Matye 25

Pìcaabèle kɛɛ kàseele

1 # Luk 12:35 «Lǎli bee ni nyɛ̀ʔɛni fànʔa a ba pye àmɛɛ pìcaala kɛɛ da pye lè, bele pe da be fètingèle láa n kári cefɔɔn fɔ́lɔ tɛɛfaraga ni lè. 2Pèle kagunɔ maa labala, á pèle kagunɔ si cìlige. 3A nilabalabèle be fètingèle láa, pe si ga sìnmɛ láa peyɛɛ gurugo í. 4Kàjáa sícilibèle maa sìnmɛ láa yaleyaa ni peyɛɛ gurugo. 5Amɛɛ cefɔnw fɔ́lɔ mɔn yaà lè, a ŋúnɔmi kɔ́ɔ̀ pe myɛ jáa, a be i ŋúnɔ.

6A nyǐngi ga lɛɛ, a be yákpolo lóʔo a li jo: ‹Cefɔnw fɔ́lɔ wéle wee, ye yiri ye sa wi fàra!› 7Lǎli bee ni a pìcaabèle bee myɛ yìri ŋúnɔmi na ni be fètingèle sámagi. 8A nilabalabèle gi joo sícilibèle ma níì jo: ‹Ye yele sìnmaa kaan wolo ma, níì cán wolo fètingèle i caa bi fígi.› 9A sícilibèle be pye: ‹Eʔe, gee gi pɔ́rɔ lè, yaa syée yapárabèle ma ye sa pàa syɔɔ yeyɛɛ ma, kapye koro ban í, bee naa a gbǎn wo myɛ yɛlɛ í.› 10A pe ga kári bi tɛɛsyɔɔgi ni, a cefɔnw fɔ́lɔ kàri n pan a wozamaga-gwɔ́ɔbèle baa pínɛ n jée ní wi ní cèpɔrigi kpaʔa ni, á be kɔ̀rigi tɔ́n. 11#Luk 13:25 Koro kàdoʔo ma a nilabalabèle pan n baa jo: ‹Kàfɔw, kàfɔw, kpáagi múgu wolo ma.› 12A wi si be yari: ‹Mii a gi joo yele ma kányɛʔɛ ni, mii ga yele cán í.›

13Koro na gi yɛlɛ yaa kɔ̀rɔsíi níì cán yele ga cángi bee ní lǎli cán í.

Falipyebèle taanri kéele

(Luk 19:11-27)

14 # Luk 19:11-27 «Ki i nyɛ àmɛɛ nànwaa da ni syée lè kùlo ni níì wi tiimaa falipyebèle yeri n baa wi kɔlɔ̀ yáriri kàlifáa be ma. 15A wi sirakamayɛ kagunɔ kaan wàa ma, níì siin kaan wee ma, níì nibin kaan wee ma, wi maa pe myɛ kaan n yɛlɛ ní be fǎngi kánma ní, ní náà láa n kári. 16Wee wi sirakamayi kagunɔ taa lè, a wi fala n kári n sa ni jàgiw wáa ní yi ní n ní baa sirakamayaa kagunɔ tɔ̀nɔ taa. 17Kánmi bee na siinw fɔ́lɔ wɔ́ɔ̀ sirakamayaa siin tɔnɔ taa. 18Kàjáa wee wi nibinw taa lè, a wi wálifiiw bee láa n sáà túgu n tɔ́n tári ni, wee wi kàfɔw da kaan wi ma lè.

19A ki ga mɔn gbanʔama, a falipyebèle bee kàfɔlɔ lúru n pan n baa córomi kpéʔele ní be ní. 20Wee má wi da sirakamayi kagunɔ kaan lè, a woro pan n baa wi pye: ‹Kàfɔw, sirakamayi kagunɔ mɔ da kàlifáa mii ma lè, wéle, mii n níì yàa kagunɔ taa n fàra yi na.› 21A wi kàfɔw wi pye: ‹Gee bee n nyɔɔ. Mɔ i nyɛ falipyejàɔn, mii n tága mɔ na, mɔ n sámaga n báara kérigèle kèle cɛɛri ni, mii si a mɔ télege kèle saʔa nyúngo na.› Níì wi pye: ‹Ba jée mii fundaanri ni.› 22Wee má wi da sirakamayi siin kaan lè, a woro wɔ́ɔ̀ pan n baa jo: ‹Kàfɔw, sirakamayi siin mɔ da kàlifáa mii ma lè, wéle, mii n níì sirakamayaa siin taa n fàra yi na.› 23A wi kàfɔw wi pye: ‹Gee bee n nyɔɔ. Mɔ i nyɛ falipyejàɔn, mii n tága mɔ na, mɔ n sámaga n báara kérigèle kèle cɛɛri ni, mii si a mɔ télege kèle saʔa nyúngo na.› Níì wi pye: ‹Ba jée mii fundaanri ni.› 24Wee má wi da sirakamaw kaan lè, a woro wɔ́ɔ̀ pan n baa jo: ‹Kàfɔw, mii n gi cán ncan mɔ kólogi n gbàn, mɔ i yaliiri lée dee di lè mɔ ga di lùgu í, ní wɔ́ɔ i yáriri koli dee di lè mɔ ga di càli í. 25Mii maa fyáa, koro na mii da mɔ sirakamaw làriga tári ni. Mɔ wáliw wi wee, wi syɔɔ.› 26A wi kàfɔw wi yari: ‹Mɔ i nyɛ falipyepeeo níì sàla, mɔ da gi cán lè ncan mii i yaliiri lée dee di lè mii ga di lùgu í, ní wɔ́ɔ i yáriri koli dee di lè mii ga di càli í, 27ki maa yɛlɛ mɔ í dée mii wáliw kaan wálitɛʔɛ-kpaagi fɔ̀ɔlɔ ma, koro ga pye mii ga lúru n pan, mii í ba tɔ̀nɔ taa wi ni. 28Koro na ye sirakamaw syɔɔ wi ma ye kaan sirakamayi kɛɛ fɔ́lɔ ma. 29#Mat 13:12; Mar 4:25; Luk 8:18 Níì cán syɔɔn o syɔɔn wi taa lè, pe a ní wi kaan koro ga pye wi taa saʔa, wee si wi fɔ̀n lè, àlí cɛɛriwee wi ga taa lè, pe a wee bee syɔɔ wi ma. 30#Mat 8:12; 22:13; Luk 13:28 Ye falipye-nifaʔagi naa cò ye sa wáa kàfugi na yébiliwɔɔli ni, beè syɛ́ɛnbèle a ra sùpiigèle wáa sáā gǎngèle kúru lè.›

