1 VAKORINTO 5

Kushinda kwesina kiringanyo

1Cha kididi, mburi yagisha iti henyu hena mashindo, na kushinda ukwo tekuho neri he Vakiisanga, iti mntu eanga na mche wa vavee. 2Na unywi mukubaa, neri temusikia vwasi, nesa ula eketie huvo avushwe ghati he unywi. 3Ambu kididi, nziaho siwaho kimwiri, mira niwaho kimpeho, mi mwenye nakenja kumlaha uo eketie huvo, sa nerewaho. 4He izina la Mfumwa wetu Yesu, aho mwekivungana hamwe na mpeho wangu, hamwe na nzinya ya Mfumwa wetu Yesu; 5mwinkijeni uo mntu he Shetani, nesa mwiri wakwe ukondwe na ngoro ikaniwe he msi wa Mfumwa Yesu. 6Kukukaza kwenyu si kwedi. Temumanyije iti kachachu kadori kefusha itonge lose? 7Kuelijeni, muvushe chachu ya kae, nesa muoke itonge ishaa, sa mwesigerirwe chachu. Ambu na uswi twakomiwa igonji letu la Pasaka, niye Kristo; 8heicho natuharehe mbao, si he chachu ya kae, neri he chachu yavutiri na vuvivi, esire ya vyesikararate, echo ngoro yeelile na idi.

9Nemuandikie he barua yangu iti musitonjanye na vareshinda. 10Siteta iti musitonjanye cha do na vareshinda va ii si kana varemotoka, neri vakobonda, kana varetasa mirungu, ambu aho chekimutara kufuma he ii si. 11Mira vuntu cheikee, nemuandikie iti musitonjanye na mntu eitangwa mndughu, kakicha ni mreshinda, kana mremotoka, kana mretasa mirungu, kana mrerara kana mwengeji kana mkibonda; mntu sa uo musikunde neri kula naye. 12Ambu kinitara ni kulaha vala veho uko nze? Unywi temuvalaha vala mwena navo? 13Mira vala veho uko nze Mrungu enevalaha. Unywi mvusheni ula mvivi ghati he unywi.

Currently Selected:

1 VAKORINTO 5: CHSUNT67

Highlight

Copy