1 Pyɛri 1
1
Fòów kéele
1Mii Pyɛri, wi lè Zyezu Kirisi pìituɔn, mii a sɛ́bɛw naa tórigo yele ma, yele bele ye nyɛ lè Kolocɔlɔɔ syɛɛnnyɛnɛ-wòlobèle níì cariga n sáà pye nibɔɔnnɔ tátɛɛyi ni be yiri lè Pɔnti, ní Galasii, ní Kapadɔsi, ní Azii, ní Bitinii. 2Tofɔw Kolocɔlɔɔ maa téè yele nyɛ́nɛ n wòlo booma ni n yɛlɛ ní wi kakɔrirɔli ní jàngó Pìicǎnni í yele sámaga yaʔa woro ma, koro ga pye yele í da lúro Zyezu Kirisi ma, wi sìsyaanw nyari-nyarila sáā yele mùú.
Ki n yɛlɛ Kolocɔlɔɔ í da kàa fàrá yele ma kpɔ́ʔɔri ní fûnnyingi na.
Sɔ̀ngumɔ tɛɛtaʔaga woweʔe
3Wolo Kàfɔw Zyezu Kirisi Kolocɔlɔw wi yɛlɛ ní kpɔ̀ʔɔrɔli ní, wi lè wi Tóow, woro wee wi wolo séli n see lè kavɔn Zyezu Kirisi nyán-yirili báriga ni kúbèle nínge ni n yɛlɛ ní wi nyininɛʔɛmi ní, jàngó wolo í sɔ̀ngumɔ tɛɛtaʔaga woweʔe taa, 4si wɔ́ɔ kɔrigɔ taa, gee gi nyɛ lè bàngalagi, ní wɔ́ɔ i nyɛ tɛɛlɛ fun, ki nìjanri si a kwɔ́ɔ bi nyaa í. Kolocɔlɔɔ n gee bee kɔn yele ma nyɛ̀ʔɛni ni, 5ní i yele kpáaw wéle ní wi séekpɔɔw ní yele tágali báriga ni bi taa syɔɔli í ba nan, lee Kolocɔlɔɔ sámaga n yaʔa lè bi ba tɛ̀ɛn làrizanni ni.
6Yele i muguri fundaanri báriga ni gee bee kéele na, àlí àmɛɛ gi wírē nyɛ lè yele yɛ́ɛyi i taanri tɔ́ɔliw ni bi làla cɛɛri kwɔ́ɔ kagbanyi féleye saʔa kéele na. 7Kagbanyi bee nyúngo i nyɛ bi yele tágali sɛʔɛ wéle, loro lee li nyɔɔ n sɔ̀lɔ lè tɛ́ɛw na wi nyɛ lè yakwɔʔɔ, pe si i wi sɛʔɛ ni wéle ní náagi ní, kánmi bee na fwɔɔ yele tágali í sɛʔɛ wéle koro ga pye yele si sòololo, ní nìjanra, ní kpɔɔmɔ taa Zyezu Kirisi làridɛ̀ɛ́nni ni. 8Yele ga kɔ́ɔ̀ wi nyaa í, ní si tàmaga le ní wi ní. Yele o wi nyaagi tɔ́ɔliw ni í, kàjáa àmɛɛ yele tága lè wi na, a yele i muguri fundaangbɔɔri báriga ni, dee di nyɛ lè nìjanra wóro, syɔɔn si a wɔ́ɔ gbǎn di kacánmi joo tɛ̀ɛn bi kwɔ́ɔ í, 9ní i yele tágali tɔ̀nɔ taagi, wi lè yele pìígèle syɔɔlɔ.
10 Kanyaajoobèle bele pe da ni nyuu lè kpɔ́ʔɔri kéele na, dee Kolocɔlɔɔ baa kaan yele ma lè, bele bee maa ni syɔɔli bee kéele sɛʔɛ ni wéle gbanʔama, ní i li kɔ́rɔw caa ní lòmaana ní. 11Kirisi Pǐli li da pye be fúnyi ni lè, lee bee maa téè séeraw kpéʔele booma ni Kirisi wɔʔɔli ní wi nìjangbɔɔri kéele na, dee ti a kɔ́ ba pye lè wi wɔʔɔli kàdoʔo ma, a pe i ŋàʔaná bi gi cán lǎlee ni ki a ba kpéʔele lè, ní kánmee na ki a wɔ́ɔ ba kpéʔele lè. 12Kolocɔlɔɔ si maa gi tɛ̀ɛn be na ncan kérigèle bee pe da ni nyuu lè, pe da ni ge nyuu peyɛɛ kéeli na í, fwɔɔ yele kéeli na. Syɛɛnjóocǎnri joofɔɔlɔ si n náa baa kérigèle bee joo yele ma tɔ́ɔliw ni Pìicǎnni báriga ni, lee Kolocɔlɔɔ yìrige lè nyɛ̀ʔɛni na n tórigo naa, ki láagi i nyɛ nyɛ̀ʔɛni tundunbéle na gbanʔama bi kérigèle bee fílige cán.
