Matye 26

Zyefubèle yɛɛ̀kinibéle n joo n bɛ̀ɛ Zyezu kpóoli kéele na

(Mar 14:1-2; Luk 22:1-2; Zyan 11:45-53)

1A Zyezu ga syɛ́ɛnri bee myɛ joo n kwɔ́ɔ, a wi wi pìitamabèle pye: 2#Yir 12:1-27 «Yele n gi cán canya siin yi kòro, Sɔ̀lɔ-mí-yaʔali séri si nan. Pe si a Syɔɔn-pya le wi nigoobèle kɔ́yɔ ni pe wi kóri tiiparigi na.»

3Lǎli bee ni a sáriga-wòlobèle kàfɔɔlɔ ní Zyefubèle wólɛɛbéle peyɛɛ gbóʔoro sáriga-wòlobèle kàfɔgbɔɔɔ kacoolo ni, wee be yiri lè Kayifu. 4A be sáà gi tímana ní peyɛɛ ní àmɛɛ poro a gi pye lè bi sɛ́ɛ, si Zyezu lɛ́ɛlɛ taa cò bi kpóo. 5Kàjáa pe maa jo: «Ki ga yɛlɛ gi pye sériw làla ni í, jàngó kàfulogo a kɔ́ yìri syɛ́ɛnbèle nínge ni í.»

Cewaa n nùndaanna sìnmɛ wo Zyezu nyúngi ni

(Mar 14:3-9; Zyan 12:1-8)

6Lǎli ni Zyezu pye lè Betanii ni Siimɔn kpáagi ni, wi lè yaanyɛɛnmi fɔ́lɔ, 7#Luk 7:37-38 a cewaa nùuni wi na ní lɔgbanra nundaanna sinmɛ ní, sìngbopile ni, n baa wo wi nyúngi ni n wi yaʔa lìíli na. 8A pìitamabèle ga gee bee nyaa, a be fúnyi fala n tanʔa a be jo: «Nyàʔá gi nyɛ kálagili naa nyúngo? 9Ki maa yɛlɛ pe dée sǐnmi naa pára lɔgbanra na bi kaan foomɔfɔbèle ma.»

10Amɛɛ Zyezu gi cán lè, a wi be pye: «Nyàʔá na yele wári nya céw na? 11#Làlw 15:11 Kacànna wi pye mii na. Níì cán foomɔfɔbèle a pye naa ní yele ní làla o làla, kàjáa mii a pye ní yele ní làla o làla í. 12Wi n nùndaanni naa sìnmɛ wo mii céri na mii kùúw yɛ́ʔɛ na. 13Mii a gi joo yele ma kányɛʔɛ ni, syɛ́ɛnbèle ga ni Kolocɔlɔɔ Syɛɛnjóocǎnri nyuu dulunyanw ni tɛʔɛ o tɛʔɛ ni, gee céw naa kpéʔele lè, pe a wɔ́ɔ ra gi nyuu yaà, pe a fɛ̀ʔɛ wi na í.»

Zyudasi i caa bi Zyezu le sáriga-wòlobèle kàfɔɔlɔ kɔ́yɔ ni

(Mar 14:10-11; Luk 22:3-6)

14Koro kàdoʔo ma a wàa yìri kɛɛ ní siinw nínge ni n kári sáriga-wòlobèle kàfɔɔlɔ ma, pe i wi yiri Zyudasi Isikariyɔti. 15#Zak 11:12 A wi sáà be pye: «Mii ga wi le yele kɔ́yi ni, nyàʔá yele a kaan mii ma?» A be wálifiio tɛɛyɛ toko ní kpɔrigɔ córo n kaan wi ma. 16Lǎli bee ni a wi fala n séli ni làrijànna caa bi Zyezu le be kɔ́yi ni.

