1 Tesaloniki ye 1
1
Fòów kéele
1 #
Kap 17:1
Mii Pɔli, ní Silivɛn#1:1 Silivɛn: Pèle wɔ́ɔ i mɛ́ɛgi bee yiri Silasi, syɛɛnnijanw si wii., ní Timɔte, wolo a sɛ́bɛw naa tórigo yele Tesaloniki ye Egiliziw ma, yele bele ye nyɛ lè Tofɔw Kolocɔlɔɔ ní Kàfɔw Zyezu Kirisi ni, ki n yɛlɛ Kolocɔlɔɔ í kpɔ́ʔɔri ní fûnnyingi kaan yele ma!
Tesaloniki ye tánʔaganmi ní be tágali kéele
2Wolo i bariga kaangi Kolocɔlɔɔ ma làla o làla yele myɛ kéeli na, wolo ga ni nyɛ́ɛri, wolo n sɔ̀ngi n taa n nyɛ́ɛri yele kéeli na. 3Wolo i sɔ̀ngí ni taagi yele kéeli na làla o làla wolo Tóow Kolocɔlɔɔ nyɛ́nɛ na, àmɛɛ yele báara lè tágali ní tàmagi báriga ni, ní àmɛɛ yele kpàracogi kpéʔele lè yele sɔ̀ngumi taʔala báriga ni wo Kàfɔw Zyezu Kirisi na. 4Ni senyɛ̀nnɛ, yele bele ye nyɛ lè Kolocɔlɔɔ syɛɛn-nidaanmabèle, wolo n gi cán wi n yele nyɛ́nɛ n wòlo. 5Níì cán àmɛɛ wolo da kári yele ma lè ní Syɛɛnjóocǎnri ní, wolo da kári n sáà di joo yele ma yagana í, kàjáa wolo maa wɔ́ɔ̀ kári ní fǎngi, ní Pìicǎnni, ní tágadeeli ní, lee li kpɔ́ʔɔ lè. Kánmee na wolo da pye lè yele níngi ni yele nyɔɔmi kéele na, yele n gee bee cán. 6#Kap 17:5-9 Yele n baa pye wolo ní Kàfɔw tɛ́ɛlɛfɔɔlɔ, níì cán lǎli ni yele fɔ̀lɔ Syɛɛnjóocǎnri na lè, yele maa wɔʔɔ gbanʔama di kéeli na, a yele sèʔê di cò ní fundaanri ní Pìicǎnni kaangi lè. 7Koro ki gi kaan a yele baa pye fɛ̀ɛ Maseduwani ní Akayi tári tágafɔɔlɔ myɛ ma. 8Níì cán yele ye pye sábabu á Kàfɔw syɛ́ɛnrɛ nan Maseduwani ní Akayi tári na, nɛɛ bee yagana si ban í, ti n nan tɛ́ɛyi myɛ na, àmɛɛ yele tága Kolocɔlɔɔ na lè, kéeli bee n wɔ́ɔ̀ nan tɛ́ɛyi myɛ na, koro na ki o nyɛ ŋàʔanaga kéele wolo í ní yarigaa joo í. 9Pe tiimaa i gi nyuu àmɛɛ yele da fɔ̀lɔ wolo na lè, ní àmɛɛ yele yasunyi yaʔa lè níì kàri Kolocɔlɔɔ ma ni Kolocɔlɔɔ woweew fáli kpéʔele, wi lè Kolocɔlɔɔ wodelew, 10ní i wi Jáaw sige bi taa wi yìri nyɛ̀ʔɛni na bi pan, woro wee Kolocɔlɔɔ da nyán n yirige kúbèle nínge ni lè, woro wi nyɛ Zyezu, wee wi wo syoo lè fundanʔari ma di maa lè.
Currently Selected:
1 Tesaloniki ye 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
