VAKOLOSAI 2

1Ambu nienda mumanye vubaha vwa ivoo langu nena nalo vuntu vwenyu, na he vuntu vwa vala va uko Laodikia, na vala vesinavona vusho vwangu he kimwiri; 2nesa vatujwe he ngoro javo, vekiguranywa he lukundo, vakete vuzuri vwose vwa kutwarija nezo, vaidime kumanyisha nezo mpiso ya Mrungu, eye Kristo; 3eye hakwe hevisiwe ndungu jose ja viugho na kucha.

Vumwe ne Kristo, machundwe he vuntu vwa viugho vya macha a mongo

4Niteta mburi ii, hasikete mntu emuisha na viteto vya kumukengereja. 5Ambu nziaho siho na unywi kimwiri, mira niho hamwe na unywi kimpeho, nekiizihirwa na kuvona kitongire chenyu na mwitikijo wenyu wedindie he Kristo.

6Heicho, sa vuntu mwemghuhiie Kristo Yesu Mfumwa, tongiani huvo huvo heye; 7museje miji na kujengwa heye; mwedindijwe he mwitikijo, sa vuntu mwechejijwe; mwekizika kuvika mvera.

8Rerehani mntu asimughoshe mitahe kwa icha lakwe la kiisanga, na kuisha kutuhu, kwa menda a vantu, he vuntu vwa michejire ya kuvoka ya ii si, neri esi yakwe Kristo. 9Ambu heye heikaa vukoloshi vwose vwa Ki-Mrungu he kimwiri. 10Na unywi mwakolokia heye, eye mtwi wa vufumwa vwose na nzinya. 11Heye mwetavanwe kitavani chesirongiwe na mikono, he kukuhambua mwiri wa kimntu, he kitavani chakwe Kristo. 12Mukajikwa hamwe naye he m’batizo; kangi hewo mukavushwa he vefwie hamwe naye, vuntu vwa mwitikijo, kwa nzinya ya Mrungu emvushije he vefwie. 13Na unywi aho mwefwie vuntu vwa mateshanyo enyu, na kusatavanwa he mwiri, akamukalamija hamwe naye, ekinatushighie mateshanyo ose; 14ekinashaghashe kila cheti cheandikwe maamoro ala eo ekiturengeha, akakivusha na mondo, akakikontera he msalaba; 15ekikenja kuhambua vifumwa na nzinya na kuvibunkula kwa ndekero, ekiving’arira he uo msalaba.

16Heicho, mntu asimulahe unywi he vyala na vyanwa, kana misi yegimbikwa, kana mweji kongo, kana sabato; 17ivyo ni kivuri cha vila vyeneza; mira mwiri ni wakwe Kristo. 18Mntu asimughumbe kitumulilo chenyu, he kukuduisha kwa kikundire chakwe mwenye du, na kutasa vamalaika, ekikugera he mivonire yakwe na kukubaa sutwa, he icha lakwe la kimwiri; 19neri tegura eye Mtwi, ewo heye mwiri wose wekirerwa na kugurranywa ni marungo na nyige, weeha na kuongejika kwefuma he Mrungu.

20Kakicha mwefwie hamwe ne Kristo mukashigha ila michejire ya kuvoka ya ii si, hanini mwekugera wa he maamoro, sa mwecheri tua he si ii: 21“Usigure”, “usisaghe”, “usikunte;” 22-ivyo vyose vikondikia he milire-, mwekiratera maazero a michejire ya vantu? 23Ivyo vivoneka iti vina kiugho, he mitasire mweteiuka venye, na he kukuduisha, na he kutetia mwiri kwa vukai; mira teviidima kukinda viherehere vya mwiri.

Currently Selected:

VAKOLOSAI 2: CHSUNT67

Highlight

Copy