VAKOLOSAI 1

Ngezya

1Paullo, ntume wakwe Kristo Yesu he kikundire cha Mrungu, na mndughu Timoteo. 2Ha vandughu vezerire, vakitengo he Kristo, veho Kolosai: Mbonea na iikae he unywi na mporere kufuma he Mrungu Vava wetu.

Kuanjela na maombi

3Tumwanjela Mrungu Vava wa Mfumwa wetu Yesu Kristo, aho twekimuombia misi yose; 4too twesikie mburi ja mwitikijo wenyu he Kristo Yesu, na lukundo mwena nalwo he vezerire vose; 5he vuntu vwa ikuji mwelivanziwe uko wanga, elo mwelisikie mburi jalo aho kae, he kila kiteto cha idi cha Mburi Yedi; 6yefikie henyu sa vuntu yeho he si jose, na kugera ntunda, na kueha, sa vuntu yeeha hata he unywi, kuvokia msi ula mwesikie, mukatwarija nezo mbonea ya Mrungu he idi; 7sa vuntu mwechejijwe ni Epafra, mzoro mkunde mgheji wetu, e mndima mkitengo wakwe Kristo he vuntu vwenyu; 8naye etuukulile lukundo lwenyu lwa Kimpeho.

9Heicho na uswi, too ula msi twesikie, tetushigha kumuombia na kumutasia, nesa muizujwe icha la kikundire chakwe he viugho vyose na mimanyije ya kimpeho; 10mutonge sa vuntu chemutara he Mfumwa, mwekimwizihija haiwa, mwekigera ntunda he kila ndima yedi, na kuongejika he icha la Mrungu; 11mwekidindijwa kwa nzinya jose he kiringanyo cha ngazo yakwe, nesa mufikie kuinda kwose na kugumirija hamwe na kuizihirwa; 12mwekimwanjela Vava, etughoshije tuveiwe kughuha ifungu la vupali vwa vezerire he kianga. 13Naye etukijije he nzinya ya kija, akatusamija na kutuingija he vufumwa vwa Mwana wa lukundo lwakwe; 14heye tuna vukomboli, ekwo kushighiwa mabanu.

Vwedi na ndima jakwe Kristo

15Naye ni fwanyanyi ya Mrungu esivonwa, mzamoghwa wa kuvoka he virumbe vyose. 16Ambu vintu vyose vyerumbiwe heye, vyeho uko wanga na vyeho he isanga, vyevoneka na vyesivoneka, kakicha ni vichumbi vya ngazo, kana vufumwa, kana vubaha, kana nzinya, vintu vyose vyerumbiwe heye, na he vuntu vwakwe. 17Naye ekirewaho vintu vyose vyesinaoka, na vintu vyose viguranie heye. 18Naye niye mtwi wa mwiri ewo wa kanisa; naye ni wa kuvoka, ni mzamoghwa wa kuvoka he vefwie, nesa aoke mrongori he vyose. 19Ambu chemwizihire Vava iti vukoloshi vwose vuikae heye; 20na heye evikundanya vintu vyose naye mwenye, ekikenja kuhareha mporere kwa sakame ya msalaba wakwe; heye, kakicha ni vintu vyeho he isanga, kana vyeho uko wanga. 21Na unywi aho kuvoka mwekisopanywe, kangi mwekiho nze he madunganyo enyu, he ila mihiro yenyu mivivi, mira iki amukundanya; 22he nyama ya mwiri wakwe, he kufwa kwakwe, nesa amutwae unywi mozya heye, mwezerire, mwesina madamaro neri lushagho; 23mwekizika kaa he ula mwitikijo, mwevikiwe wanga he msingi, mukadinda; mwekisagharushwa na kushigha ikuji la Mburi Yedi mweisikie, yebirikirwe he virumbe vyose vyeho kijusi ya ijumbi; eyo mi Paulo neki mndima wayo.

Paulo eketa vumwe na ndima yakwe Kristo

24Iki ning’arira ala mavwasi nena nao vuntu vwenyu; kangi niakolosha he mwiri wangu, ala mavwasi akwe Kristo eshele he mwiri wakwe, nikwo kuti, kanisa yakwe; 25eyo neghoshijwe mndima wayo, sa mwombaji wa Mrungu, nevuinkiwe he lumazo lwenyu, nikoloshe kiteto cha Mrungu; 26mpiso ila yevisiwe too kae hose, na too marika ose, mira iki yafunukurwa he vezerire vakwe; 27evo Mrungu ekundie kuvamanyisha vuntu vuzuri vweikee vwa ngazo ya ii mpiso he Vakiisanga, navwo ni Kristo he unywi, ikuji la ngazo, 28eye uswi twebirikira mburi jakwe, twekimchunda kila mntu, na kumcheja kila mntu he viugho vyose, tuidime kumtwaa kila mntu ekoloke he Kristo. 29Nami nikubinusha he vuntu vwa iyo mburi, nekikudoka he kiringanyo cha kuronga ndima yakwe, ye eronga ndima hemi na nzinya.

Currently Selected:

VAKOLOSAI 1: CHSUNT67

Highlight

Copy