VAROMA 10
10
1Vandughu, cho neendisha he ngoro yangu na he maombi angu nemwomba Mrungu, ni vuntu vwavo, iti vakijwe. 2Ambu nivatetia vuonwa iti vekudindia he Mrungu, mira si kwa icha. 3Ambu kila vesimanyije kitea cha Mrungu, na veenda kukonesha kitea chavo venye, tevekuvikie he kutetiwa ni kitea cha Mrungu. 4Ambu Kristo niye msirikijo wa viziomo, nesa ye emwitikija atarirwe kitea.
Kutarirwa kitea ni nzia shaa he vose
5Ambu Mose ekiandike mburi ya kitea chefuma he viziomo, iti, “Mntu eronga icho enekalama he vuntu vwacho.” 6Mira kila kitea chevonekia he mwitikijo, kiti huvu, “Usitete he ngoro yako, ‘Ni ani enekwea uko wanga?’ (nikwo kuti kumwete Kristo aha si), 7kana, ‘Ni ani enesea uko he nkoma?’ (nikwo kuti kumkweja Kristo wanga kufuma he vefwie).” 8Mira, eti ze? Kila kiteto kiho hafuhi nawe, he momo wako na he ngoro yako; iti, ni kila kiteto cha mwitikijo twebirikira. 9Ambu wekimzumira Mrungu na momo wako na kufunyirija iti Yesu ni Mfumwa, kangi wekiitikija he ngoro yako iti Mrungu emvushije he vefwie, niho wenekia. 10Ambu kwa ngoro mntu eitikija na kuvona kitea; na he momo ezumira na kuvona lukio. 11Ambu iandiko liti: “Kila emwitikija tekasonike.” 12Ambu Myuda na Mgiriki tevetekane; ambu ye uo ni Mfumwa wa vose, ni mzuri wa vose vala vemwiaghia; 13ambu, Kila eneitangwa izina la Mfumwa, enekia. 14Ingeri venemlanga ze ula vesimwitikije? Kangi, venemwitikija ze ula vesinamsikia? Kangi vamsikie ze hesina m’birikiji? 15Kangi veneidima ze kubirikira vesitumiwe? Sa vuntu cheandikwe: “Ni edi sani maghu a val vebirikira mburi ya vyedi!”
16Mira si vose vezumira mburi yedi. Ambu Yesaya eti, “Mfumwa, ni ani eitikije mburi jetu?” 17Heicho mwitikijo uvokia he kusikia; kusikia nakwo kuetwe ni kiteto chakwe Kristo. 18Mira niti, Kana vo tevesikie? Yee, vesikie,
“Izii lavo lagisha he masanga ose,
Na viteto vyavo mhaka mginto wa masanga.” 19Mira niti: Kana Vaisraeli tevetwarije? Kuvoka Mose eti:
“Ninevagera kiru kwa vantu eseyo mbari,
Ninevakweja oro kwa mbari yesitwarija.” 20Yesaya ena uguguti m’baha, eti:
“Nevoniwe ni vala vesekinienda,
Nefumirire he vala vesekinivwija.” 21Mira he Vaisraeli eti, “Nevarongiie mikono msi di vantu vesisikia na vatiri.”
Currently Selected:
VAROMA 10: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
