Nahumi 2
2
1 #
Eza 52:7
Syɛɛnjóocǎnri joofɔlɔ tɔ́lɔyɔ wéle yee nyanbeleyi na,
yɛɛ̀nyingi kéele wi nyuu ni tèé!
Da mɔ fɛ́tiibèle kpéʔele, Zyuda,
da mɔ nyɔɔfaliyi forogi!
Níì cán Sutanafɔw a ní foro mɔ níngi ni í,
wi n kálagi n yirige yaà péw.
2Kálagifɔlɔ i maa mɔ kánmi na.
Da kènirigi kpáa wéle!
Da kólogi kɔ̀rɔsíi!
Fànʔa le mɔ sárigèle ni,
lòmaana le ní mɔ fangi myɛ ní!
3Ncan Yawe a ní Zyakɔbi kpɔ́ɔmi lúrugo wi ma
àmɛɛ Isirayɛli kpɔ́ɔmi nyɛ lè,
níì cán yafuguru-mí-láabèle n be yáriri fuguri n láa
níì be ɛrɛzɛn tíriri cɛnɛ n kálagi.
Pe n too Niniivi na, níì wi fuguri
4Wi nànniriyi tunmɔzige-yariya n nyɛ́nɛgɛ,
sànbalipɔbèle n buronyɛɛnyɛ le.
Kapɛɛnkpumɔn-wòtorobèle túnmɔrɔ i daragi
kapɛɛnni canʔa kéele na
wi tɛ́ʔɛ lè,
tàbaabèle si i fíigi.
5Kapɛɛnkpumɔn-wòtorobèle n cúro ni fùurí ni máari kàlari-kóloyi ni,
pe i fé ni máari gbanʔama kadàlayi na.
Mɔ ga be nyaa,
pe i nyɛ àmɛɛ nìmubwɔɔgéle náa nyɛ lè,
pe i syée kelekele àmɛɛ nyɛ̀ʔɛni nyɛ́ʔɛnɛmɛ nyɛ lè.
6Wi sɔ̀ngumi i nyɛ
wi sànbalibèle na,
kàjáa n be yaʔa be tánʔani na, pe i kpírigi.
Pe i syée kelekele kěgi tò ma,
dɛ̀ɛmɛni n foro n kwɔ́ɔ yaà.
7Cábiyi kpàánweegéle n múgu,
á fànʔafɔ-gbaagi si i tuun!
8Ki n kpéʔele, pe n wi waragi n yaʔa níbori,
pe n wi cò n kári.
Wi falipyecebèle i cɛ́ɛn àmɛɛ kàtogèlē nyɛ lè,
ní i be fìcibiyi kpúmɔn.
9 Niniivi maa pye àmɛɛ lòyo tɛɛkɔngɔ nyɛ lè,
poro si be fé ni syée bele.
Ye yére! Ye yére!
Kàjáa wàa faala o kologi ni lúrugu í.
10Ye wálifiiw fuguri ye láa!
Ye tɛ́ɛw fuguri ye láa!
Bàngwɔɔ lɔnɛʔɛrɛ i yaà
ní lɔgbanri yárira yaleye féleye myɛ ní.
11Fuguru-mí-láala,
kpúmɔn-mí-kálagila, kálagila!
Fúnyi fànʔa i kwóo,
yégunyi i pegi,
sárigèle myɛ i wɔʔɔ,
yɛɛcɔɔgèle myɛ kánma i fɛ̀ɛ́.
Niniivi i nyɛ móō càaraɔ wii, wee be jáa lè
12Sán càarabèle tɛɛlaraga nyɛ,
ki lè càarabɔ-yɛlɛbèle tɛɛkòrogo,
gee càarabɔw, ní càarajew,
ní càaraw pyà da ni nyaari ni forogi lè,
wàa faala si o be tɔ́ɔrɔ í?
13Càarabɔw maa ni kaacòro sulugu wi pìíbèle ma,
ni yaweele còrí wi càarajebèle ma,
wi maa ni wi wéeyi nyìngí kaacǒri na,
ni wi tɛɛlarayi nyìngí káari na.
14«Wéle, mii a keele tɛ́ʔɛ mɔ na,»
Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.
«Mii a wi kapɛɛnkpumɔn-wòtorobèle kàriga wírige.
Ŋɔséew a mɔ caarabɔ-yɛlɛbèle káa,
mii a mɔ yacori kwɔ́ɔ bi yirige tári ni,
syɔɔn a ní mɔ tundunbèle yákpogéle lóʔo í.»
Currently Selected:
Nahumi 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
