Nahumi 1
1
1 #
Eza 10:5-34; 14:24-27; Sof 2:13-15 Joogbanna Niniivi kánmi na. Nahumi wi lè Ɛlikɔsyi ye wów, woro yanyaagi sɛ́bɛ wii.
Yawe i nyɛ fyáakpɔɔrɔ Kolocɔlɔɔ, níì nyɔɔ
2Yawe i nyɛ yejaʔa Kolocɔlɔɔ,
wi i kapeegèle gɔ̀lɔ́ wóo.
Yawe i kapeegèle gɔ̀lɔ́ wóo,
wi n nyìn fundanʔagbɔɔri na.
Yawe i wi kàsiitun-nyɛ́nbèle kapeegéle gɔlɔ́ wóo be na,
wi n fundanʔara kɔn n yaʔa wi nigoobèle kánma na.
3Yawe fúngi o taanri kelekele í,
wi fǎngi n tɔ̀nɔ n kpɔ́ʔɔ.
Wi tɔ̀nɔ́ o kòró wɔʔɔlɔ sindaʔa ni í.
Yawe i wi kólogi wóo káfala-sìnjinni ni,
ní káfalakpɔɔgi nínge ni,
fàfaanyi i nyɛ wi tɔ́lɔyi cíbige.
4Wi i fúlo sólomi lɔ́ʔɔ na ní i gi waari,
wi i cábiyi myɛ lòyo syɔɔnri.
Basyan ní Karimɛli fǎngi i kálagi ni syée,
Liban tiifyɛɛnri i fánagi.
5Wi i nyanbeleyi cɛ̀lɛ́,
á dǎndamayi si i nyangi.
Tári i tugu ni yìrigí wi yɛʔɛ̀ ma,
n fàra dulunyanw, ní wi fúngi wòolo myɛ na.
6Wìí wi a gbǎn soro yére bi wi fundanʔagbɔɔri sige?
Wìí wi a gbǎn yére bi wi fundanʔari naagbanga sige?
Wi fundanʔari i caragi àmɛɛ naà nyɛ lè,
wi i fálayi jabagi.
7Yawe n nyɔɔ,
wi i nyɛ tɛɛlaraga wɔʔɔgi
canʔa na.
Bele be làrá wi taana lè,
wi i be kɔ̀rɔsíi.
8Lǎli ni lǒgi kùnguruyo
ga kabi lè
wi a yi tɛ́ʔɛ bi tɛ́ɛgi bee kálagi péw,
wi si a wi nigoobèle kɔ́ri láa fwɔɔ bi sa lége yébilimi ni.
Tundunri di taʔala tiyɛɛ na Zyuda ní Niniivi kéeli na lè
9Nyàʔá yele déē tímana Yawe kánmi na?
Woro wi kálagila kpéʔele ni kwóo mɛnɛ mɛnɛ.
Wɔʔɔgi a ní pye tɔziin í.
10Alí pe ga pye àmɛɛ wúuro tiipiire nyɛ,
dee di fala tiyɛɛ ni lè,
níì be yɛ́ɛyi wɔ́ɔ ní be sínmi ní,
pe a ba sógi mɛnɛ mɛnɛ àmɛɛ nyàáwaʔa nyɛ lè.
11Wàa n yiri mɔ ni,
wee wi kapeʔe tímana Yawe kánmi na lè,
wee fúngo ni gbanzan katimanara da pye lè.
12Yawe wi syɛ́ɛnri naa joo níì jo:
«Alí pe ga foro, pe nɛʔɛni ní gi myɛ ní,
pe a ba kɔni ní kɔnigɔ ní ki kwɔ́ɔ nya.
Mii i caa bi mɔ cɛ́rɛ,
jàngó mii a ní kɔ́ ba jo mii a mɔ cɛ́rɛ í.
13Mii a wi zúuw kabi tɔ́ɔliw ni bi láʔa mɔ na,
mii a mɔ yapwɔɔri cɛnɛ bi láʔa mɔ na.»
14Tundunri di nyɛ dee naa,
dee Yawe joo n gbàn mɔ kéeli na lè, wi n jo:
«Mɔ a ní yòdaʔaya taa,
yee na mɔ mɛ́ɛgi a taʔa lè í.
Mii a ǹdedanyi,
ní tunmɔgbalari yasunyo kálagi yirige
mɔ kolocɔlɔbèle kpaʔa ni.
Mii a mɔ nyángi sámaga yaʔa,
níì cán mɔ ní o nyɛ yakpɔɔlɔ mii ma í.»
Currently Selected:
Nahumi 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