Zyezu n Sɔ̀lɔ-mí-yaʔali séri lìile lìi ní wi pìitamabèle ní

(Mar 14:12-21; Luk 22:7-14,21-23; Zyan 13:21-30)

17Levé fun búruw séri cânzelige na, a pìitamabèle pan Zyezu ma n baa wi pye: «Sán mɔ caa wolo í sa Sɔ̀lɔ-mí-yaʔali séri lìile sámaga mɔ ma, mɔ í lìi?» 18A wi be yari: «Yaa syée ye sa jée kěgi ni nànwaa ma, yé wi pye, Tamafɔw n jo woro lǎli n nan, koro na woro ní woro pìitamabèle a ba Sɔ̀lɔ-mí-yaʔali séri lìile lìi mɔ kpáagi ni.» 19A pìitamabèle kári n sáà gi kpéʔele àmɛɛ Zyezu gi joo be ma lè, níì Sɔ̀lɔ-mí-yaʔali séri lìile sámaga.

20A ki ga pye cânjeevɔngi na, a wi tɛ́ɛn ni líi ní wi pìitamabèle kɛɛ ní siin ní. 21N be yaʔa lìíli na, a wi be pye: «Mii a gi joo yele ma kányɛʔɛ ni, wàa i naa yele níngi ni, wee wi a mii le lè nigoobèle kɔ́yɔ ni.» 22A be yɛ́ɛyi tɔ̀nɔ n tanʔa be na gbanʔama. A be fala n séli ni wi yíbe nibin nibin níì jo: «Mii lé, Kàfɔw?»

23 # Ŋún 41:10 A wi be yari: «Wee wi wi kɔ́gi nii lè ní mii ní pɛ́ɛli ni, wee bee wi a mii le be kɔ́yi ni. 24Syɔɔn-pya tɔ̀nɔ́ i syée àmɛɛ ki da sɛ́bɛ lè wi kéeli na. Kàjáa wɔʔɔli a pye nǎnw bee na, wee wi a Syɔɔn-pya cǒ kaan lè! Ki da caà yɛlɛ pe dée nǎnw bee see í.»

25Zyudasi wi lè wi levɔw, a woro wi yari: «Tamafɔw, mii wi lé?» A wi wi pye: «Ɛɛn.»

Lìizanni kéele

(Mar 14:22-26; Luk 22:15-20; 1Kor 11:23-25)

26Lǎli ni be pye lè lìíli na, a Zyezu búruw láa níì bariga kaan Kolocɔlɔɔ ma níì wi kabagi n lɛɛ pìitamabèle na níì jo: «Ye wi syɔɔ ye lìi. Wee naa wi nyɛ mii céri.» 27Koro kàdoʔo ma a wi yagbaala láa níì bariga kaan Kolocɔlɔɔ ma níì li kaan be ma níì jo: «Ye myɛ ye gbaa li ni. 28#Yir 24:8; Zyer 31:31-34 Níì cán wee naa wi nyɛ mii sìsyaanw, joogaanni sìsyaan, wee wi wo lè syɛ̀ɛnnɛ saʔa kapeegéle kusulugo kéele na. 29Mii a gi joo yele ma kányɛʔɛ ni, nlaʔa níjanʔa na mii a ní ɛrɛzɛn tírire yasanra lógi naa kàa gbaa nyáana í, bi taa cángi í ba nan gee ni mii a ní gi gbaa lè ní yele ní kavɔn mii Tóow fànʔa ni.»

30Koro kàdoʔo ma a pe ga ŋùu n kwɔ́ɔ, a be yiri n kári Olivye tíiri nyanbelege ma.

Zyezu n jo Pyɛri a woro cée

(Mar 14:27-31; Luk 22:31-34; Zyan 13:36-38)

31 # Zak 13:7 Lǎli bee ni a Zyezu be pye: «Yele myɛ a mii cée yébiligi naa ni. Níì cán ki maa sɛ́bɛ níì jo: ‹Mii a bànaʔaw kpúmɔn kpóo, bàtogi si cariga.› 32#Mat 28:16 Mii si ga baa nyán, mii a kári Galile tári ma yele yɛ́ʔɛ na.»

