1 Zyan 4
4
Kolocɔlɔɔ pǐli, ní nigoow pìle
1Mii syɛɛn-nidaanmabèle, ki ga yɛlɛ yele í da tági pìígèle myɛ syɛ́ɛnrɛ na í. Ki n yɛlɛ yaa pìígèle sɛʔɛ yaa wéle jàngó bi gi cán kapye Kolocɔlɔɔ má ge yìri, níì cán kanyaajoo-fáanabéle saʔa n cariga dulunyanw ni. 2Kánmi naa na yele a Kolocɔlɔɔ Pǐli cán bi wàli gele na, pǐlee faala ga gi fílige n joo lè níì jo Zyezu Kirisi n pan ní cere ní, lee bee i nyɛ Kolocɔlɔɔ wólo, 3pǐlee si li nyɛ lè li ga gee bee fílige n joo Zyezu kéeli na lè í, lee bee o nyɛ Kolocɔlɔɔ wólo í, loro i nyɛ Kirisi nigoow wólo, wee yele da lóʔo lè wi a pan, àlí wi caa i naa dulunyanw ni n kwɔ́ɔ.
4Yele si na, ni pìibēle, yele i nyɛ Kolocɔlɔɔ wòolo. Yele n fànʔa taa kanyaajoo-fáanabèle na, níì cán wee wi nyɛ lè yele ni, wee bee n kpɔ́ʔɔ n sɔ̀lɔ wee na wi nyɛ lè dulunyanw syɛ̀ɛnnɛ ni. 5Amɛɛ be nyɛ lè dulunyanw wòolo, koro na kérigèle ge dulunyanw syɛ̀ɛnnɛ dɛ́nɛ lè koro be nyuu, a dulunyanw syɛ̀ɛnnɛ i lúro be ma. 6Wolo si na, wolo i nyɛ Kolocɔlɔɔ wòolo. Wee wi Kolocɔlɔɔ cán lè, wee bee i lúro wolo ma. Wee si wi lè wi o nyɛ Kolocɔlɔɔ wóo í, wee bee o lúro wolo ma í. Kánmi bee na wolo kányɛɛgi Pìle ní pùununi pìle cángi ni láʔala keyɛɛ na.
Kolocɔlɔɔ wi nyɛ tàmagi
7Mii syɛɛn-nidaanmabèle, ki n yɛlɛ wo tàmaga le ní woyɛɛ ní, níì cán Kolocɔlɔɔ má tàmagi yìri, syɔ́ɔnwee faala wi tàmaga nii lè, wee bee i nyɛ Kolocɔlɔɔ pyà, wi n Kolocɔlɔɔ cán. 8Wee si wi lè wi o tàmaga nii í, wee bee ga Kolocɔlɔɔ cán í, níì cán Kolocɔlɔɔ wi nyɛ tàmagi. 9Kánmi naa na si Kolocɔlɔɔ wi tàmagi tɛ̀ɛn wolo na, níì cán Kolocɔlɔɔ maa wi Pìinibingi tun naa dulunyanw ni koro ga pye wolo í sìi taa wi bárigaw ni. 10Gee naa gi nyɛ tàmagi, ki o náā nyɛ mɔ a jo wolo bɛɛ wo tàmaga le ní Kolocɔlɔɔ ní í, woro wi tàmagi le ní wolo ní níì wi Jáaw tórigo naa. A wi baa pye wolo kapeegèle kùsulugo sáriga.
11Mii syɛɛn-nidaanmabèle, kapye Kolocɔlɔɔ si n tàmaga le ní wolo ní nya, ki n yɛlɛ wolo í wɔ́ɔ tàmaga le ní woyɛɛ ní. 12#Zyan 1:18 Syɔɔnwaa faala ga kɔ́ɔ̀ Kolocɔlɔɔ nyaa nyáana í. Kapye wolo n tàmaga le ní woyɛɛ ní, Kolocɔlɔɔ i nyɛ wolo fúnyi ni, a wi tàmagi wɔ́ɔ i nyɛ wolo ni n foro.
13Amɛɛ wi wi Pǐli kaan wolo ma lè, gee bee na wolo gi cán ncan wolo i nyɛ wi ni, wi si wɔ́ɔ i nyɛ wolo ni. 14Wolo tiimaa n gi nyaa ní wɔ́ɔ̀ gi séeraw kpéʔele níì jo Tofɔw maa Jaafɔw tórigo naa wi ba pye dulunyanw Syɔɔfɔlɔ. 15Syɔ́ɔnwee ga gi fílige n joo lè níì jo Zyezu wi nyɛ Kolocɔlɔɔ Jáaw, Kolocɔlɔɔ i nyɛ wee bee ni, wee bee si wɔ́ɔ i nyɛ Kolocɔlɔɔ ni. 16Tàmagee Kolocɔlɔɔ le ní wolo ní lè, wolo tiimaa n gee bee cán ní wɔ́ɔ̀ tága gi na.
Kolocɔlɔɔ wi nyɛ tàmagi. Wee wi ga kòro tàmagi bee ni lè, wee bee i nyɛ Kolocɔlɔɔ ni, Kolocɔlɔɔ si wɔ́ɔ i nyɛ wee bee fɔ́lɔ ni. 17Kánmi naa na tàmagi baa foro wolo ma, koro ga pye wolo í soro kútiiw canjerige na, níì cán kánmee na Kirisi nyɛ lè, ànbée wolo wɔ́ɔ̄ nyɛ dulunyanw ni. 18Fyáara o nyɛ tàmagi ni í, ncan tàmagee gi foro lè, gee bee i fyáari nɛnɛ ni yirigi syɔɔn ni. Koro na syɔ́ɔnwee wi fɛ̀ɛgí lè, tàmagi o nyɛ wi ni n foro í, níì cán fyáari i nyɛ ní wɔʔɔlɔ ní.
19Wolo si na, wolo i tàmaga nii, níì cán woro wi sélì tàmagi le ní wolo ní. 20Wàa ga gi joo níì jo woro n tàmaga le ní Kolocɔlɔɔ ní, bi gi taa wi senyɛnw kéele n wi bɛɛn wee bee i nyɛ jànvaafɔlɔ, níì cán wi senyɛnw wi nyaagi lè, kapye wi ga tàmaga le ní wee bee ní í, Kolocɔlɔɔ wi nyɛ lè woro o wi nyaagi í, mɛ̀ɛ́ woro a gbǎn tàmagi le ní wi ní bi sɛ́ɛ? 21Tundunree si wi kaan wolo ma lè, toro di nyɛ dee naa, wi n jo, wee wi ga tàmaga le ní Kolocɔlɔɔ ní lè, ki n yɛlɛ wi wɔ́ɔ wi gi le ní wi senyɛnnɛ ní.
Currently Selected:
1 Zyan 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
