Tiiti 1
1
Fòów kéele
1Mii Pɔli, wi lè Kolocɔlɔɔ púlo ní Zyezu Kirisi pìituɔn, wi n mii tun koro ga pye mii í da Kolocɔlɔɔ wonyɛnɛ-wòlobèle dɛ̀ɛmɛ́ paa syée yɛʔɛ̀ ma tágali ni, sáā kányɛɛgi tèé be na gee gi yɛlɛ lè ní Kolocɔlɔɔ yɛ́ɛgi fyáara ní, 2jàngó sìibangwɔɔw sɔ̀ngurɔ tɛɛtaʔaga í pye be ma, Kolocɔlɔɔ wi lè wi o finɛ nyáana í, wi maa sìíw bee nyɔ́ɔ fàli sáni làrigèle í séli lè. 3Lǎlee wi da nyɛ́nɛ n wòlo lè, a li ga baa nan, a wi sìíw bee kéele tɛ̀ɛn wi syɛ́ɛnri báriga ni, dee wolo Syɔɔfɔw Kolocɔlɔɔ kàlifáa mii ma lè níì jo mii í da di nyuu.
4 #
2Kor 8:23; Gal 2:3; 2Tim 4:10 Mii a sɛ́bɛw naa tórigo mɔ ma, Tiiti, mɔ wi lè mii pìiseew tágali ni li nyɛ wo myɛ siinw ma lè, ki n yɛlɛ Tofɔw Kolocɔlɔɔ ní wolo Syɔɔfɔw Kirisi Zyezu í kpɔ́ʔɔri ní fûnnyingi kaan mɔ ma!
Fáliw wi kaan Tiiti ma wi kpéʔele lè Kirɛti ni
5Kéelee na mii mɔ yaʔa lè Kirɛti ni, loro li nyɛ kasangèle ke da kòro lè sìnjɔɔnri ni, mɔ í da gele bee cɔɔnri, si wɔ́ɔ Egilizibèle wólɛɛbéle télege télege kěyi myɛ ni, àmɛɛ mii da gi joo n gbàn mɔ ma lè níì jo, 6#1Tim 3:2-7 wee mɔ ga nyaa lè kajoolo fun syɔ́ɔn wi si i nyɛ cɔlɔɔ nibin fɔ́lɔ, wi pìíbèle si i nyɛ tágafɔɔlɔ, syɛ́ɛnbèle si o be kéeli nyuu ni máari níì jo pe i nyɛ kanɔnʔɔbyebèlē, wàlá pìijamabéle í. 7Níì cán àmɛɛ yɛɛ̀kiniw nyɛ lè Kolocɔlɔɔ fáliw kacɔɔnriɔ, fwɔɔ wi pye kajoolo fun, ki ga yɛlɛ wi pye nyùnwaʔafɔlɔ í, wàlá wi fúngi í tanʔama dɛ́nɛ í, wàlá wi wiyɛɛ gaan sínmi ma í, wàlá wi pye kàsiikuuɔn í, wàlá wi pye tɔ̀nɔpeew caafɔlɔ í. 8Fwɔɔ wi pye nibɔnbèle tìrigefɔlɔ, wáā syɛ́ɛnbèle nyɔɔmɔ caa, si pye yákirifɔlɔ, ní syɛɛnsiɔn, ní funjàngafɔlɔ, si wiyɛɛ cǒmi cán, 9wí wɔ́ɔ syɛɛnjóofiiri sámaga cò di yɛlɛ lè ní tamani ní, koro ga pye wi gbǎn ra syɛ́ɛnbèle kɛɛlɛ ní tamajanni bee ní, sáā kàkabalayi fɔ̀ɔlɔ nyɔ́ɔyɔ tɔ́ngi.
10Níì cán syɛɛnjamabèle n nɛʔɛ, poro bele be nyùngo fun syɛ́ɛnri nyuu lè ní i syɛ́ɛnbèle fáana ni pùuní, bele be koro kpéʔele lè, pe saamaw i nyɛ kɛ́nɛw fɔ̀ɔlɔ. 11Fwɔɔ wo be nyɔ́ɔyi tɔ́n, níì cán pe i narigbaapoyaa nyáʔami àmɛɛ be yi syɛ́ɛnbèle tama lè kérigèle kèle na gele ge lè ke ga yɛlɛ í, pe i gee bee kpéʔele tɔ̀nɔw kánma na wee wi pee lè. 12Alí poro Kirɛti ye tiimaa kanyaajoowaa maa gi joo níì jo: «Kirɛti ye i nyɛ jànvaafɔɔlɔ làla o làla, ní i nyɛ yacobeeye ní sàlagafɔ-laaweekaaya-fɔɔlɔ.» 13Séeraw bee i nyɛ kányɛʔɛ. Koro na gi yɛlɛ mɔ í fúlo be na gbanʔama, koro ga pye be cólogo tágali kàbaan na, 14jàngó pe a kɔ́ fɔ̀lɔ Zyefubèle tánlɛɛyɛ ní kányɛɛgi céefɔɔlɔ kajoogéle na í. 15Bele be nyɔɔ lè yáriri myɛ n nyɔɔ bele bee ma, kàjáa bele be nɔ́nʔɔ lè pe lè sìndagabèle, yafyɛn ga nyɔɔ bele bee ma í. Pe n be sɔ̀nguri ní be fúnyi nɔ́nʔɔ. 16Pe i gi nyuu níì jo pe n Kolocɔlɔɔ cán, bi gi taa pe kapyegèle i gi tèé pe n wi cée. Pe n tɔ̀nɔ n pee ní i nyɛ sìnloʔobéle, pe fanʔa o gi na bi gbǎn kacànnaa faala kpéʔele í.
Currently Selected:
Tiiti 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
