wahano wono wali walele, na wahano wanji, wali we mahala. 3Wawalya i wahinza wahano iwalele, wasola izitala zawo du, hamba kuteguliza ne ciwutwa ce mafuta ge tala. 4Ninga awalya wahano we mahala, wasola ne ciwutwa ce mafuta ge tala, hamonga ne zitala zawo. 5Alu, vyono bwana halusi yacela kuwuze, hodu iwahinza wawalya wose wakawa kusinzila, wakawa kugona nhongo. 6Ale, mucilo mugati kukawa ne zozo yiwaha, Ale, ale! Bwana halusi kalawila, ale mubite mukamuhinjilize. 7Ale du baho, wawalya i wahinza wose wakenuka, wakawa kwanza kuzinozeleza i zitala zawo. 8Awalya iwalele, wakawatya awalya we mahala, ‘Nye wayetu, ta mucigawilaje nase mafuta genyu madodo, hambi izitala zetu nha zikuzima.’ 9Ninga awalya we mahala, wakawatya, ‘Sigocikwila anye na sese! Ciba hono mubite kwiduka mukegulile nyo weneco!’ 10Ale, baho kunyuma bwana halusi yakawa kuza, awalya i wahinza wono wali wewikanizize lukulu, wakawa kwinjila hamonga na bwana halusi mu nyumba ye halusi, no mulango hodu, wukawa kudindwa. 11Hanyuma awalya i wahinza wanji nawo, ho wakawa kuza, nawo wakamula kucema wakutya, ‘Muwaha, Muwaha, wucidigulile.’ 12Ninga u mwene yakawapitula yakatya, ‘Nghumulonjelenyi mbeka, vyono ane si nghumumanyenyi.’ ” 13Baho Yesu yakawatya, “Holeka munojeye mwikalaje meso, hambi nha si mumanyile ilizuwa hamba cipango.
I cihwanicizo ca wetumami wadatu
(Lk. 19:11-27)
14“Yowa nha vyono u munhu yunji, mono yasaka kubita muhinzo wa kutali, mono yawacema iwetumami wakwe, yakawapela i zisawo zakwe wazikamise. 15Nayo yakawapela munhu mu nghango ye mahala gakwe, u mulongozi yakamupela silinje elufu makumi mejete neʼhano, na we kejete yakamupela silinje elufu ikumi, nayo we kadatu, yakamupela silinje elufu yihano, hodu u mwene yakawa kutuluka. 16Ale, yuyulya mono yapegwa i zisilinje ze elufu makumi mejete neʼhano yakazinozeza wusuluza, sunga yakatuga cambuzi ca silinje zinji elufu makumi mejete neʼhano. 17Ayulya nayo nha vivilya mono yapegwa zisilinje elufu ikumi, nayo yakatuga cambuzi ca silinje elufu ikumi. 18Ninga ayulya mono yapegwa zi silinje elufu yihano, mwene yabita yakahimba ikombo mu muhangha, yakayifuciza i sawo yo muwaha wakwe.
19“Vyaza kupuluta vilo vicefu, u muwaha yuyulya yakawuya, yakawa kwanza kulanga liwalo lye zipesa zakwe u witumamilwe sunga no wutuje wayo. 20Ale yuyulya u mwitumami mono yapegwa zisilinje ze elufu makumi mejete neʼhano, yakaza akuno yaleteleze hamonga na azilya ze elufu makumi mejete neʼhano zono yazituga ze cambuzi, yakamutya, ‘Muwaha, wamhela silinje makumi mejete neʼhano du, ninga wulanje, ahano nina zinji kanyhi elufu makumi mejete neʼhano ze cambuzi zono nazituga.’ 21U Muwaha wakwe nayo yakamutya, ‘Ale viswanu, wuli mwitumami muswanu, kanyhi wuli mwihuwilwa. Wali mwihuwilwa mu nghani ndodo, ninga alu nokupela zimbaha kuciza. Ale wuze wasangalalane hamonga no muwaha wako.’ 22Ayulya nayo mwitumami mono yapegwa zisilinje elufu ikumi, nayo yakaza, nayo yakalavyaniza silinje zinji elufu ikumi ze cambuzi cono yatuga nayo, yakatya, ‘Muwaha ane wamhela silinje elufu ikumi, lanje azino zinji elufu ikumi ze cambuzi cono natuga.’ 23U Muwaha wakwe yakamutya, ‘Ale viswanu wuli mwitumami muswanu kanyhi mwihuwilwa. Wali mwihuwilwa muli nghani ndodo du, alu nokupela i zimbaha zono zicizize zizi. Ale wuze wusangalalane hamonga no muwaha wako.’ 24Ninga ayulya mono yapegwa i silinje elufu yihano, nayo yakaza yakatya, ‘Muwaha ane manyile vyono agwe wuli munhu mukamu, agwe kududulaga hono si wuhadice, kanyhi, kukunyanjilaga hono si wamiza. 25Holeka ane nghawa kogopa, nghawa kuzihundika i zipesa zako mu muhangha. Holeka ale wusole sawo yako.’ 26Nayo u Muwaha wakwe yakamupitula yakamutya, ‘Lanje ta gwe waco go mwitumami mubi kanyhi mudoba! Wali wumanyile vyono ane ndudulaga hono si hadice, kanyhi na vyono nghongholaga hono si namiza mbeyu. 27Holeka lu, yali yikunojeye wuyiwice sawo yangu ku benki, nane nali sole sawo yangu hamonga ne cambuzi cayo. 28Holeka mumubokaje zipesa zizo, mumupele ayulya mono yena zisilinje elufu makumi mejete neʼhano. 29Hambi mono yena cinji nha kopegwa no konjelezwa kuciza. Ninga ayulya mono yasina cinji, nha kosolelwa sunga na cico cono yena naco. 30No mwitumami yuyu mono yasina cambuzi, mumutagaje ku citi kunze! Kuko kowa kocili cililo no wugwezula meno.’