33A Pyɛri wi pye: «Alí bele myɛ ga mɔ cée, mii a tée mɔ cée í.» 34A Zyezu wi yari: «Mii a gi joo mɔ ma kányɛʔɛ ni, àlí yébiligi naa tiimaa ni sáni gòpɔ́w í nyɛni lè, mɔ a mii cée tɔlɔyɔ taanri.» 35A Pyɛri wi yari: «Alí ki ga yére mii í kùu ní mɔ ní, koro ki a tɔ́ɔ pye, mii a tée mɔ cée í.» A pìitamabèle wozanbèlē myɛ wɔ́ɔ̀ fala ni syɛɛnnijanri nyuu.

Zyezu i nyɛ́ɛri Zyɛtisemane ma

(Mar 14:32-42; Luk 22:39-46)

36Lǎlee ni Zyezu ní wi pìitamabèle nan lè tɛ́ɛgi na, gee be yiri lè Zyɛtisemane, a wi be pye: «Ye tɛ́ɛn nɛɛ naa, mii si kári yɛʔɛ̀ ma bi sa nyɛ́ɛri.»

37A wi Pyɛri ní Zebede jáabèle siin kɔ́ri n kári. A funjurugori ní fúngi wɔʔɔgɔ sáà séli n jée wi ni. 38A wi be pye: «Mii fúngi n curugo mii na gbanʔama, fwɔɔ n baa nan kùúw na, ye kòro nɛɛ naa, yé pye nyɛ̀nɛ na ní mii ní.» 39A wi ga sɛ̀ʔɛrɛ yɛʔɛ̀ ma cɛɛri, a wi too n wi yɛ́ɛgi cíbele ní i nyɛ́ɛri níì jo: «Mii Tóow, kapye ki a gbǎn kpéʔele, ki n yɛlɛ yagbaagi naa í léeli mii na! Kàjáa ki ga yɛlɛ mii nyɛ́nɛ kéeli í kpéʔele í, fwɔɔ mɔ nyɛ́nɛ wóli.»

40A wi ga lúru n pan pìitamabèle ma, a wi baa be nyaa pe i ŋúnɔ. A wi Pyɛri pye: «Alí yele ga gbàn lé n kòro nyɛ̀nɛ na ní mii ní bi lɛ́ɛri nibin kwɔ́ɔ í? 41Ki n yɛlɛ ye kòro nyɛ̀nɛ na yáā nyɛ́ɛri koro ga pye yarigaa a kɔ́ yele kárima bi lége kapeele ni í. Ki láagi i nyɛ syɔɔn pili na, kàjáa wi céri fànʔa n cɛ́rɛ.»

42A wi núngo be taana tɔziin wógi na, n sa ni nyɛ́ɛri níì jo: «Mii Tóow, kapye mii a gbǎn kòro yagbaagi naa sìngbaa ni í, ki n yɛlɛ mi mɔ nyɛ́nɛ kéeli yaʔa li foro.»

43A wi ga lúru n pan, a wi ní baa be nyaa pe i ŋúnɔ, níì cán ŋúnɔmi maa be jáa gbanʔama.

44A wi be yaʔa yaà níì kári n sa ni nyɛ́ɛri tɔdaanri wógi na, ní níì syɛɛnnijanri joo. 45A wi ga lúru n pan pìitamabèle ma a wi baa be pye: «Yaa ŋúnɔ tɔ́ɔliw ni, ye ŋɔ́n ye daa! Ye wéle, lǎli n nan, pe n Syɔɔn-pya le kapeebyebèle kɔ́yɔ ni. 46Ye yìri wo kári. Ye wéle, wee wi a mii le lè be kɔ́yi ni, woro wi nan n kwɔ́ɔ wee.»

