Wɔrɔmi ye 6
6
Wolo n kùu kapeegèle kàbaan na níì nyán n pye sìi na Kirisi ni
1Ki ga pye nya, nyàʔá si wolo a joo? A gi yɛlɛ lé wolo í kòro kapeebyeri na, koro ga pye Kolocɔlɔɔ kpɔ́ʔɔri sáā nɛʔɛgi? 2Eʔe dɛ! Wolo bele wo kùu lè kapeegèle kàbaan na, mɛ̀ɛ́ wolo a ní kòro bàā ge kpéʔele bi sɛ́ɛ? 3Yele ga gi cán wolo bele myɛ wo batize Kirisi Zyezu ni lè, wolo n batize wi kùúw ni wii ì? 4#Kɔl 2:12 Gee bee na pe n wolo tɔ́n ní Kirisi ní batɛmiw báriga ni, kánmi bee na wolo pínɛ ní wi ní kùúw ni, koro ga pye kánmee na Tofɔw wi nyán n yirige lè kúbèle nínge ni woro nìjangbɔɔri báriga ni, wolo í wɔ́ɔ ra táanri kánmi bee na sìifɔnw ni.
5Amɛɛ si wolo pínɛ n kùu ní wi ní lè, ànbée wolo a wɔ́ɔ ba pínɛ nyán ní wi ní. 6Wolo n gi cán kánmee pi da séli n pye wolo ni lè, kánmi bee n kùu ní Kirisi ní tiiparigi na, koro ga pye wolo kanlɛɛmi kapeebyere fànʔa í kálagi, jàngó wolo a ní kɔ́ pye kapeebyeri púloro ni í. 7Níì cán wee wi kùu lè, wee bee n syɔɔ kapeebyeri púloro ma. 8Amɛɛ si wolo kùu ní Kirisi ní lè, wolo n tága gi na wolo a wɔ́ɔ pye sìi na ní wi ní. 9Wolo n gi cán ncan àmɛɛ Kirisi nyán n yiri kúbèle nínge ni lè, wi a ní kùu í, kùúw fánʔa ní o nyɛ wi na nyáana í. 10Níì cán àmɛɛ wi kùu lè, kapeegèle kéele na wi kùu tɔlɔgɔ nibin pee, àmɛɛ si wi nyɛ lè sìi na, wi i nyɛ sìi na Kolocɔlɔɔ kàbangi na. 11Kánmi bee na ki wɔ́ɔ̀ yɛlɛ yaa yeyɛɛ jóro kúbéle kapeegèle kàbaan na, sáā yeyɛɛ jóro niweebèlē Kolocɔlɔɔ kàbangi na àmɛɛ yele nyɛ lè Kirisi Zyezu ni.
12Yele céri di kúu lè, ki ga yɛlɛ yele í ní kapeebyeri yaʔa ti fànʔa taa di na yele í da di laànitaʔa kérigèle kpéʔele í. 13Ki ga wɔ́ɔ̀ yɛlɛ yele í ní yele céri tɛ́ɛyɛ yaʔa kapeebyeri kɔ́yɔ ni bi yi kpéʔele kakolobyeri falipye-yarira í. Kàjáa ki n yɛlɛ ye yeyɛɛ gaan Kolocɔlɔɔ ma bi pye àmɛɛ syɛ́ɛnbèle pèle nyɛ lè, bele be nyán n yiri kúbèle nínge ni lè n pye sìi na, yé yele céri tɛ́ɛyɛ kaan Kolocɔlɔɔ ma yi pye sínni falipye-yarira. 14Kapeebyeri a ní fànʔa taa yele na í, níì cán yele o nyɛ Mowizi làlwaw fànʔa ni í, fwɔɔ kpɔ́ʔɔri fànʔa ni yele nyɛ.
Sínni púloro kéele
15Ki ga pye nya, àmɛɛ gi nyɛ lè wolo o nyɛ Mowizi làlwaw fànʔa ni í, fwɔɔ kpɔ́ʔɔri fànʔa ni, a gee bee jo lé ki n yɛlɛ wolo í da kapeegèle kpéʔele? Eʔe dɛ! 16Yele ga gi cán ncan yele ga yeyɛɛ gaan kàfɔwee ma lè n pye wi pulobèlē ni lúro wi ma, woro wee má yele lúro lè, yele i nyɛ wee bee púlobéle ì? Kapye kapeebyeri má yele lúro, gee bee kàdoʔo i nyɛ kùúw, ki si ga pye Kolocɔlɔɔ má yele lúro, gee bee kàdoʔo i nyɛ sínni. 17Ki n yɛlɛ waa bariga kaangi Kolocɔlɔɔ ma, níì cán yele maa pye kapeebyeri púloro ni, kàjáa tamalee na pe yele tama lè, a yele lee bee cò ní yele fúnyi myɛ ní. 18Kolocɔlɔɔ n yele yirige kapeebyeri púloro ni níì yele lége sínni wóro ni. 19Mii i nyuu yele ma syɛ́ɛnbèle jooganma na yele céri báriga fùnmɔ kéele na. Amɛɛ yele da yele céri tɛ́ɛyɛ kaan lè a yi pye kanɔnʔɔri ní kolomi púloro ni ni kakolobyeri kpéʔele kánmee na lè, kánmi bee na tɔ́ɔliw ni, ye yele céri tɛ́ɛyɛ kaan yi pye sínni púloro ni bàā kasingèle kpéʔele.
20Níì cán lǎli ni yele da pye lè kapeebyeri púlobéle, yele maa pye wɔ́rɔbéle sínni kàbaan na. 21Kérigèle ge nyɛ lè yele na fɛ̀ɛrɛ tɔ́ɔliw ni, gele yele da ni kpéʔele lè booma ni, nyàʔá tɔ̀nɔfeleo yele da ni taagi ge ni lǎli bee ni? Níì cán gele bee kàdoʔo gi nyɛ kùúw. 22Kàjáa tɔ́ɔliw ni, àmɛɛ Kolocɔlɔɔ yele yirige kapeebyeri púloro ni lè, níì yele lége woro tiimaa púlori ni, tɔ̀nɔwee yele baa taa lè, woro wi nyɛ jéemununi, gee bee kàdoʔo si gi nyɛ sìibangwɔɔw. 23Níì cán kapeebyeri sàra wi nyɛ kùúw, kàjáa kpɔ́ʔɔri Kolocɔlɔɔ kaan wolo ma lè, toro di nyɛ sìibangwɔɔw wolo Kàfɔw Zyezu Kirisi bárigaw ni.
Currently Selected:
Wɔrɔmi ye 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
