Zyowɛli 4
4
Kútiiw Kolocɔlɔɔ a kúun syɛɛnfeleyi na lè
1«Níì cán cányi bee ni, ní lǎli bee ni,
Zyuda wóbèle,
ní Zyerusalɛmi wóbèle be cò n kári lè,
lǎli ni mii a be lúrugo pan lè,
2mii a syɛɛnfeleyi myɛ kpóʔoro,
mii a yi tìrige Zyozafati jǐnlɔgi ni.
Nɛɛ bee mii a pye kútii na ní yi ní
Isirayɛli ye kéeli na,
pe lè mii syɛ́ɛnbèle, ní mii kɔ́rigi,
poro bele yi cariga n tórigo syɛɛnfeleyi nínge ni lè,
ní mii tári kéele na yi lɛɛ yiyɛɛ na lè.
3Pe n gɔ̌n wáa mii syɛ́ɛnbèle kéele na.
Pe n nìgɔcaripile fàli nànjaacɔɔ̀ na,
pe n pìcaapile pára n dùvɛɛn syɔɔ n gbaa.
4 #
Eza 14:29-31; 23:1-18; Zyer 47:1-7; Ezek 25:15—28:26; Am 1:6-10; Sof 2:4-7; Zak 9:1-7; Mat 11:21-22; Luk 10:13-14 A yele wɔ́ɔgēle, nyàʔá yele caa mii kurugo, Tíiri ní Siidɔn ye, ní yele Filisitini tári tɛ́nɛmɛ tɛ́ɛyɛ myɛw? A yele caa lé bi gɔ̀lɔ́ wòlo mii na? Kàjáa yele ga ni caa bi gɔ̀lɔ́ wòlo mii na, mii a tɔ̀nɔ́ gi yaʔa yele gɔ̀lɔ́-wòlori í lúru kòro yele nyúnyi ni kelekele! 5Yele n mii wálifiiw, ní mii tɛ́ɛw láa. Yele n mii lɔgbanri yacandelere láa n sáà tɛ́ʔɛ yele kpɔ̀ʔɔrɔli kpaaya ni. 6Yele n Zyuda ní Zyerusalɛmi wóbèle pára Yavan#4:6 Yavan ye: Syɛ́ɛnri naa kɔ́rɔ wi nyɛ Girɛkibèle. ye ma, jàngó bi be léeli be tári na. 7Wéle, tɛ́ɛgee ni yele be pára lè, mii a be yìrige yaà beè pe lúru pan, si yele gɔ̀lɔ́ wòlori yaʔa ti lúru kòro yele nyúnyi ni. 8Mii a yele nànbiigèle, ní yele calipiigèle pára Zyuda wóbèle ma, poro a be pára Saba ye syɛɛnfelegi ma ki lè léelige.» Níì cán Yawe wi koro joo.
Kapɛɛnsanni ní kútiiw kéele
9Ye gee naa jáari syɛɛnfeleyi nínge ni! Ye jo:
«Ye yeyɛɛ zámaga kapɛɛnnɛ kánma na!
Ye nànniribèle yìrige!
Kapɛɛnkpumɔnbèle myɛ n yɛlɛ bàā nùuní,
ki n yɛlɛ paa lúru!
10 #
Eza 2:4; Mis 4:3 Ye yele nìtěyi kpúmɔn ye kàriga ŋɔséebéle,
ye yele kátangèle kpúmɔn ye kàriga tàbaabēle!
Wee wi nyɛ lè fànʔa fun,
waa gi nyuu wí jo:
‹Mii i nyɛ sànbali!›
11Yele syɛɛnfeleyi myɛ ye nyɛ lè tɔ́ɔnrɔ n màʔa n kpàra,
ye tɔlɔyɔ wári, yaa maa,
ye yeyɛɛ gbóʔoro!
Ee Yawe, mɔ nanniribèle tìrige mi tórigo yaà beè.
12Ki n yɛlɛ syɛɛnfeleyi í yìri ŋúnɔmi na
bi kári Zyozafati jǐnlɔgi ma!
Níì cán nɛɛ bee mii a tɛ́ɛn
bi syɛɛnfeleyi myɛ kútii joo
yi lè tɔ́ɔnrɔ n màʔa n kpàra.
13 #
Tɛ̀ɛn 14:14-16,19-20; 19:15 Yaa kɔniyi nyàʔá,
níì cán yaliiri n lɛɛ n kwɔ́ɔ!
Yaa maa ye ba ra tánʔana,
ɛrɛzɛnw lɔ̀ʔɔ tɛɛnùgugo n nyìn,
yaleyi n nyìn fílili!
Níì cán be péemi n tɔ̀nɔ n kpɔ́ʔɔ.
14Syɛɛnnɛʔɛmɛ, syɛɛnnɛʔɛmɛ wéle bee,
kútiiw cerile jinlɔgɔ ni.
Níì cán Yawe cángi n nùuni,
kútiiw cerile jinlɔgɔ ni.
15Cángi ní yégi i kàragí yébilimɛ,
a ŋɔripiigèle gbɛ̀ɛnmɛ i kwóo ni syée.
16 #
Am 1:2
Yawe i kaana Siyɔn ni,
wi n wi yákpoli yaʔa li i lúro Zyerusalɛmi ni.
Nyɛ̀ʔɛgèle ní tári n cúngo.
Kàjáa Yawe i nyɛ wi syɛ́ɛnbèle tɛɛlàraga,
wi i nyɛ Isirayɛli ye ma yatɔngɔ.
17Yele a gi cán lǎli bee ni bi cán mii wi nyɛ Yawe yele Kolocɔlɔw,
wi nyɛ lè wodɛ́ɛɔn ní Siyɔn ni,
ki lè mii nyanbe-nyunjǎngi.
Zyerusalɛmi a pye wojaɔn ní
nibɔnbèle a ní tée sɔ̀lɔ yaà í.
Kolocɔlɔɔ syɛ́ɛnbèle a ní lúru peyɛɛ daa
18«Cángi bee na, ɛrɛzɛn lógi a ra fóo ra tíri nyanbeleyi na,
nɔ́nɔw a ra fóo dǎndamayi na,
lǒyi a ra fóo Zyuda lókoloyi myɛ ni.
Púloweele a wɔ́ɔ yiri Yawe kpáagi ni bàā Syitimi tɛɛmarigi fɔɔnri.
19Ezyipiti a ba pye tɛɛ̀kalagiga.
Edɔmi a ba pye fìimɛ tára,
bi pye tɛɛ̀kalagiga,
péemi kéele na be kpéʔele Zyuda wóbèle na lè,
poro bele tɛɛlɛ fun sìsyaan be wo be tári ni lè.
20Kàjáa Zyuda a ba pye syɛ̀ɛnnɛ tɛɛkòrogo làla o làla,
ní Zyerusalɛmi wɔ́ɔgēle,
yìrigèle myɛ syɛ̀ɛnnɛ ma.
21Mii a be sìsyaanw jéemununɔ fáli kpéʔele,
wee wi lè mii da kɔ́ɔ̀ wi kpéʔele í.»
Yawe si a tɛ́ɛn bi kòro Siyɔn ni.
Currently Selected:
Zyowɛli 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.