1 Tesaloniki ye 4
4
Tánʔaganmee bi Kolocɔlɔɔ dɛ́nɛ lè
1Ni senyɛ̀nnɛ, dee wolo a ní joo lè toro di nyɛ dee naa, tánʔaganmee na yele yɛlɛ bàā táanri lè yele kéeli si Kolocɔlɔɔ dɛ́nɛ, yele n tánʔaganmi bee tama wolo ma. Kánmi bee na si yele wɔ́ɔ̄ táanri. Wolo si sèʔé i yele nyɛ́ɛri ní i yele kɛɛlɛ Kàfɔw Zyezu mɛ́ɛgi na níì jo, ye ní yaa kàa fàrá gee bee na. 2Tundunri wolo da joo n kaan yele ma lè ti lè Kàfɔw Zyezu wóri, yele n di cán. 3Gee Kolocɔlɔɔ caa lè, koro gi nyɛ wi i caa yele fúnyi í fílige. Wi i caa yele í láʔa kanɔnʔɔri na. 4Wi i caa yele í gi cán àmɛɛ yele myɛ nibin nibin yɛlɛ lè yele í yele tiimaa céri cò funviire na sáā di kɔ̀rɔsíi,#4:4 yele í yele tiimaa céri cò funviire na sáā di kɔ̀rɔsíi: Ti kɔ́rɔw a wɔ́ɔ gbǎn pye: Ki n yɛlɛ syɔɔn í kòro ní wi tiimaa céw ní funviire na sáā wi kɔ̀rɔsíi. 5yele wàa a kɔ́ wiyɛɛ daʔa ki laànitaagi sɔ̀ngurɔ na taa wi kàragí àmɛɛ syɛɛnfeleyaa gi kpéʔele lè í, yee yi lè yi ga Kolocɔlɔɔ cán í. 6Wàa ga yɛlɛ wi kapeele pye wi senyɛnnɛ na bi wi nɔ̀ʔɔrɔ kéeli bee làa ni í, Kàfɔw wi nyɛ kérigèle bee myɛ kpéʔelefɔɔlɔ wɔʔɔfɔlɔ, àmɛɛ wolo da sélì yele sàmi n kwɔ́ɔ lè, níì gi joo n gbàn yele ma. 7Níì cán Kolocɔlɔɔ ga wolo yeri kanɔnʔɔri kánma na í, wi n wolo yeri jàngó wolo í pye fɔɔnrɔ fun. 8Koro na wee wi ga tundunri bee cée lè, syɔɔn ban wi cée í, Kolocɔlɔɔ wi cée, woro wee wi wi Pìicǎnni kaan yele ma lè.
9Ki o náā nyɛ wolo í sɛ́bɛ tórigo yele ma senyɛnnɛgi tàmaga kéele na í, níì cán Kolocɔlɔɔ i yele tiimaa tama àmɛɛ yele yɛlɛ bi tàmaga le ní yeyɛɛ ní lè. 10Kánmi bee na si yele wɔ́ɔ i gi kpéʔele senyɛnbèle myɛ ma Maseduwani tári myɛ ni. Kàjáa, ni senyɛ̀nnɛ, wolo sèʔé i yele nyɛ́ɛri níì jo yele í da gi kpéʔele bi ní sɔ̀lɔ wozeligi na, 11yé wɔ́ɔ ŋàʔana ye kòro fûnnyinge na, yáā yele tiimaa kérigèle kɔ̀rɔsíi, yáā báara ní yele kɔ́yi ní àmɛɛ wolo da gi joo n gbàn yele ma lè. 12Koro ga pye yele tánʔaganmi í nyɔɔ kàfugi syɛ̀ɛnnɛ ma, yele si a ní da yele màkonyɔɔri wéle syɔɔnwaa faala ma í.
Kàfɔw panna kéele
13Ni senyɛ̀nnɛ, bele be nyɛ lè kùúw ŋúnɔmɔ na, wolo o caa yele í pye bele bee kéele sinján ni í, koro ga pye yele fúnyi í kɔ́ ra curugu àmɛɛ wozanbèle wóyo nyɛ lè í, bele be nyɛ lè sɔ̀ngumɔ tɛɛtaʔaga o nyɛ be ma í. 14Amɛɛ wolo tága lè gi na ncan Zyezu n kùu níì nyán, kánmi bee na wolo wɔ́ɔ̀ tága gi na ncan bele be nyɛ lè kùúw ŋúnɔmɔ na Zyezu ni, Kolocɔlɔɔ a wɔ́ɔ bele bee lúrugo yìrige ní wi ní.
15 #
1Kor 15:51-52
Koro na wolo a dee naa joo yele ma Kàfɔw syɛ́ɛnrɛ báriga ni, wolo bele wo ga kòro lè woweebèlē ní n taa a Kàfɔw pan, wolo a ba kíni ŋúnɔfɔbèle yɛ́ʔɛ na nyáana í. 16Níì cán Kàfɔw tiimaa a yìri nyɛ̀ʔɛni na bi tìgi ní báriga yákpogbɔɔlɔ ní, ní nyɛ̀ʔɛni tundungbɔɔɔ yákpolo ní, ní Kolocɔlɔɔ búruw wìimɛ ní, bele si be kùu lè Kirisi ni, poro pe a séli nyán yìri. 17Koro kàdoʔo ma wolo bele wo ga kòro lè woweebèlē ní, Kolocɔlɔɔ a náa wolo láa lúrugo ní be ní fàfaanyi ni Kàfɔw tɛɛfaraga ni ǹjoʔo ma, kánmi bee na wolo a ba pye ní Kàfɔw ní làla o làla. 18Koro na yaa yeyɛɛ kɛɛlɛ ní syɛ́ɛnri bee ní.
Currently Selected:
1 Tesaloniki ye 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
