Filipikaʔa ye 4
4
Láliiw wi kaan lè
1Gee bee na, mii senyɛn-nidaanmabèle, ki n yɛlɛ yele í sámaga yére Kàfɔw ni kányɛʔɛ ni, mii syɛɛn-nidaanmabèle, yele láagi n kɔ́ɔ̀ mii taa, níì cán yele i nyɛ mii fundaanri, ní mii kpɔ́ʔɔri nyùndɔnnɔ!
2Mii i Evodii nyɛ́ɛri, ni Sɛntisyi nyɛ́ɛri níì jo pe bɛ̀ɛ nibin na Kàfɔw ni. 3Mii wɔ́ɔ i mɔ nyɛ́ɛri, mii falipyenyɛnw, mɔ wi lè tágala syɔ́ɔn, maa cébèle bee dɛ̀ɛmɛ́. Níì cán pe maa pínɛ ní mii ní Syɛɛnjóocǎnri kapɛɛnkpumɔnrɔ na, n fàra Kilema, ní mii falipyenyɛn-zanbèle na, bele mɛ́ɛyɛ yi sɛ́bɛ lè sìíw sɛ́bɛ ni.
4Yaa fundaanra kpéʔele Kàfɔw ni làrigèle myɛ ni. Mii a ní gi joo taʔa si jo: Yaa fundaanra kpéʔele.
5Ki n yɛlɛ syɛ́ɛnbèle myɛ í yele fûnnyingi kéele cán. Ye wéle Kàfɔw n nùuni naa. 6Ki ga yɛlɛ yele í yele fúnyi yaʔa yaa curugu yele na yarigaa faala na í. Yariga o yariga láa gi nyɛ yele na lè, yaa gee bee nyuu yaa tèé Kolocɔlɔɔ na ní nyɛ́ɛrigɛ, ní nyɛ́ɛrigboloyo, ní bariga kaanna ní, 7koro ga pye fûnnyingee Kolocɔlɔɔ kaangi lè, gee gi sɔ̀lɔ syɛ́ɛnbèle myɛ sɔ̀ngurɔ na lè, koro a yele fúnyi ní yele sɔ̀nguri yaʔa di kòro Kirisi Zyezu na.
8Ni senyɛ̀nnɛ, gee gi syɛɛnsanri kwɔ́ɔ lè, toro di nyɛ kérigèle gele myɛ ge nyɛ lè kányɛʔɛ, ní gele myɛ ge líbe lè, ní gele myɛ ge sín lè, ní gele myɛ ge fílige lè, ní gele myɛ ge nyɛ lè tàmagi wòʔolo, ní gele myɛ ge nyɛ lè wojangéle ní, kapye ke n nyɔɔ níì yɛlɛ ní kpɔʔɔrɔ ní, yaa kérigèle bee sɔ̀ngí. 9Gee yele tama mii ma lè, ní gee yele taa mii ma lè, ní gee yele lóʔo ní wɔ́ɔ̀ gi nyaa mii ma lè, ye kòro yaa gee bee kpéʔele. Koro ga pye Kolocɔlɔɔ wi lè fûnnyingi kaanfɔlɔ, wi a pye ní yele ní.
Pɔli n bariga kaan Filipikaʔa ye ma pe yakaanyi kéele na
10Mii i fundaangbɔɔrɔ kpéʔele Kàfɔw ni, àmɛɛ gi mɔn lè, á yele ní baa sɔ̀ngi n taa mii na tɔ́ɔliw ni. Koro ní ki myɛ ní mii n gi cán yele maa ni sɔ̀ngí ni taagi mii na, yele si da kanmaa taa bi yele sɔ̀ngudaari tɛ̀ɛn í. 11Mii si o syɛ́ɛnri naa nyuu mii fɔ̌ngi kéele na í, níì cán mii n kánmi myɛ tama n cán, mii ga pye kanma o kanma na, kánmi bee n yɛlɛ mii ma. 12Fɔ̌ngi n too mii na n nyaa, a mii wɔ́ɔ̀ yanɛʔɛrɛ taa n nyaa. Mii n kérigèle myɛ ní yáriri myɛ kánma tama n cán, a mii tín yoo, a kateʔe i nyɛ mii na yoo, a mii náà yanɛʔɛrɛ taa yoo, a fɔ̀ngɔ too mii na yoo, kánmi bee myɛ n yɛlɛ mii ma. 13Mii fánʔa i nyɛ kérigèle myɛ na bàā ge kpéʔele Kirisi bárigaw ni, woro wee wi fǎngi kaangi mii ma lè. 14Koro ní ki myɛ ní, yele n kacànna pye àmɛɛ yele mii dɛ̀ɛmɛ lè mii wɔʔɔli ni.
15 #
2Kor 11:9
Yele Filipikaʔa ye tiimaa n wɔ́ɔ̀ gi cán àmɛɛ ki da pye lè Syɛɛnjóocǎnri joolo sélimɛ na, lǎli ni mii da yìri lè Maseduwani ma n kári, lǎli bee ni Egiliziwaa faala da mii dɛ̀ɛmɛ ní yakaanya ní í, yee mii taa lè, kapye yele yagana ban í. 16#Kap 17:1 Yele n mii màkonyɔɔri yárira tórigo mii ma tɔlɔyɔ siin lǎli ni mii da pye Tesaloniki ni lè. 17Ki o nyɛ mɔ a jo yakaangaa mii ní i caa í, kàjáa mii i caa Kolocɔlɔɔ í da kàa fàrá yele wógi na. 18#Yir 29:18 Mii si n yáriri myɛ taa, a di nɛʔɛ naa mii ma n sɔ̀lɔ. Yáriree yele da kaan Epafuroditi ma níì jo wi ba di kaan mii ma lè, mii n di taa, yáriri bee n mii tín, ti i nyɛ nùndaanna yárira, ní i nyɛ sárigacàɔn, wee wi Kolocɔlɔɔ dɛ́nɛ lè. 19Mii Kolocɔlɔw si a ra yele màkow myɛ nyɔɔgi bi yɛlɛ ní wi nìjangbɔɔri lɔnɛʔɛrɛ ní ti nyɛ lè Kirisi Zyezu ni. 20Kolocɔlɔɔ wi lè wolo Tóow, woro na nìjangbɔɔri yɛlɛ làla o làla kwɔ́ɔmɔ fun. Amiina!
Fòosanw kéele
21Kolocɔlɔɔ syɛɛncanbèle myɛ be nyɛ lè Kirisi Zyezu ni, ye be syáanri yaà. Wolo senyɛnbèle be nyɛ lè ní mii ní, pe n yele syáanri yaà. 22Kolocɔlɔɔ syɛɛncanbèle myɛ n yele syáanri, a Sezari kpáagi wòolo wóʔo si tóro.
23Ki n yɛlɛ Kàfɔw Zyezu Kirisi í wi kpɔ́ʔɔri le yele pìígèle ni!
Currently Selected:
Filipikaʔa ye 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
