2 Tesaloniki ye 2
2
Kapeegèle Syɔ́ɔn kéele
1 #
1Tes 4:15-17
Ni senyɛ̀nnɛ, gee gi wolo Kàfɔw Zyezu Kirisi panni kéele kwɔ́ɔ lè, ní àmɛɛ wolo a ba kpóʔoro lè wi taana, wolo i yele nyɛ́ɛri níì jo, 2ki ga yɛlɛ yele sɔ̀nguri í wári kɔ́ ra nyáʔami í, yele fúnyi si wɔ́ɔ ra curugu í, koro si kɔ́ pye yanyaagaa báriga ni í, wàlá syɛɛnjóoro báriga ni í, wàlá sɛ́bɛwaa báriga ni í, àlí sɛ́bɛwee wi ga pye lè mɔ a jo wolo wo wi sɛ́bɛ n tórigo yele ma níì jo, Kàfɔw canʔa n nan n kwɔ́ɔ. 3Yele a kɔ́ tíi syɔɔnwaa faala í yele fáana kanmaa faala na í. Níì cán fwɔɔ pèle í lúru kàdoʔo ma gbɛnʔɛnɛ, pé náa Kapeegèle Syɔ́ɔn tɛ̀ɛn, wee wi a ba kálagi lè. 4#Dan 11:36; Ezek 28:2 Yariga o yariga syɛ́ɛnbèle yiri lè Kolocɔlɔɔ, wàlá yáriree be kpɔ̀ʔɔrɔ́ lè, wi a ba ra dee bee myɛ kábala, sáā wiyɛɛ gbɔ́ʔɔgi di na, àlí wi a ba tɛ́ɛn kpɔ̀ʔɔrɔli kpaʔa fúngo ni, si wiyɛɛ dɛ̀ɛn si jo, woro wi nyɛ Kolocɔlɔɔ.
5Lǎli ni mii da sèʔê pye ní yele ní lè ní i kérigèle naa nyuu yele ma, yele ga sɔ̀ngi n taa gi na ì? 6Yele n gi cán tɔ́ɔliw ni, gee gi Kapeegèle Syɔ́ɔn yérige lè koro ga pye wi wi làridɛ̀ɛ́nni sige. 7Níì cán kapeebyeri kalarala tée i báara n kwɔ́ɔ, kàjáa kérigèle bee si a gbǎn foro í, fwɔɔ pe ga li yérigefɔw núngo yaà lǎlee ni lè. 8#Eza 11:4 Lǎli bee ni Kapeegèle Syɔ́ɔn a wiyɛɛ dɛ̀ɛn, woro wee Zyezu a ba kpóo lè ní wi nyɔ́ɔgi káfalaga ní, si wi kálagi péw woro panni nìjanra darigala báriga ni. 9#Mat 24:24 Kapeegèle Syɔ́ɔn a pan ní Sutanaw sée ní bi ba ra kakpoloyi féleye myɛ kpéʔele, ní fɛ̀ɛ́bèle ní, n fàra bìngaari kèlē na, gele ní wi a ra syɛ́ɛnbèle pùuní lè, 10wi a wɔ́ɔ ba ra kanaa-sìnzinri féleye myɛ téeri bàā syɛ́ɛnbèle fáana da pùuní, bele pe a kálagi lè, níì cán pe ga fɔ̀lɔ n kányɛɛgi yaʔa a gi be dɛ́nɛ í, jàngó poro í syɔɔ í. 11Gee bee na Kolocɔlɔɔ a wɔ́ɔ pùununi sábabu kaan be ma jàngó pe tága jànvaaw na. 12Koro ga pye kútiiw í kúun pe myɛ na poro bele be nyɛ lè pe ga tága kányɛɛgi na í, níì cán kanaa-sìnzinri n be dɛ́nɛ.
Pe n yele nyɛ́nɛ n wòlo jàngó yele í syɔɔ
13Ni senyɛ̀nnɛ, wolo n yɛlɛ bàā bariga kaangi Kolocɔlɔɔ ma làla o làla yele kéeli na, yele bele ye nyɛ lè Kàfɔw syɛɛn-nidaanmabéle, níì cán Kolocɔlɔɔ maa téè yele nyɛ́nɛ n wòlo nlaa yaà làrizelili ni, jàngó yele í ba syɔɔli taa, wi maa gi cán Pìicǎnni a ba yele jée mùnu, yele si wɔ́ɔ tága kányɛɛgi syɛ́ɛnrɛ na. 14Koro kéeli na Kolocɔlɔɔ wɔ́ɔ baa yele yeri Syɛɛnjóocǎnri báriga ni, dee wolo sáà joo yele ma lè, jàngó yele í wolo Kàfɔw Zyezu Kirisi nìjangbɔɔri taa. 15Koro na ni senyɛ̀nnɛ, ye sámaga ye yére yé tamani cò, lee na wolo da yele tama lè ní wolo nyɔ́ɔyi ní, n fàra dee na wolo sɛ́bɛ lè.
16Wolo Kàfɔw Zyezu Kirisi tiimaa, ní wolo Tóow Kolocɔlɔɔ, woro wee wi tàmaga le ní wolo ní lè, níì bàngwɔɔ fûnnyingi kaan wo ma n fàra sɔ̀ngumi tɛɛtaʔajanga na wi kpɔ́ʔɔri báriga ni, 17ki n yɛlɛ woro í yele kɛɛlɛ yele fúnyi ni, si wɔ́ɔ fànʔa le yele ni jàngó yele í gbǎn ra kapyejǎngèle féleye myɛ kpéʔele, si wɔ́ɔ ra syɛɛncanri féleye myɛ nyuu.
Currently Selected:
2 Tesaloniki ye 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
