2 Timɔte 4
4
1Kirisi Zyezu wi a ba kútiiw kúun niweebèle ní kúbèle na lè wi làribanni ni, àmɛɛ wi a ba wiyɛɛ dɛ̀ɛn si wi fǎngi télege lè, mii a gi joo gbàn mɔ ma woro ní Kolocɔlɔɔ nyɛ́nɛ na si jo, 2maa Kolocɔlɔɔ syɛ́ɛnri nyuu syɛ́ɛnbèle ma ní lòmaana ní, làrijǎngèle, ní làribeegèle ni, máā be kérigèle tèé be na, máā fúlo be na, máā be kɛɛlɛ, máā be tama ní kpàracogo ní làrigèle myɛ ni. 3Níì cán làla a kɔ́ ba pye, lee ni lè syɛ́ɛnbèle a gbǎn tamajanni kpàraco í. Kàjáa pe a ra pe nyɛnɛ tamafɔbèle saʔa caa bi yɛlɛ ní be céri ki laànitaʔa kele ní, jàngó paa poro fundaan-syɛ́ɛnri nyuu poro ma. 4Pe a ní fɔ̀lɔ kányɛɛgi na í, fwɔɔ tanlɛɛyi na pe a ra fɔ̀lɔ́. 5Mɔ si na, ki n yɛlɛ mɔ í miyɛɛ cǒmi cán kérigèle myɛ ni, mí wɔʔɔgi kpàraco, fáliwee kanyaajooo yɛlɛ waa kpéʔele lè, da wee bee kpéʔele, máā mɔ fáliw kpéʔele mi foro.
6Ki ga yére mii na, pe n mii wòlo n kwɔ́ɔ sáriga, a mii làrigárili nan. 7Mii n kapɛɛnjǎnni kpúmɔn, níì kàfyaali fàn n nan láʔali na, ní wɔ́ɔ̀ tágali sámaga n cò. 8Nlaʔa tɔ́ɔliw naa na, Kàfɔw wi lè kútiisinw kúunfɔlɔ, wi n kpɔ́ʔɔri nyùndɔnnɔ tɛ́ʔɛ yaà mii yɛ́ʔɛ na, sínni wólo, lee wi a ba kaan mii ma lè cángi bee na. Mii nibin si má ban wi a li kaan í, bele myɛ be wi làridɛ̀ɛ́nni sige lè ní fundaanra ní, wi a wɔ́ɔ kèle kaan bele bee ma.
Gee gi joo n kaan Timɔte tiimaa ma lè
9Mi nàani mí wári mi pan naa mii ma, 10#Kɔl 4:14; File 24; 2Kor 8:23; Gal 2:3; Tiit 1:4 níì cán Demasi n mii yaʔa dulunyanw naa tàmaga kéele na, níì kári Tesaloniki ma. Keresan si n kári Galasii ma, á Tiiti kári Dalimasii ma. 11#Kɔl 4:14; File 24; Kap 12:12,25; 13:13; 15:37-39; Kɔl 4:10 Luki nibin wi kòro naa ní mii ní. Mariki kɔ́ri maa maa ní miyɛɛ ní, níì cán mii màko i nyɛ wi na gbanʔama fáliw kéele na. 12#Kap 20:4; Efɛz 6:21-22; Kɔl 4:7-8 Mii n Tisyiki tun Efɛzi ma. 13#Kap 20:6 Búrogi mii da yaʔa lè Turowasi ni, Karipusi tɛ́ɛgi ni, mɔ ga ni maa lǎlee ni lè, maa maa ní gi ní n fàra sɛ́bɛbèle na, sáliyi#4:13 sáliyi: Bàsaliyi wàlá sikesaliyi pe da ni fánʔari ní i sɛ́bɛ yi na booma ni. wòolo kéele li caà mii dɛ́nɛ n sɔ̀lɔ.
14 #
1Tim 1:20; Ŋún 62:13; Wɔr 2:6 Alɛkisandiri wi lè kanyɛɛnfaanw, wi n kapeegèlē saʔa kpéʔele mii na. Kàfɔw si a wi sàra bi yɛlɛ ní wi kapyegèle ní. 15Mi wɔ́ɔ maa miyɛɛ kɔ̀rɔsíi wi na, níì cán wi maa ni wolo syɛɛnjóori kábala gbanʔama.
16Lǎli ni mii sélì mii kéeli tɛ̀ɛn kútiijoo-tɛ́ɛgi ni lè, wàa faala da pye ní mii ní í, pe myɛ maa mii cée. Ki si ga yɛlɛ Kolocɔlɔɔ í gee bee córo be ma í! 17Kàfɔw si maa yére n mii sɔ́lɔgɔ níì fànʔa kaan mii ma, koro ga pye mii í gbǎn Syɛɛnjóocǎnri joo bi foro, jàngó syɛɛnfeleyi myɛ í di taa lóʔo. Wi n wɔ́ɔ̀ mii yirige càaraw nyɔ́ɔ ni. 18Kàfɔw a ra mii syoo kapeeyi myɛ ma, si ní mii syɔɔ jàngó mii í jée wi nyɛ̀ʔɛni fànʔa ni. Woro na kpɔ́ʔɔri yɛlɛ làrigèle myɛ ni! Amiina!
Fòosanw kéele
19 #
Kap 18:2; 2Tim 1:16-17 Pirisika#4:19 Pirisika: Pe wɔ́ɔ i mɛ́ɛgi bee yiri Pirisii. ní Akilasi syáanri n fàra Onɛsifɔri kpáagi wòolo na. 20#Kap 19:22; Wɔr 16:23; Kap 20:4; 21:29 Erasiti n kòro Korɛnti ni, á mii pan n Turofimi yaʔa yaà yaama na Milɛti ni. 21Mi nàani mí pan sáni wéeri làla í nan lè. Ubulusi ní Pudansi, ní Linusi, ní Kuloja n mɔ syáanri n fàra wo senyɛnbèle myɛ na.
22 Kàfɔw í pye ní mɔ ní.
Kolocɔlɔɔ í kpɔ́ʔɔri kaan yele ma.
Currently Selected:
2 Timɔte 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