Kútiisanw kéele

31 # Mat 16:27; 19:28 «Lǎli ni Syɔɔn-pya ga pan lè ní wi nìjangbɔɔri ní n fàra nyɛ̀ʔɛni tundunbéle myɛ na, lǎli bee ni wi a ba tɛ́ɛn wi nìjangbɔɔri fàngolo ni. 32Syɛɛnfeleyi myɛ a yiyɛɛ gbóʔoro wi yɛʔɛ̀ ma. Wi si a be wàli peyɛɛ na àmɛɛ bànaʔaɔ gáà bǎbèle wàli lè sikebèle na. 33Wi a bǎbèle télege wi kàliige ma, sikebèle si pye kàmɔnɔ ma. 34Lǎli bee ni fànʔafɔw a gi joo wi kàliige wóbèle ma: ‹Yaa maa, mii Tóow dùba pìibēle, ye ba fǎngi kɔ́rigɔ lìi, gee gi sámaga yele kéeli na lè nlaa yaà dulunyanw sélimɛ na. 35Níì cán kateʔe maa mii jáa, a yele mii kaan a mii lìi. Lògbaʔa maa mii jáa, a yele mii kaan a mii gbaa. Mii maa pye nibɔɔn, a yele mii nibɔnrɔ pye. 36Mii maa pye cepyá, a yele buroyo le mii na. Mii maa ni yáa, a yele pan n baa mii wéle. Mii maa pye kàsow ni, a yele pan mii ma.› 37Lǎli bee ni syɛɛnsinbèle a wi yari: ‹Kàfɔw, làlìí ni wolo kateegi nyaa mɔ na, níì mɔ kaan a mɔ lìi, wàlá n lògbaagi nyaa mɔ na níì mɔ kaan a mɔ gbaa? 38Ba làlìí ni wolo mɔ nyaa nibɔɔn, níì mɔ nibɔnri pye? Wàlá n mɔ nyaa cepyá níì buroyo le mɔ na? 39Ba làlìí ni wolo mɔ nyaa mɔ i yáa, wàlá kàsow ni, níì kári n sáà mɔ wéle?› 40Kàjáa fànʔafɔw a gi joo be ma si be pye: ‹Mii a gi joo yele ma kányɛʔɛ ni, àlí wee wi cɛ́rɛ lè mii senyɛnbèle naa myɛ ni, yele ga gi kpéʔele wee bee ma, mii má yele sèʔê gi kpéʔele.›

41Lǎli bee ni wi a gi joo wi kàmɔnɔ wóbèle ma: ‹Ye núngo mii taana yele dángaw fɔ̀ɔlɔ, ye sa jée bànvigi náagi ni, gee Kolocɔlɔɔ sámaga lè Dàzɔɔnw ní wi màdebèle kéele na. 42Níì cán kateʔe maa mii jáa, yele si ga mii kaan a mii lìi í. Lògbaʔa maa mii jáa, yele ga mii kaan a mii gbaa í. 43Mii maa pye nibɔɔn, yele si ga mii nibɔnri pye í. Mii maa pye cepyá yele ga buroyo le mii na í. Mii maa ni yáa ní wɔ́ɔ̀ pye kàsow ni, yele si ga pan n baa mii wéle í.› 44Lǎli bee ni bele bee a wɔ́ɔ wi yari: ‹Kàfɔw, làlìí ni wolo kateegi nyaa mɔ na, wàlá lògbaagi, koro ga jáa n mɔ nyaa nibɔɔn, wàlá cepyá, wàlá yaaɔ, wàlá kàsow ni, wolo si ga mɔ dɛ̀ɛmɛ í?› 45Lǎli bee ni wi a be yari: ‹Mii a gi joo yele ma kányɛʔɛ ni, àmɛɛ gi nyɛ lè, yele ga gi kpéʔele bele naa wàa wobile ma í, ye gi cán yele ga wɔ́ɔ̀ gi kpéʔele mii ma í.› 46#Dan 12:2 Bele bee myɛ a sa jée wɔʔɔli ni, lee li lè, li a kwɔ́ɔ bi nyaa í, syɛɛnsinbèle si sa jée sìibangwɔɔw ni.»

Currently Selected:

Matye 25: CB10

Highlight

Copy