2 Tesaloniki ye 3
3
Yaa nyɛ́ɛri wolo kéeli na
1Ni senyɛ̀nnɛ, gee gi syɛɛnsanri kwɔ́ɔ lè, koro gi nyɛ yaa nyɛ́ɛri wolo kéeli na jàngó Kàfɔw syɛ́ɛnrɛ í cariga kelekele si kpɔʔɔrɔ taa, àmɛɛ gi kpéʔele yaà yele ma lè, 2yé wɔ́ɔ yaa nyɛ́ɛri koro ga pye wolo í syɔɔ kakolobyebèle ní syɛɛnpeebèle ma. Níì cán tágali o nyɛ syɛ́ɛnbèle myɛ ma í.
3Kàfɔw si i nyɛ tágala syɔ́ɔn, woro wi a fànʔa le yele ni sáā yele kɔ̀rɔsíi jàngó yele í syɔɔ Wobeew ma. 4Wolo n tága yele na Kàfɔw báriga ni ncan kérigèle wolo nyuu ni gbàngí yele ma lè, yele i gele bee kpéʔele, yele si a sèʔé ra ge kpéʔele làla o làla.
5Ki n yɛlɛ Kàfɔw í yele fúnyi kàriga bi lége Kolocɔlɔɔ tàmagi, ní Kirisi kpàracogi ni.
Fáliw pyele kanyɔɔnɔ
6Ni senyɛ̀nnɛ, wolo a gi joo gbàn yele ma Kàfɔw Zyezu Kirisi mɛ́ɛgi na si jo, senyɛnnɛ o senyɛnnɛ wi sàlaga kpéʔele lè, wi si wɔ́ɔ o táanri ni yɛlɛgi ní tamani ní í, lee yele taa wolo ma lè, ki n yɛlɛ yaa còʔoró wee bee na. 7Yele tiimaa n gi cán ki n yɛlɛ yele í da wolo tɛ́ɛlɛ, níì cán wolo da ni sàlaga kpéʔele yele níngi ni í. 8Wolo ga wɔ́ɔ̀ woyɛɛ daʔa syɔɔnwaa faala na ni líi wi ma kawaʔa na í. Kàjáa wolo maa ni fɔ̀rɔgí gbanʔama wolo fáliw ni canʔa ní yébilige jàngó wolo a kɔ́ pye yele wàa na tugoro í. 9Gee bee ga jo tànʔa o nyɛ wolo ma bi gi kpéʔele í, kàjáa wolo maa ni caa bi woyɛɛ kéeli pye fɛ̀ɛ yele ma jàngó yele í da wolo tɛ́ɛlɛ. 10Níì cán lǎlee ni wolo da sèʔê pye yaà ní yele ní lè, wolo maa dee naa joo n gbàn yele ma níì jo: «Syɔɔnwaa ga pye wi o caa bàā báara í, ki ga wɔ́ɔ̀ yɛlɛ waa líi í.»
11A wolo si gi lóʔo pèle i yaà ni nyaari yele níngi ni sàlagi kéele na, pe o yafyɛn báara í, pe i nyɛ nifaalabéle. 12Wolo si i gi nyuu ni gbàngí syɛ́ɛnbèle bee féleye ma, ní i be nyɛ́ɛri Kàfɔw Zyezu Kirisi mɛ́ɛgi na koro ga pye pe fáliw kéele cò cama, jàngó pe tiimaw í gbǎn ra yaliire taagi peyɛɛ ma bàā líi.
13Yele si na ni senyɛ̀nnɛ, ki ga yɛlɛ yele í kɔ́ jo yele n fɔ̀rɔ kacànbyeri na í. 14Wàa ga wolo syɛ́ɛnri cée, dee wolo sɛ́bɛ n tórigo lè yele ma sɛ́bɛw naa ni, yaa wee bee kɔ̀rɔsíi, yele a kɔ́ pínɛ yarigaa na ní wi ní í, jàngó fɛ̀ɛrɛ í wi taa. 15Ki si ga yɛlɛ yele í da wi córo yele nígoo í, kàjáa yaa wi sàmí àmɛɛ yele senyɛnnɛ nyɛ lè.
Dùbaw kpéʔelele ní fòów kéele
16 Kàfɔw wi lè yɛɛ̀nyingi kaanfɔlɔ, ki n yɛlɛ woro tiimaa í da yɛɛ̀nyingi kaangi yele ma làla o làla, kánmi myɛ na! Kàfɔw í pye ní yele myɛ ní!
17Mii Pɔli wi fòów naa sɛ́bɛ ní mii tiimaa kɔ́gi ní. Gee bee i nyɛ fɛ̀ɛ mii sɛ́bɛbèle myɛ ni. Mii sɛ́bɛganmi bi nyɛ bee naa.
18Ki n yɛlɛ wo Kàfɔw Zyezu Kirisi í wi kpɔ́ʔɔri kaan yele myɛ ma!
Currently Selected:
2 Tesaloniki ye 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