U wulingʼanizwe we ndumilizo
31“Mu cipango cono kolokuziza u Mwana wo Munhu mu lukumyo lwakwe yena hamonga ne wamalayika wakwe, ale baho ho yalekala mwigoda lyakwe lye nhojo, lyo lukumyo. 32Ne makungugo gose golokwikongholela hali mwene, nayo kolowatemanula iwanhu, nha vyono u mudimi kazitemanulaga izingholo lwayo, ne zimhene lwayo. 33Nayo koziwika i zingholo ku lubavu lo muwoko wakwe wo kulume, ne zimhene ku lubavu lwakwe lo kucekulu. 34Hanyuma u mutemi ho kowalonjela awalya wono wali ku lubavu lo muwoko wakwe wo kulume yakutya, ‘Muze anye mono mwalugutizwa na Baba, mubocele u Wutemi wono mwawikanizizwa kuwulawa wuwumbwe we yinze. 35Hambi nha nali ndabuce, nanye mukamhela ndigwa, nali nghaluce, nanye mukamhela malenga, nali mujenzi, ninga anye mukambocela, 36nali sawuce, anye mukamvwika, kanyhi nali nhamigwe, mukaza kunanga, nali nili mu jela, nanye mukaza kunamusa.’ 37Baho, nawo wawo iwanhu waswanu womupitula u mutemi, wawe kutya, ‘Alu Muwaha, ho ha nili, lono cakuwona agwe wudabuce, nase cikakulisa ndigwa, hamba nili lono wali wukaluce nase cikakungʼwesa malenga? 38Na nili lono cakuwona agwe wuli mujenzi, nase cikakubocela, hamba wusina myenda, nase cikakuvwika? 39Hamba nili lono cakuwona wutamigwe, hamba lunji wuli mu jela, nase cikaza kukulanga?’ 40Nayo u Mutemi kowapitula yawe kutya, ‘Mbeka nghumutyenyi, vyono co cose cono mwamutendela yumonga muli wawa i wandugu zangu wadodo, ale, mwanhendela nene.’
41“Ale, baho ho kowalonjela na awalya wono wali ku lubavu lwakwe lo kucekulu yawe kutya, ‘Ale, mbucilenyi anye mono mwalijitwa! Bitenyi mu moto we cibitilila wono wawicilwa Setani ne wamalayika wakwe. 42Hambi nha nali ndabuce hamba si mwamhela ndigwa, nali nghaluce, hamba si mwamhela malenga. 43Nali mujenzi, hamba si mwambocela, nali nhamigwe, kanyhi nali mu jela, ninga hamba si mwaza kunanga.’
44“Baho nawo womupitula wawe kutya, ‘Muwaha, alu lo lwa nili lono cikakuwona wudabuce, kanyhi wina nyhilu, kanyhi nili lono wali mujenzi hamba wusawuce, na lono wali wutamigwe, hamba wuli mu jela, nase si caza kukwitumamila?’ 45Nayo kowapitula yawe kutya, ‘Nghumulonjelenyi mbeka, vyono bahalya du lono mwalemela kumutendela nghani zizi yunji wo wose wa muli wawa i wadodo wangu, ale, mwalema kunhendela nene.’ 46Holeka iwanhu wawa, wolotegulwa ku wulipicizwe we cibitilila, ninga awalya waswanu, awo wopegwa u wumi we cibitilila.”
Currently Selected:
Matayo 25: GOG91
Highlight
Share
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.