VAEFESO 3
3
Ndima yakwe Paulo ifunukura vimako vya Mrungu
1Heicho mi Paulo ni nkore wakwe Kristo Yesu vuntu vwenyu unywi Vakiisanga; 2kakicha mwesikie mburi ya uomboji wa mbonea ya Mrungu neinkiwe vuntu vwenyu; 3iti nevonyeshwe mpiso iyo he kufunukirwa, sa vuntu nerongeandika viteto vighere. 4Heicho, mwekivisoma, muidima kumanya mimanyije yangu he mpiso yakwe Kristo. 5Mpiso iyo teimanyishwe vantu he marika angi; sa vuntu ntume vakwe vezerire na varoti vefunukurirwe misi ii ni Mpeho; 6iti Vakiisanga ni vapali hamwe na uswi va vupali vumwe, na va mwiri mmwe, na va sanga hamwe na uswi va kiravo chakwe cheho he Kristo Yesu he nzia ya Mburi Yedi; 7Mburi Yedi eyo neghoshijwe mndima wayo, he kiringanyo cha kiinkwa cha mbonea ya Mrungu neinkiwe he mirongire ya nzinya jakwe. 8Mi ne mdori kuvecha ye e mdori wa vezerire vose, neinkiwe ii mbonea ya kubirikira Vakiisanga vuzuri vwakwe Kristo vwesina mginto; 9na kuvaangaja vantu vose vamanye miidimire ya iyo mpiso, eyo too kae hose yekivisike he Mrungu erumbie vintu vyose; 10nesa iki he nzia ya kanisa, kiugho cha Mrungu cha mbare nyingi kimanyike he vifumwa na nzinya uko wanga; 11he kiringanyo cha mrekero wakwe wa too kae, ekirekere he Kristo Yesu Mfumwa wetu. 12Heye tuna ndekero na nzinya kuzengelelia ikuji, kwa nzia ya kumwitikija. 13Heicho nimusemba musileghele vuntu vwa mavwasi angu he vuntu vwenyu, ena ngazo henyu.
Iombi he kumanya Mburi Yedi
14Heicho nimdunkutia Vava, 15eye he izina lakwe vuvava vwose vwa uko wanga na vwa kunu si vweghuhiie izina, 16he kiringanyo cha vuzuri vwa ngazo yakwe, amuinke kudindijwa kwa nzinya, he ndima ya Mpeho wakwe, he mntu wa uko ndeni. 17Kristo aikae he ngoro jenyu he mwitikijo, mwekiketa miji na msingi he lukundo; 18nesa hamwe na vezerire vose muidime kumanya vuntu e luaramu, na vueza na kueha na kusea; 19na kumanya lukundo lwakwe Kristo, lwevecha kutwarija he vuntu e lujinki, muidime kukoloka he mikolokire yose ya Mrungu.
20Heicho, nakazwe ye eidima kuronga vya kimako mno kuvecha vyose vila tweomba, kana twevidunganya, he kiringanyo cha nzinya yeronga ndima he uswi; 21yee, nakazwe he kanisa na he Kristo Yesu he marika ose kae na kae. Amen.
Currently Selected:
VAEFESO 3: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