Zyezu cǒli kéele

(Mar 14:43-50; Luk 22:47-53; Zyan 18:3-12)

47Lǎli ni wi sèʔê pye ni nyuu lè, a Zyudasi pan, wi lè kɛɛ ní siinw ni. A syɛ̀ɛnnɛ saʔa pan ní wi ní ŋɔséebéle ní kàgbeegēle si maa pye be ma, sáriga-wòlobèle kàfɔɔlɔ ní Zyefubèle wólɛɛbéle pe da be tun. 48Woro wee wi nyɛ lè wi levɔw be kɔ́yi ni, wi maa joo n tɛ̀ɛn be na níì be pye: «Mii ga sáà wee syɔɔnri lè, woro wii, ye wi cò.» 49A wi fala n nùuni Zyezu na níì wi pye: «Mɔ o faana, Tamafɔw.» Níì wi syɔɔnri syɔɔnri. 50A Zyezu wi yari: «Ni tàannyɛnnɛ, gee mɔ pan ba kpéʔele lè, mi gi kpéʔele.»

Lǎli bee ni a be fala n kpóʔoro Zyezu na n wi cò. 51Bele be da pye lè ní Zyezu ní, a poro wàa wi ŋɔséew kɔ́n n sáriga-wòlobèle kàfɔgbɔɔɔ falipyeo kpúmɔn n líigi láʔa wi na. 52A Zyezu wi yari: «Mi mɔ ŋɔséew lúrugo mi le kpàfogi ni. Níì cán bele myɛ be ŋɔséebèle lée lè, pe a wɔ́ɔ bele bee kpóo ní ŋɔséebéle ní. 53A mɔ tɔ̀ʔɔ́ sɔ̀ngí lé mii a gbǎn mii Tóow nyɛ́ɛri jàngó wi nyɛ̀ʔɛni tundunbéle kaan mii ma pe nɛʔɛ sɔ̀lɔ lezyɔnbéle#26:53 lezyɔnbéle: Lezyɔnwaa nibin i nyɛ sùlasiibéle selebingéle taanri (6000). kɛɛ ní siin na í láà? 54Ki ga pye nya, mɛ̀ɛ́ Kolocɔlɔɔ syɛɛnsɛbɛri a gbǎn foro bi sɛ́ɛ, dee di joo lè, fwɔɔ gi pye kánmi naa na?»

55 # Luk 19:47; 21:37 Lǎli bee ni a Zyezu gi joo syɛ́ɛnmi ma níì jo: «A yele pan lé ba mii cò ní ŋɔséebéle, ní kàgbeegēle ní àmɛɛ mɔ lóʔo lè kàyuuo mii nyɛ? Mii maa ni tɛ̀ɛ́n yele níngi ni canʔa o canʔa kpɔ̀ʔɔrɔli kpaʔa ni ni syɛ́ɛnbèle tama, yele ga taa si mii cò í. 56Kàjáa gee naa myɛ n kpéʔele jàngó gi foro àmɛɛ kanyaajoobèle da gi sɛ́bɛ lè.»

A pìitamabèle myɛ fàn n cariga wi na.

Pe n Zyezu yérige kútiijoobèle yɛ́ʔɛ ma

(Mar 14:53-65; Luk 22:54-55,63-71; Zyan 18:13-14,19-24)

57Bele be Zyezu cò lè, a be wi kɔ́ri n kári Kayifu ma, wi lè sáriga-wòlobèle kàfɔgbɔɔɔ, beè làlwaw sɛ́bɛwelebéle ní wolɛɛbèle da peyɛɛ gbóʔoro lè. 58A Pyɛri taʔa wi na, wi si ga fɔ̀lɔ n nùuni wi na í, n taa n sáà nan sáriga-wòlobèle kàfɔgbɔɔɔ kacoolo na, níì jée n tɛ́ɛn ní falipyebèle ní, jàngó woro í gi kwɔ́ɔmi nyaa.

