VAEFESO 4

Mwitaango wa Mrungu uenda vumwe

1Heicho nimusemba, mi ne mnkore he Mfumwa, mutonge sa vuntu chetara mwitango wenyu mweitangiwe; 2he kukuduisha kwose na vuhoo, he kugumirija mwekitikiana kwa lukundo; 3na kukudindija kurinda vumwe vwa Mpeho he kichungo cha mporere. 4Mwiri mmwe na Mpeho mmwe, sa vuntu mweitangwe he ikuji imwe la mwitango wenyu. 5Mfumwa mmwe, mwitikijo mmwe, m’batizo mmwe. 6Mrungu mmwe, naye ni Vava wa vose, eho wanga ya vyose, na he vyose, na ndeni he vyose. 7Mira kila mmwe wetu einkiwe mbonea he kiringanyo cha ngero ya kiinkwa chakwe Kristo. 8Heicho eti:

“Ekinakwee uko wanga akataha mitahe,

Akavainka vantu viinkwa.” 9Huvo, icho kiteto: “Ekweie,” nikwo kuti ze, kakicha sikwo kuti iti, ye naye eseie mhaka myondo yeho si ya isanga? 10Na ula eseie niye ekweie; wanga mno kuvecha wanga jose, nesa aviizuje vintu vyose. 11Naye evikie va kumwe kuoka ntume; na vangi kuoka varoti; na vangi kuoka vabirikiji, na vangi kuoka varisha na vacheji; 12nesa vezerire varinganywe, mhaka ndima ngwa ikoloke, mhaka wakwe Kristo ujengwe; 13mhaka na uswi vose twekinefikia vumwe vwa mwitikijo na kumtwarija nezo Mwana wa Mrungu, mhaka kuoka mntu ekoloke, mhaka kufikia kiringanyo cha kueha chekoloke he Kristo; 14nesa tusireoka kangi vujana vunyenke, twekiyunjwayunjwa, na kutikwa ni kila nkungu ya icha, he’kyavia cha vantu, kwa kuisha, twekiratera nzia ja kukengera. 15Mira tutete idi he lukundo na kucha mhaka tumfikie ye eho he vyose, eye mtwi, Kristo. 16He Ye mwiri wose wekizomanywa na kuguranywa he lughenjo lwa kila irungo, he kiringanyo cha ndima ya kila ifungu imwe imwe, eehija mwiri uidime kukujenga mjengo he lukundo.

Miikarire ya kae na mishaa

17Heicho niteta kiteto iki, kangi, niteta vuonwa he Mfumwa, kuvokia iki, musitonge sa vuntu Vakiisanga vetonga, he vusoka vwa madunganyo avo; 18evo macha avo egerirwe kija, navo vetanyijwe na nkalamo ya Mrungu, he mburi ya vurundu vweho ndeni hevo, vuntu vwa vukuji vwa ngoro javo; 19evo vekikenja kufwa nkanju, vekugera he kumotoka, vaidime kuhirira mainkwe ose kwa mhelemeto. 20Mira unywi sivwo vuntu mwekuchejije Kristo; 21kakicha mwemsikie mukachejwa heye, sa vuntu idi yeho he Yesu, 22he miikarire yenyu ya kuvoka mukuhambue ula mntu wa kae, ekondika he kuratera tama jeisha. 23Mughoshwe vashaa he mpeho wa madunganyo enyu; 24mudoke mntu mshaa, erumbiwe kwa fwanyanyi ya Mrungu, hena kitea na kuzera kwa idi.

Mafundisho he miikarire ya kila msi

25Heicho kuhambueni mongo, mutete idi kila mntu na mghenji wakwe; ambu tu marungo, kila mmwe irungo la mghenji wakwe. 26Mukete oro, mira musikete mabanu; izuva lisirenyirika mwerena na mfundo; 27neri musimnke Shetani kapengere. 28Mkea asiive kangi; keba akudindije, ekironga ndima yedi kwa mikono yakwe mwenye, aidime kuketa kintu cha kumghavia msovu. 29Kiteto chochose e kivivi kisifume he momo wenyu, esire kila e chedi chemghenja ula eenda, kivainke mbonea vala vesikia. 30Neri musimvihije ula Mpeho Wedi wa Mrungu; eye heye mwegerirwe kisimbiko mhaka ula msi wa vukomboli. 31Mifundo yose na oro na kuvihiwa na kilonzo na viraro vivuke he unywi, hamwe na kila vuvivi; 32kangi ketani mbonea unywi venye na venye, venye mbazi, mwekishighiana sa vuntu Mrungu emushighiie unywi he Kristo.

Currently Selected:

VAEFESO 4: CHSUNT67

Highlight

Copy