1 Tesaloniki ye 2
2
Fáliw Pɔli kpéʔele Tesaloniki ni lè
1Ni senyɛ̀nnɛ, yele tiimaa n gi cán wolo da kári n sáà jée yele níngi ni wii nya gbanzan í. 2#Kap 16:19-24; 17:1-9 Kàjáa yele n gi cán àmɛɛ pe da wolo wɔʔɔ níì wolo tɛʔɛlɛ lè Filipikaʔa ni, koro kàdoʔo ma a wolo sèʔê soro wolo Kolocɔlɔw báriga ni n ba ni wi Syɛɛnjóocǎnri nyuu yele ma kàsiikpɔɔw nínge ni. 3Níì cán kɛɛlɛli syɛ́ɛnrɛ wolo da sa ni nyuu yele ma lè, tɛɛpùunugo da pye di ni í, ti da pye syɛɛnnɔnʔɔrɔ í, ti da wɔ́ɔ̀ pye gbánama syɛ́ɛnrɛ í. 4Kàjáa àmɛɛ Kolocɔlɔɔ wolo córo lè n gi nyaa wolo n nyɔɔ n yɛlɛ, koro na wi Syɛɛnjóocǎnri kàlifáa wolo ma, kánmi bee na si wolo wɔ́ɔ̄ di nyuu, wolo o di nyuu syɛ́ɛnbèle kínidɛnɛgɛ kéele na í, fwɔɔ Kolocɔlɔɔ kínidɛnɛgi kéele na, woro wee wi wolo fúnyi sɛʔɛ ni wéle lè. 5Níì cán wolo da ni lɛ́ɛlɛgɛ syɛ́ɛnrɛ nyuu nyáana í àmɛɛ yele gi cán lè. Wolo da wɔ́ɔ ni kanmaa faala kpéʔele jàngó bi yarigaa nɔ̀ʔɔrɔ́ syɔɔ yele ma làrama ni í, Kolocɔlɔɔ i nyɛ gee bee séera. 6Wolo da ni kpɔɔmɔ caa syɔɔn faala ma í, wolo da ni bi caa yele ma í, wàlá pèle nikwɔɔlɔ ma í. 7Bi gi taa wolo maa yɛlɛ bi dée gbǎn pye yele ma tugoro àmɛɛ wolo nyɛ lè Kirisi pìitunbéle. Kàjáa wolo ga koro kpéʔele í. Wolo maa ni fûnnyinge kpéʔele ní yele ní àmɛɛ nafɔlɔ wi tiimaa pyà kɔ̀rɔsíi lè, wee wi ŋɔri lè. 8Amɛɛ yele kéeli wolo dɛ́nɛ lè, a wolo gi nyaa wolo ga yɛlɛ bi Kolocɔlɔɔ Syɛɛnjóocǎnri yagana kaan yele ma í, fwɔɔ wolo í wɔ́ɔ woyɛɛ gaan yele ma kányɛʔɛ ni, níì cán yele kéeli maa kpɔ́ʔɔ wolo fúnyi ni gbanʔama. 9Ni senyɛ̀nnɛ, yele i sɔ̀ngí ni taagi wolo fáliw, ní wolo fɔ̀rɔyi kéele na, wolo maa ni Kolocɔlɔɔ Syɛɛnjóocǎnri nyuu yele ma, ní wɔ́ɔ i báara canʔa ní yébilige jàngó wolo a kɔ́ pye tugoro yele wàa na í.
10Yele bele ye nyɛ lè tágafɔbèle, àmɛɛ wolo da pye lè kasinbyebèlē, ní kacànbyebèlē, ní kajoolo fun syɛɛnnɛ yele ma, yele ní Kolocɔlɔɔ i nyɛ gee bee séera. 11Yele n wɔ́ɔ̀ gi cán wolo maa pye yele myɛ nibin nibin ma àmɛɛ tofɔlɔ nyɛ wi pìíbèle ma lè. 12Wolo maa ni yele kɛɛlɛ ní i yele kpɛʔɛlɛ ní i yele nyɛ́ɛri jàngó yele í da táanri da yɛlɛgi ní Kolocɔlɔɔ ní, woro wee wi yele yeri lè yele í pye wi fǎngi, ní wi nìjangbɔɔri ni.
13Gee bee na wolo wɔ́ɔ i bariga kaangi Kolocɔlɔɔ ma sìnlaʔa ni, níì cán lǎli ni yele Kolocɔlɔɔ syɛ́ɛnri lóʔo wolo ma lè níì yére di ni, a yele di sámaga n cò, níì gi cán ti i nyɛ Kolocɔlɔɔ wóro kányɛʔɛ ni, syɔɔn wóro ban í, toro si di wɔ́ɔ̄ báara yele ni, yele bele ye tága lè. 14#Kap 17:5 Ni senyɛ̀nnɛ, yele n baa pye Kolocɔlɔɔ Egilizibèle tɛ́ɛlɛfɔɔlɔ bele be nyɛ lè Kirisi Zyezu ni Zyude tári ni, níì cán wɔʔɔlee pe da taa lè Zyefubèle ma, lee bee wonijanna yele wɔ́ɔ̀ taa yele tiimaa felegefɔ-nyɛ́nbèle ma. 15#Kap 9:23,29; 13:45,50; 14:2,5,19; 17:5,13; 18:12 Zyefubèle bee be Kàfɔw Zyezu ní kanyaajoobèle kpóo, níì wolo nɛnɛ ní wɔʔɔgbɔɔgi ní, pe kéeli ga Kolocɔlɔɔ dɛ́nɛ í, pe i nyɛ syɛ́ɛnbèle myɛ nígoolo. 16Syɛ́ɛnree wolo nyuu lè syɛɛnfeleyi wozanya ma koro ga pye yi syɔɔ, pe i dee bee yéregi, níì kòro ni kàa taʔala be kapeegèle na. A Kolocɔlɔɔ fundanʔari si kɔ́ baa too be na.
Pɔli i caa bi ní Tesaloniki ye nyaa
17Kàjáa, ni senyɛ̀nnɛ, lǎlee cɛɛri wo kwɔ́ɔ woyɛɛ na lè céri kàbaan na, á wolo sɔ̀nguri si i yaà yele na, koro gi gi kaan a yele láagi tɔ̀nɔ n wolo taa gbanʔama, a wolo i caa bi ní yele nyaa. 18Gee bee na wolo da ni caa bi nan yaà yele na, mii Pɔli n ŋàʔana tɔlɔyɔ saʔa, kàjáa Sutanaw maa wolo yérige. 19Nyàʔá gi nyɛ wolo sɔ̀ngumi tɛɛtaʔaga, ní wolo fundaanri, ní wolo kpɔ́ɔmi nyùndɔnnɔ wo Kàfɔw Zyezu yɛ́ʔɛ ma wi làribanni ni, kapye yele ban í? 20Yele ye nyɛ wolo nìjanri ní wolo fundaanri.
Currently Selected:
1 Tesaloniki ye 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