59A sáriga-wòlobèle kàfɔɔlɔ ní Sanedirɛnw myɛ i jànvaa séera kéelaa caa bi jo taʔa Zyezu na, koro ga pye poro í wi taa kpóo. 60Alí àmɛɛ jànvaa séerafɔbèle wírè pan lè wonɛʔɛbéle ní, pe ga gbàn n jànvaa kéelaa taa í. Koro kàdoʔo ma a pèle siin pan 61#Zyan 2:19 n baa jo: «Nǎnw naa n jo woro a gbǎn kpɔ̀ʔɔrɔli kpaʔa cáan, si gi faan canya taanri nínge ni.» 62A sáriga-wòlobèle kàfɔgbɔɔɔ yìri n yére níì wi yari: «Mɔ ga yarigaa taa bi joo wii ì? Nyàʔá be nyuu ni taari mɔ na?» 63A Zyezu pyèri. A sáriga-wòlobèle kàfɔgbɔɔɔ wi pye: «Ki n yɛlɛ mi kàli Kolocɔlɔɔ woweew na, mí gi joo wolo ma kányɛʔɛ ni kapye mɔ wi nyɛ Kirisi, Kolocɔlɔɔ Jáaw.» 64#Dan 7:13 A Zyezu wi yari: «Ɛɛn, mii wii. Mii si a gi joo yele ma, yele a kɔ́ Syɔɔn-pya nyaa wodɛ́ɛɔn ní séew myɛ fɔ́lɔ Kolocɔlɔɔ kàliige ma, si wɔ́ɔ kɔ́ wi nyaa waa maa fàfaanyi ni.» 65#Lev 24:16 A sáriga-wòlobèle kàfɔgbɔɔɔ wiyɛɛ búroyi sulugu níì jo: «Wi n Kolocɔlɔɔ mɛ́ɛgi kálagi. Nyàʔá na wolo ní i séerafɔɔlɔ caa? Yele n Kolocɔlɔɔ mɛ́ɛkalagi-syɛ́ɛnri lóʔo wi nyɔ́ɔgi na tɔ́ɔliw ni. 66Nyàʔá yele sɔ̀ngí wi kéeli na?» A be wi yari: «Wi n yɛlɛ ní kpóolo ní.»

67 # Eza 50:6 A be i tɛ́ɛri wáa wi yɛ́ɛgi ni ní i wi cínɛ ní kágungèle ní, pèle si i wi kpúmɔn ní kadaagèle ní 68níì jo: «Kirisi, wìí wi mɔ kpúmɔn? Mi wi tɛ̀ɛn wolo na.»

Pyɛri n Zyezu cée

(Mar 14:66-72; Luk 22:56-62; Zyan 18:15-18,25-27)

69Pyɛri si maa pye kàfugi na wodɛ́ɛɔn ní kàcooli ni. A falipyecewaa pan n baa wi yari: «Mɔ maa wɔ́ɔ̀ pye ní Zyezu ní, wi lè Galile ye wów.» 70Kàjáa a wi gi kábala pe myɛ nyɛ́nɛ na níì jo: «Gee mɔ nyuu lè, mii ga gi cán í.» 71A Pyɛri yiri kàfugi na n sáà yére nìkpaangi ni. A falipyecewaa nikwɔɔ wi nyaa níì gi joo tɛ́ɛgi bee syɛ̀ɛnnɛ ma níì jo: «Wee naa maa pye ní Zyezu ní, wi lè Nazarɛti ye wów.» 72A wi níì gi kábala níì kàli níì jo: «Mii ga nǎnw bee cán í.»

73A cɛɛri ga pye, bele be pye yaà lè woyérebéle ní, a poro nùuni Pyɛri na n baa wi pye: «Mɔ i nyɛ syɛ́ɛnbèle bee wàa kányɛʔɛ ni, níì cán mɔ jooganmi n gi tɛ̀ɛn.» 74A wi fala ni joobeemi nyuu ní i kɛ̀ɛ́ níì jo: «Mii ga nǎnw bee cán í.» A gòpɔ́w fala n nyɛni. 75A Pyɛri Zyezu syɛ́ɛnri sɔ̀ngi n taa dee wi da joo woro ma lè níì jo: «Sáni gòpɔ́w í nyɛni lè, mɔ a mii cée tɔlɔyɔ taanri.» A wi yiri kàfugi na n sa ni nyaan gbanʔama.

Currently Selected:

Matye 26: CB10

Highlight

Copy