VAEFESO 2

Lukio he mbonea ya Mrungu

1Na unywi emuvushije he vefwie, aho mwefwie vuntu vwa mateshanyo na mabanu enyu; 2oe kae mwekiangia heo he kuratera miikarire ya ki ili isanga, na he kumratera mfumwa wa nzinya ya ii wanga, mpeho ula eronga ndima iki he vana va lubero; 3evo na uswi vose kae, twekitonjanya navo, hena tama ja miri yetu, twekiratera mikundire ya mwiri na madunganyo, tukaoka vana va oro he miikarire yetu sa avo vangi. 4Mira Mrungu kila ena mbazi nyingi, he mikundire yakwe mibaha etukundie; 5hata lila igheri twefwie vuntu vwa mateshanyo etu; akatukalamija hamwe ne Kristo; mwekijijwe kwa mbonea. 6Akatuvusha he vefwie hamwe naye, akatuikaja hamwe naye uko wanga, he Kristo Yesu; 7nesa igheri leneza afunyirije vuzuri vwa mbonea yakwe vwesina kiringanyo, he kutufwia mbazi he Kristo Yesu. 8Ambu mwekijijwe kwa mbonea, he nzia ya mwitikijo; na icho tekifuma he unywi venye, ni kiinkwa cha Mrungu; 9neri si he mihiro, hasireketa mntu wowose ekukaza. 10Ambu tu ndima yakwe, twerumbiwe he Kristo Yesu, tukete mihiro yedi, eyo too kuvoka Mrungu eiringanye nesa tutongie heyo.

Vakiisanga na Vayuda veoka vamwe he Kanisa

11Heicho kumbukani iti, hala unywi mwe Vakiisanga he kimwiri, mwekiitangwa Vesitavanwe ni vala veitangwa Vakitavani, cherongiwe he mwiri kwa mikono; 12ambu aho kae temwekimna Kristo, mwetanie na mbari ya Israeli, vagheni vesina maaghano a kila kiravo. Temwekina ikuji, temuna Mrungu he ii si. 13Mira iki, he Kristo Yesu, unywi mwekiho hae aho kuvoka, mwaetwe hafuhi ni sakame yakwe Kristo. 14Ambu ye niye mporere yetu, etughoshije uswi vose twekiveri kuoka mmwe; akabaja vula vujigho vwa ghati vwekitutanyije. 15Naye ekikenja kuvusha ila nzo kwa mwiri wakwe; niyo kiziomo cha maamoro cheho he maazero; nesa aghoshe avo veri kuoka mntu mshaa mmwe ndeni heye; akahareha mporere. 16Akavakundanya vose veri na Mrungu he mwiri mmwe kwa nzia ya msalaba, ekikenja kukoma ila nzo kwa uo msalaba. 17Akaza akabirikira mporere henyu unywi mwekiho hae, na mporere he vala veho hafuhi. 18Ambu heye uswi vose twavona nzia ya kumfikia Vava he Mpeho mmwe. 19Heicho, kuvokia iki unywi temuvagheni neri varavecha, mira unywi mu vakaa hamwe na vezerire, vantu va kaa hakwe Mrungu. 20Mwejengiwe he msingi wa ntume na varoti, ne Kristo Yesu ye mwenye ni ibwe ibaha la pembeni. 21Heye ijengo lose liguranywa nezo na kueha mhaka lioke nyumba ya mtaso yezerire he Mfumwa. 22Heye na unywi mwejengiwe hamwe kuoka kaa ya Mrungu he Mpeho.

Currently Selected:

VAEFESO 2: CHSUNT67

Highlight

Copy