Heburubèle 1
1
Kolocɔlɔɔ n baa joo wolo ma wi Jáaw ni
1Booma ni Kolocɔlɔɔ maa ni wi syɛ́ɛnri nyuu kanyaajoobèle ma, a be i di nyuu wolo tóolɛɛbèle ma làrigēle saʔa ni jooganmi féleye saʔa na, 2kàjáa wi n baa joo wolo ma wi jáaw ni cányi naa ni yi lè canzanyi. Woro bárigaw ni Kolocɔlɔɔ dulunyanw kpéʔele, níì wi télege wi pye yáriri myɛ kɔriliio. 3Jaafɔw bee wi nyɛ lè Kolocɔlɔɔ nìjangbɔɔri darigala, ní wi niwiriw, wi bárigaw syɛ́ɛnrɛ n dulunyanw yárira myɛ tɔʔɔ n yérige. Lǎli ni wi kapeegèle jéemununɔ kpéʔele n kwɔ́ɔ lè, a wi sáà tɛ́ɛn nyɛ̀ʔɛni ni, Nìjangbɔɔri Fɔ́lɔ kàliige ma.
Jaafɔw n kpɔ́ʔɔ n sɔ̀lɔ nyɛ̀ʔɛni tundunbéle na
4A Kolocɔlɔɔ mɛ́ɛgaa le wi na, gee gi kpɔ́ʔɔ n sɔ̀lɔ nyɛ̀ʔɛni tundunbéle wóyo na lè, àmɛɛ wi kpɔ́ʔɔ n sɔ̀lɔ be na lè. 5#Ŋún 2:7; 2Sam 7:14; 1Cán 17:13 Nyɛ̀ʔɛni tundunwìí má Kolocɔlɔɔ kɔ́ɔ̀ gi joo níì jo: «Mɔ wi nyɛ mii Jáaw, mii n mɔ see níjanʔa?» Ba wìí kéele na wi kɔ́ɔ̀ gi joo níì jo: «Mii a pye wi ma tofɔlɔ, wí pye mii ma jaafɔlɔ?»
6 #
Làlw 32:43
Lǎli ni si Kolocɔlɔɔ da wi pìiseliw lége lè dulunyanw ni, a wi gi joo níì jo: «Ki n yɛlɛ nyɛ̀ʔɛni tundunbéle myɛ í da wi kpɔ̀ʔɔrɔ́.»
7 #
Ŋún 104:4
Dee wi da joo nyɛ̀ʔɛni tundunbéle kéele na lè, toro di nyɛ dee naa: «Wi i wi nyɛ̀ʔɛni tundunbéle kpéʔele káfalaya, ní i wi falipyebèle kpéʔele naanyìnye.»
8 #
Ŋún 45:7-8
Kàjáa dee wi da joo lè Jaafɔw kéele na, toro di nyɛ dee naa:
«Ee, Kolocɔlɔɔ,
mɔ fangoli a kòro beè làla o làla kwɔ́ɔmɔ fun.»
Ní níì jo: «Sínni li nyɛ mɔ fangi kàgbeele.
9Sínni n mɔ dɛ́nɛ,
á kolomi mɔ bɛɛn.
Koro na ee Kolocɔlɔɔ,
mɔ Kolocɔlɔw
n fundaanra sìnmɛ wo mɔ na
n mɔ kpɔ́ʔɔ n sɔ̀lɔ mɔ pínɛnyɛnbèle na.»
10 #
Ŋún 102:26-28
Ní níì jo:
«Kàfɔw, mɔ wi tári kpéʔele làrizelili ni.
Nyɛ̀ʔɛni ní li yáriri i nyɛ mɔ kɔ́yi yakpéʔelere.
11Ti si a ba kwɔ́ɔ,
mɔ si a kòro beè.
Ti myɛ a ba lɛɛ àmɛɛ burogo nyɛ lè.
12Mɔ a di kùru àmɛɛ burogbɔʔɔ nyɛ lè,
ti a kàri àmɛɛ burogo nyɛ lè,
kàjáa mɔ a kòro kanijanmi na,
mɔ yɛ́ɛgèle a kwɔ́ɔ bi nyaa í.»
13 #
Ŋún 110:1
Nyɛ̀ʔɛni tundunwìí má si Kolocɔlɔɔ kɔ́ɔ̀ gi joo làlaa faala ni níì jo:
«Ba tɛ́ɛn mii kàliige ma bi taa
mii í ba mɔ nigoobèle kpéʔele mɔ tɔ́lɔyi yataʔaga?»
14Nyɛ̀ʔɛni tundunbéle myɛ o nyɛ pìigēle, gele ge Kolocɔlɔɔ fáliw kpéʔele lè ì? Wi i ge tungu syɔɔli kɔriliibéle dɛɛmɛnɛ kéele na.
Currently Selected:
Heburubèle 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
