VAROMA 9
9
Lusoyoyo lwakwe Paulo he kusaitikija kwa Vayuda
1Niteta idi he Kristo, siteta mongo, izii langu la ngoro lekinitetia vunwa he Mpeho Wedi, 2iti nina lusoyoyo lubaha na kiwajo chesisia he ngoro. 3Ambu mi mwenye nekiveiwa kuomba iti nizirwe na kutanywa ne Kristo, vuntu vwa vandughu vangu, mbari yangu he Kristo, vuntu vwa vandughu vangu, mbari yangu he kimwiri; 4evo Vaisraeli, veghoshijwe vana ni ila ngazo na viaghano, na kuinkwa myomongwa na vutasi vwa Mrungu na viravo vyakwe; 5evo vaku vavo, na hevo hakafuma Kristo, he nzia ya kimwiri. Niye eho wanga he vintu vyose, Mrungu ekazwa kae na kae. Amen.
Viariro vya Mrungu tevinavuka
6Si iti kiteto cha Mrungu chavuka. Ambu si vose e va lukolo lwa Israeli veoka Vaisraeli. 7Neri vose teveoka vana kwa kuti ni va lukolo lwakwe Abrahamu, esire: “Va kwa Isaki, nivo veneitangwa lukolo lwako;” 8nikwo kuti, si vana va kimwiri e vana va Mrungu, mira ni vana va kila kiravo vetarwa kuoka lukolo. 9Ambu kiteto cha kiravo ni iki: “He igheri sa ili nineza, ne Sara eneketa mwana.” 10Neri si icho du, mira ne Rebeka naye, ekikenja kutika ndeni he ula mmwe eye vava wetu Isaki, 11ambu hala vala vana vesinamoghwa, neri vesinaronga kintu chedi kana kivivi, nesa kikundire cha Mrungu cha kusaghura kikoloke, neri esi vuntu vwa mirongire, mira vuntu madunganyo a ula eitanga, 12etiwe huvu: “M’baha enemrongia mdori ndima.” 13Sa vuntu cheandikwe: “Namkunda Yakobo, mira Esau namdaa.”
Mrungu tena ibaa
14Iki tuti ze? He Mrungu hena ibaa? Icho hai! 15Ambu emvwirire Mose: “Ninemvoneia ula nemvoneia, ninemwondia ula nemwondia.” 16Iki kari ni huvo, si he kuidima kwa ula eenda kana ula edindika, esire he ula evoneia, eye Mrungu. 17Ambu maandiko eteta he mburi yakwe Farao, kuti: “Cheshigha nekikuvika ni iti nivonyeshe nzinya jangu hewe, izina langu libirikirwe he isanga lose.” 18Iki ra kakicha ni huvo, ye eenda kumvoneia emvoneia, na ye eenda kumghosha mkuji, emghosha mkuji.
Mrungu ni mretetia
19Kangi uneniti: “Hanini echeri eshagha? Ambu ni ani ekanana na kurekera kwakwe?” 20Hai! si huvo, We mntu; niwe ani wemgharusha Mrungu? Hamao, kila cheterumbwa, kimti ula ekirumbie: “Hanini wekinirumba huvu?” 21Kana mrevumba, h’ii, tena nzinya he ivumba, ibonge imwe la ivumba kurumba kintu chena shima, na kumwe kintu chesina shima? 22Ni kini ra, kakicha Mrungu he kuenda kuvonyesha oro yakwe, na kufunyirija nzinya yakwe, he kugumirija kubaha, ezizimije vila vya oro vyeringanywe iti vikondike, 23kangi nesa afunyirije ngazo yakwe mbaha he jila ntanu ja mbonea, ejiharehe too kae jikete ngazo; 24nivo va uswi etuitange, sire Vayuda du, mira hata Vakiisanga? 25Ni sa vuntu etetie he Hosea:
“Vala ese vantu vangu ninevaitanga vantu vangu,
Na mkunde wangu ula eseki mkunde wangu.” 26Kangi kineoka, hala hantu vekitiwe:
“Unywi temu vantu vangu,
Aho veneitangwa: ‘Vana va Mrungu ekalama.’” 27Yesaya naye etetie he Vaisraeli, ekiti:
Itaro la vana Israeli, nziaho ni sa mshangagha wa bahari, venekijwa ni vala veshele du.
28Ambu Mfumwa enekolosha mburi yakwe he isanga, ekiikenja na kuichwa.” 29Kangi sa vuntu Yesaya erongeteta:
“Nanga Mfumwa wa marivati tekitushighiie lukolo,
Twekioka sa Sodoma, twekifwanyanywa na Gomora.”
Cheshigha Israeli ekigwa
30Iki tuti ze? Iti vantu Vakiisanga vesiratera singisirya, veinkiwe singisirya; mira ni ila singisirya yefuma he mwitikijo; 31mira Vaisraeli vekiratera viziomo vya singisirya, tevefikiie kila kiziomo. 32Hanini? Ni hala vesikaratere he nzia ya mwitikijo, esire sa kwa nzia ya mirongire. Vakakwangwala he lila ibwe lehosha, 33sa vuntu cheandikwe:
“Rereha, nivika kula Sayuni, ibwe lekwangwaja na ikamba legusha;
Na ula emwitikija tekasonike.”
Currently Selected:
VAROMA 9: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