Kayele síndánʔani kéele na
13Koro na ye nìrimɛ le yeyɛɛ ni, yé yeyɛɛ cǒmi cán, yé wɔ́ɔ yele sɔ̀ngumi myɛ taʔa kpɔ́ʔɔri na, dee yele a ba taa lè Zyezu Kirisi tɛ̀ɛ́nni làla ni. 14Ki n yɛlɛ yele í pye àmɛɛ pìiloʔobéle nyɛ lè, ki ga yɛlɛ yele í da táanri da yɛlɛgi ní yele booma ki laànitaagi kèlē ní í, gele yele da ni kpéʔele lè yele kanaa-sìnjánmi làla ni. 15Kàjáa àmɛɛ yele Yerifɔw nyɛ lè wojaɔn ní, ki n yɛlɛ yele í wɔ́ɔ pye wojanbéle ní yele nàʔaganmi myɛ ni, 16#Lev 11:44-45; 19:2 níì cán ti n sɛ́bɛ níì jo: «Ki n yɛlɛ yele í pye wojanbéle ní, níì cán mii i nyɛ wojaɔn ní.»
17Kolocɔlɔɔ wi kútiiw kúunri lè syɔɔn o syɔɔn na ni yɛlɛgi ní syɔɔn fáliw ní, wi si o syɔɔnwaa yirigi wàa ni í, kapye yele i woro yiri yele Tóow yele nyɛ́ɛriyi ni, ki n yɛlɛ yele í da táanri wi yɛ́ɛgi fyáara na làrigèle myɛ ni, gele yele a kwɔ́ɔ lè dulunyanw naa ni. 18Níì cán yele n gi cán àmɛɛ wi yele syɔɔ lè yele gbanzan tánʔaganmi ma, bee yele taa lè yele tóolɛɛbèle ma, wi ga yele syɔɔ ní yakwɔɔrɔ ní í, àmɛɛ wálifiiw ní tɛ́ɛw nyɛ lè. 19Kàjáa wi n yele syɔɔ lɔgbanra na ti lè Kirisi sìsyaanw, wee wi nyɛ lè àmɛɛ tɛɛlɛ fun ní fɔɔnrɔ fun bàpile wóo nyɛ lè. 20Kolocɔlɔɔ maa téè Kirisi nyɛ́nɛ n wòlo sáni dulunyanw í séli lè, ní baa wi tɛ̀ɛn làrizangèle naa ni yele kéeli na. 21Woro bárigaw ni yele tága Kolocɔlɔɔ na, woro wee wi wi nyán n yirige kúbèle nínge ni lè, níì nìjangbɔɔri taʔa wi na, a koro gi kaan a yele tága Kolocɔlɔɔ na níì yele sɔ̀ngumi taʔa wi na.
22Amɛɛ yele fɔ̀lɔ lè kányɛɛgi na níì yele fúnyi jée n mùnu koro ga pye senyɛnnɛgi tàmadelege í pye yele ni, ki n yɛlɛ ye wɔ́ɔ tàmaga le ní yeyɛɛ ní kányɛʔɛ na ní yele fúnyi myɛ ní. 23Kolocɔlɔɔ n yele séli n see kavɔn bàngwɔɔ sìíw sée báriga ni, sìíwee wi kwóo lè, wee bee sée báriga ni ban í, wi n koro kpéʔele wi syɛ́ɛnri báriga ni ti nyɛ lè woweere ní, ti si a wɔ́ɔ kwɔ́ɔ bi nyaa í. 24#Eza 40:6-8 Níì cán:
«Syɛ́ɛnbèle myɛ i nyɛ àmɛɛ nyàā nyɛ lè,
pe nìjanri myɛ wɔ́ɔ i nyɛ àmɛɛ nyàáfyɛɛnrɛ nyɛ lè,
nyàági i waari,
nyàáfyɛɛnri si i kɔlɔ ni ŋuu,
25Kàjáa Kàfɔw syɛ́ɛnrɛ a kòro beè làla o làla.»
Syɛ́ɛnri bee si di nyɛ Syɛɛnjóocǎnri, dee pe da joo lè yele ma.
Currently Selected:
1 Pyɛri 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
