1 Tesaloniki ye 5
5
1Ni senyɛ̀nnɛ, gee gi làrigèle ní cányi córomɔ kéele kwɔ́ɔ lè, ki o náā nyɛ wolo í sɛ́bɛ tórigo yele ma kéeli bee na í. 2#Mat 24:43; Luk 12:39; 2Pyɛ 3:10 Níì cán yele tiimaa n gi fílige n cán Kàfɔw canʔa i maa àmɛɛ kàyuuo maa lè yébilige ni. 3Lǎli ni syɛ́ɛnbèle ga kɔ́ ba ni gi nyuu lè níì jo: «Dulunyanw n nyíngi níì nyɔɔ!» Lǎli bee ni kálagili a ba be pàla àmɛɛ fícɛnnɛ gáà fícɛnnɛfɔlɔ yìrige lè, pe a syɔɔ li ma nyáana í. 4Yele si na, ni senyɛ̀nnɛ, yele o nyɛ yébilimɛ ni í, koro na cángi bee a ba yele pàla àmɛɛ kàyuuo nyɛ lè í. 5Yele myɛ i nyɛ gbɛ̀ɛ́nmi pìibēle, ní cángi pìibēle. Wolo o nyɛ yébiligi wòolo wàlá yébilimi wòolo í. 6Koro na ki ga yɛlɛ waa ŋúnɔ àmɛɛ wozanbèle nyɛ lè í, fwɔɔ wo kòro nyɛ̀nɛ na wó woyɛɛ cǒmi cán. 7Bele be ŋúnɔ lè, pe i ŋúnɔ yébiligi ni, ní bele yɛ́ɛyɛ yi wóo lè sínmi na, yi i wóo yébiligi ni. 8#Eza 59:17; Efɛz 6:13-17 Kàjáa wolo bele si wo nyɛ lè cángi wòolo, ki n yɛlɛ wo woyɛɛ cǒmi cán, wó kapɛɛnkpumɔn-búrogi le, ki lè tágali ní tàmagi, wó wɔ́ɔ kapɛɛnkpumɔn-ǹdɔnni tɔ́n, li lè sɔ̀ngumi tɛɛtaʔaga syɔɔli kéele na. 9Níì cán Kolocɔlɔɔ ga wolo nyɛ́nɛ n wòlo jàngó woro fundanʔari í too wo na í, kàjáa wi n wolo nyɛ́nɛ n wòlo koro ga pye wolo í syɔɔli taa wolo Kàfɔw Zyezu Kirisi bárigaw ni, 10woro wee wi kùu lè wolo kéeli na, koro ga pye wo ga kòro nyɛ̀nɛ na yoo, a wo náa i ŋúnɔ yoo, wo pye sìi na ní wi ní. 11Gee bee na gi yɛlɛ yaa yeyɛɛ kɛɛlɛ, yáā yeyɛɛ dɛ̀ɛmɛ́ jàngó kàa í da taari yele tágali na, àmɛɛ yele gi kpéʔele ní yeyɛɛ ní n kwɔ́ɔ lè.
Láliisanw wi joo n kaan lè ní fòów kéele
12Ni senyɛ̀nnɛ, bele be báara yele níngi ni lè be nyɛ lè yele yɛɛ̀kinibèle ní yele sàmifɔbèle Kàfɔw kólogo ni, wolo i yele nyɛ́ɛri níì jo, yaa lúro be ma. 13Ki n yɛlɛ yaa be córo gbanʔama, yé tàmaga le ní be ní pe fáliw kéele na. Ki n yɛlɛ ye pye bɛ̀ɛlɛ na ní yeyɛɛ ní.
14Ni senyɛ̀nnɛ, wolo i yele nyɛ́ɛri níì jo, yaa sàlagafɔbèle sàmí, yáā fyáarafɔbèle zɔ̀nbēle nìrí, yé wɔ́ɔ yaa fànʔa-fùnvɔbèle tɔʔɔlɔ, yáā syɛ́ɛnbèle myɛ kpàracó. 15Yaa kɔ̀rɔsíi koro ga pye yele wàa faala a kɔ́ kapeelaa tɛ́ʔɛ bi làa fwɔ́ɔlɔ tɔ́n wàa ma í. Fwɔɔ ye kòro yaa kacàngēle kpéʔele làla o làla yeyɛɛ na yé wɔ́ɔ yaa ge kpéʔele syɛ́ɛnbèle myɛ na.
16Yaa fundaanra kpéʔele làrigèle myɛ ni. 17Ye a kɔ́ láʔa Kolocɔlɔɔ nyɛ́ɛrigi na í. 18Yaa bariga kaangi Kolocɔlɔɔ ma kérigèle myɛ na. Níì cán gee bee Kolocɔlɔɔ caa yele ma Kirisi Zyezu ni.
19Ki ga yɛlɛ yele í kɔ́ Pìicǎnni yérige í. 20Yele a kɔ́ ra kanyaajoori faari í.#5:20 kanyaajoori faari í: Syɛ́ɛnri naa a wɔ́ɔ gbǎn jo: Yele a kɔ́ ra Kolocɔlɔɔ syɛ́ɛnri joo-mí-tɛ̀ɛnnɛ faari í. 21Ki si n yɛlɛ yaa kérigèle myɛ sɛʔɛ yaa wéle, gele ge nyɔɔ lè, ye gele bee sámaga ye cò. 22Yaa còʔoró kapeegèle féleye myɛ na.
23Ki n yɛlɛ Kolocɔlɔɔ í yele jée mùnu mɛnɛ mɛnɛ, woro wee wi nyɛ lè yɛɛ̀nyingi kaanfɔlɔ, sáā yele pìígèle, ní yele fúnyi, ní yele céri myɛ kɔ̀rɔsíi jàngó ti ba pye kajoolo fun wo Kàfɔw Zyezu Kirisi làribanni ni! 24Yele yerifɔw i nyɛ tágala syɔ́ɔn, woro wi a gi kpéʔele.
25Ni senyɛ̀nnɛ, ki n yɛlɛ yaa nyɛ́ɛri wolo kéeli na.
26Ye senyɛnbèle myɛ syáanri yaà, yé be syɔɔnri ní funjànya ní.
27Mii i yele nyɛ́ɛri gbanʔama Kàfɔw mɛ́ʔɛ na níì jo, ki n yɛlɛ ye sɛ́bɛw naa syɛ́ɛnrɛ wéle ye joo senyɛnbèle myɛ ma.
28Ki n yɛlɛ wo Kàfɔw Zyezu Kirisi í wi kpɔ́ʔɔri kaan yele ma!
Currently Selected:
1 Tesaloniki ye 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
