Filemɔn 1
1
Fòów kéele
1Mii Pɔli, wi lè kàsow ni n yɛlɛ ní Kirisi Zyezu kínidɛnɛgi ní, mii ní wolo senyɛnw Timɔte ní, wolo a sɛ́bɛw naa tórigo mɔ ma, Filemɔn, mɔ wi lè wolo syɛɛn-nidaanmaw ní wolo falipyenyɛnw, 2#Kɔl 4:17 wolo a wi tórigo yele ma, mɔ, ní wolo senyɛnjew Apya, ní wolo kapɛɛnkpumɔnnyɛnw Arisyipi ní, n fàra Egiliziw na wi nyɛ lè mɔ kpáagi ni. 3Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma.
Filemɔn tàmagi ní wi tágali kéele
4Mii i bariga kaangi mii Kolocɔlɔw ma làla o làla, ní i mɔ mɛ́ɛgi yiri mii nyɛ́ɛriyi ni. 5Níì cán àmɛɛ mɔ tàmaga le lè ní Kolocɔlɔɔ syɛɛncanbèle myɛ ní, ní àmɛɛ mɔ tága Kàfɔw Zyezu na lè, mii i gee bee lúro. 6Mii i wi nyɛ́ɛri koro ga pye pínɛnyɛnnɛgi ni wo nyɛ lè tágali báriga ni, gee bee í gi kaan mɔ í dùbaw myɛ cán, wee wolo taa lè Kirisi ma. 7Ni senyɛnnɛ, mɔ tamagi kéele n fundaanra saʔa kaan mii ma níì mii kɛɛlɛ, níì cán mɔ n ŋɔ́ndaala kaan Kolocɔlɔɔ syɛɛncanbèle ma be fúnyi ni.
Pɔli n Onɛziimi kùsulugi kpéʔele
8Gee bee na, àlí n gi yaʔa fànʔa i nyɛ mii ma Kirisi bárigaw ni bi dée gi joo gbàn mɔ ma gee mɔ yɛlɛ bi kpéʔele lè, mɔ í gee bee kpéʔele, 9koro ní ki myɛ ní tàmagi kéele na mii mɔ nyɛ́ɛri. Mii Pɔli wi lè nànlɛɛɔ, ní wɔ́ɔ i nyɛ kàsow ni tɔ́ɔliw ni n yɛlɛ ní Kirisi Zyezu kínidɛnɛgi ní, 10#Kɔl 4:9 mii i mɔ nyɛ́ɛri mii pìíw kéele na, wee mii see naa lè kàsow ni, woro wi nyɛ Onɛziimi, 11wee wi da sélì pye lè mɔ ma tɔ̀nɔ fun, wi si i nyɛ ní tɔ̀nɔ ní tɔ́ɔliw ni wo myɛ siinw ma, mɔ ní mii ní.
12Mii n wi lúrugo n tórigo mɔ ma, ki i nyɛ mɔ a jo mii tiimaa fúngi mii tórigo mɔ ma. 13Mii maa séli ni sɔ̀ngí bi wi yaʔa naa niyɛɛ daana, koro ga pye lǎlee myɛ mii a kwɔ́ɔ naa lè kàsow ni Syɛɛnjóocǎnri kéele na, waa mii màkow nyɔɔgi mɔ sindɛɛgi ni. 14Mii si ga fɔ̀lɔ bi yafyɛn kpéʔele mɔ sɔnguri sìnján ni í, jàngó kacǎnni mɔ a kpéʔele lè, ki a kɔ́ pye mɔ a jo ŋàʔanaga kéele í, fwɔɔ gi yiri mɔ tiimaa fúngi ni.
15Dɔ̀ʔɔ́ kéelee na wi da láʔa mɔ na bi làla cɛɛri kwɔ́ɔ lè, loro li nyɛ jàngó mɔ í ní wi taa wi pye mɔ wóo làla o làla, 16kàjáa wi a ní pye àmɛɛ puloo nyɛ lè í, wi n sɔ̀lɔ puloo na, tɔ́ɔliw ni wi i nyɛ wo senyɛn-nidaanmaɔ, wi kéeli n mii dɛ́nɛ gbanʔama, ki si ga pye wi kéeli n mii dɛ́nɛ nya, wi kéeli a sèʔé mɔ dɛ́nɛ bi sɔ̀lɔ mii na, céri kàbaan na ní Kàfɔw kàbaan na.
17Gee bee na, kapye mɔ n mii córo mɔ pínɛnyɛnnɛ, mi wi láa mɔ a jo mii tiimaa wii. 18Kapye wi maa kolo mɔ ma keelaa ni, wàlá mɔ fwɔ́ɔlɔ i nyɛ wi na, maa gee bee córo mii na. 19Mii Pɔli wi dee naa sɛ́bɛ ní mii tiimaa kɔ́gi ní, mii a gi sàra mɔ ma, ki náa o nyɛ mii í gi joo mɔ ma, si jo mii fwɔ́ɔlɔ i nyɛ mɔ na í, mɔ tiimaa wi nyɛ fwɔ́ɔli bee. 20Kányɛʔɛ na, ni senyɛnnɛ, mii pɔʔɔ mí gee naa kpéʔele mii ma Kàfɔw mɛ́ʔɛ na. Mii fúngi nyíngi Kirisi ni.
21Amɛɛ mii gee naa sɛ́bɛ bi tórigo mɔ ma lè, mii n tága gi na mɔ a gi lóʔo mii ma, àlí mii n gi cán mɔ a gi kpéʔele bi sɔ̀lɔ mii wojoori na. 22Ki n yɛlɛ mɔ í wɔ́ɔ tɛɛ̀syɔnʔɔ sámaga mii ma yaà làrinijanni ni, níì cán mii sɔ̀nguri i nyɛ gi na n jo Kolocɔlɔɔ a nyɔɔ mii na si ní mii kaan yele ma yele nyɛ́ɛriyi báriga ni.
Fòosanw kéele
23 #
Kɔl 1:7; 4:12 Epafirasi wi lè mii kàsolenyɛnw Kirisi Zyezu kéeli na, wi n mɔ syáanri, 24#Kap 12:12,25; 13:13; 15:37-39; 19:29; 27:2; Kɔl 4:10,14; 2Tim 4:10,11 n fàra mii falipyenyɛnbèle na be lè Mariki, ní Arisitaki, ní Demasi, ní Luki ní!
25Ki n yɛlɛ Kàfɔw Zyezu Kirisi í wi kpɔ́ʔɔri le yele pìígèle ni.
Currently Selected:
Filemɔn 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
