Filipikaʔa ye 3
3
Sínni wodeele taaganma Kolocɔlɔɔ yɛ́ʔɛ ma
1Ni senyɛ̀nnɛ, dee mii a taʔa di na lè, toro di dee naa, àmɛɛ yele nyɛ lè Kàfɔw ni, yaa fundaanra kpéʔele.
Amɛɛ mii syɛɛnnijanri sɛ́bɛ bi tórigo yele ma lè, ki ga gbàn mii ma í, ncan ti a gbǎn yele gbóo. 2Yaa yeyɛɛ kɔ̀rɔsíi pɔ́nbèle#3:2 pɔ́nbèle: Mɔ ga lóʔo tɛ́ɛgi naa ni pɔ́nbèle, Zyefubèle na be nyɛ, bele pe da ni tágafɔbèle fáana lè. na, ye wɔ́ɔ yaa yeyɛɛ kɔ̀rɔsíi kakolobyebèle na, yé ní wɔ́ɔ yaa yeyɛɛ kɔ̀rɔsíi gbanzan kɛ́nɛw kpéʔelefɔɔlɔ na. 3Níì cán wolo bele wo Kolocɔlɔɔ kpɔ̀ʔɔrɔ́ lè wi Pǐli báriga ni, ní i nyɔ̌ngbɔɔlɔ táanri àmɛɛ wolo nyɛ lè Kirisi Zyezu ni, níì wolo sɔ̀ngumi láʔa céri kèlē na, wolo wo nyɛ kɛ́nɛtelew kpéʔelefɔɔlɔ. 4Koro ní ki myɛ ní tànʔa i nyɛ mii ma mii í mii sɔ̀ngumi taʔa céri kèlē na wɔ́ɔgēle. Níì cán wàa nikwɔɔ ga jo tànʔa i nyɛ woro ma bi wi sɔ̀ngumi taʔa céri kèlē na, ki i nyɛ mii ma n sɔ̀lɔ wee bee na, 5#Kap 23:6; 26:5; Wɔr 11:1 pe mii see lè, a ki ga pye canya kɔrɔtaanri wógi na, a be mii kɛ́nɛw kpéʔele, mii i nyɛ Isirayɛli syɛɛnfelegaa, Bɛnzyamɛ yòdaʔayi ni, mii i nyɛ Heburuseeo. Gee gi Mowizi làlwaw kôdanʔara kwɔ́ɔ lè, mii maa pye Farisio. 6#Kap 8:3; 22:4; 26:9-11 Mii fúngi myɛ maa tɔ̀nɔ n pye Egiliziw wɔʔɔlɔ kurugo. Gee gi sínni taala kwɔ́ɔ lè n yɛlɛ ní làlwaw syɛ́ɛnrɛ ní, mii maa pye kajoolo fun. 7Kàjáa kérigèle gele ke da pye mii ma lè tɔ̀nɔ wòʔolo, mii n gele bee córo bɔ̀nɔ wòʔolo Kirisi kéeli na. 8N fàra gee bee na, mii i kérigèle myɛ córo bɔ̀nɔ wòʔolo mii Kàfɔw Kirisi Zyezu cánni kéele na, lee li nyɔɔ n sɔ̀lɔ lè yáriri myɛ na. Woro kéeli na mii bɔ̀nɔ yáriri myɛ ni, ní i di córo kànyaʔara jàngó mii í Kirisi taa, wí pye mii tɔ̀nɔw, 9mii si pye syɛɛnsiɔn wi ni, sínni bee si a kɔ́ pye mii wólo í, lee li taagi Mowizi làlwaw ma lè í, fwɔɔ lee li taagi lè tágali báriga ni Kirisi na, sínni bee i taagi Kolocɔlɔɔ ma tágali kólogo ni. 10Gee mii caa lè, koro gi nyɛ mii í Kirisi cán, si wɔ́ɔ wi nyán-yirili sée cán, si wɔ́ɔ pye pínɛnyɛnnɛgɛ na ní wi ní wi wɔʔɔguuli ni, si wi wíri wi kùúw ni. 11Ki ga pye nya, mii a gbǎn taa bi nyán yiri kúbèle nínge ni.
Bi kàfyaali fàn sa nan li tɛɛ̀laʔali na
12Ki o nyɛ mɔ a jo mii n gee bee taa n kwɔ́ɔ í, wàlá mii n foro n kwɔ́ɔ í. Kàjáa a mii taʔa gi na wii, koro ga pye mii í gi sámaga cò, níì cán Kirisi Zyezu n wɔ́ɔ̀ mii sámaga n cò. 13Ni senyɛ̀nnɛ, mii tiimaa ga gi tímana n jo mii n kɔ́ɔ̀ gi sámaga n cò n kwɔ́ɔ wii í. Mii si i yariga nibin kpéʔele, koro gi nyɛ ncan kérigèle gele na mii sɔ̀lɔ lè, mii n fɛ̀ʔɛ gele bee na, ní i ŋàʔaná yɛʔɛ̀ ma wógèle kurugo. 14Mii i fé gbanʔama bi taa sa nan kàfyaali tɛɛlaʔala na, koro ga pye mii í li sàraw taa, sàraw bee wi nyɛ àmɛɛ Kolocɔlɔɔ syɔɔn yiri lè wi kári nyɛ̀ʔɛni na Kirisi Zyezu bárigaw ni.
15Koro na, wolo bele myɛ wo nyɔɔ n foro lè, ki n yɛlɛ wolo í da sɔ̀nguri bee sɔ̀ngí, yele si ga ni sɔ̀nguraa nikwɔɔ sɔ̀ngí yarigaa na, Kolocɔlɔɔ a wɔ́ɔ gee bee tɛ̀ɛn yele na. 16Koro ní ki myɛ ní, ki n yɛlɛ wolo í da táanri da yɛlɛgi ní wolo wojángwɔɔri ní.
17 #
1Kor 4:16; 11:1 Ni senyɛ̀nnɛ, ki n yɛlɛ yele í pínɛ pye mii tɛ́ɛlɛfɔɔlɔ. Bele be táanri lè tánʔaganmi na wolo tɛ̀ɛn yele na lè, yaa bele bee wéle. 18Níì cán pèle saʔa i táanri mɔ a jo Kirisi tiiparigi nígoolo bɛɛ. Mii n be kéeli joo n tɛ̀ɛn yele na n kwɔ́ɔ tɔlɔyɔ saʔa, mii si a ní di joo taʔa tɔ́ɔliw ni ní nyatinmɛ ní. 19Pe kwɔ́ɔmi a ba pye kálagila. Pe fícarigèle ge nyɛ pe kolocɔlɔw. Kérigèle ke da yɛlɛ bi pye be na lè fɛ̀ɛrɛ kèlē, gele bee i nyɛ be ma kpɔɔmɔ kéele. Pe sɔ̀nguri tɔ̀nɔ́ i nyɛ dulunyanw kèlē na. 20Wolo si na, wolo i nyɛ nyɛ̀ʔɛni kàʔa wòolo. Nɛɛ bee si Syɔɔfɔw a wɔ́ɔ yìri, wee wolo sige lè, wi lè Kàfɔw Zyezu Kirisi. 21Woro wi a ba wolo céri kàriga, ti lè fóomi wóro, si di kpéʔele sèjira ní woro nìjangbɔɔri cére ní bi yɛlɛ ní wi séekpɔɔw falipyeganma ní, séekpɔɔw bee ní wi a ba yáriri myɛ jáa.
Currently Selected:
Filipikaʔa ye 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
