1 Zyan 2
2
Kirisi i wolo dɛ̀ɛmɛ
1Ni pìibēle, mii i kérigèle naa sɛ́bɛ bi tórigo yele ma koro ga pye yele a ní kɔ́ ra kapeegèle kpéʔele í. Wàa si ga kapeele kpéʔele, dɛ̀ɛmɛfɔlɔ i yaà wolo ma Tofɔw taana, dɛ̀ɛmɛfɔw bee wi nyɛ Zyezu Kirisi wi lè Wozinw. 2Woro wi nyɛ wolo kapeegèle kùsulugo sáriga, wolo yagwɔɔlɔ wógèle si ban í, fwɔɔ dulunyanw syɛ̀ɛnnɛ myɛ wòʔolo gɛɛ.
3Wo ga ni Kolocɔlɔɔ tundunri kɔngi ní i di kpéʔele, kánmi bee na wolo a gi cán bi cán wolo n wi cán. 4Syɔ́ɔnwee si ga gi joo lè níì jo woro n Kolocɔlɔɔ cán, bi gi taa wi o wi tundunri kɔngi ní i di kpéʔele í, syɔ́ɔnw bee i nyɛ jànvaafɔlɔ, kányɛʔɛ o nyɛ wi fúngi ni í. 5Kàjáa wee wi ga ni Kolocɔlɔɔ syɛ́ɛnri kɔngi ní i di kpéʔele lè, Kolocɔlɔɔ tàmagi i nyɛ wee bee ni n foro kányɛʔɛ ni. Kánmi bee na wolo a gi cán bi cán wolo i nyɛ wi ni. 6Wee wi ga joo lè woro i nyɛ wi ni, wee bee n yɛlɛ waa táanri àmɛɛ Zyezu Kirisi da ni táanri lè.
Tundunvɔ́nri kéele
7 #
Zyan 13:34
Mii syɛɛn-nidaanmabèle, tundunvɔ́nrɔ ban mii sɛ́bɛ bi tórigo yele ma í, tundunlɛɛri dii, toro dee ti da pye lè yele ma nlaa yaà gi sélimi na. Syɛ́ɛnree yele da lóʔo lè, toro di nyɛ tundunlɛɛri. 8Koro ní ki myɛ ní tundunvɔ́nrɔ mii sɛ́bɛ bi tórigo yele ma, dee di nyɛ lè kányɛʔɛ Kirisi ni, ní wɔ́ɔ i nyɛ kányɛʔɛ yele ni. Níì cán yébilimi i kwóo ni syée, á gbɛ̀ɛndelemi si i nyín ni yirigi n kwɔ́ɔ.
9Syɔ́ɔnwee ga jo lè woro i nyɛ gbɛ̀ɛ́nmi ni bi gi taa wi senyɛnw kéele n wi bɛɛn wee bee sèʔé i nyɛ yébilimi ni àlí n baa nan níjanʔa na. 10Wee wi tàmaga le ní wi senyɛnnɛ ní lè, wee bee i nyɛ gbɛ̀ɛ́nmi ni, wi a gbǎn pye sábabu pèle na be pùuni í. 11Wee si wi wi senyɛnnɛ kéele yaʔa a li wi bɛɛn lè, wee bee i nyɛ yébilimi ni. Wi i táanri yébilimi ni, tɛ́ɛgee ni wi syée lè wi ga gi cán í, níì cán yébilimi n wi kàriga fúuɔn.
12Yele pìíbèle, mii i sɛ́bɛw naa sɛ́bɛ bi tórigo yele ma, níì cán Kolocɔlɔɔ n yele kapeegèle kùsulugo syɔɔ Zyezu mɛ́ɛgi báriga ni. 13Yele tofɔbèle, mii i sɛ́bɛw naa sɛ́bɛ bi tórigo yele ma, níì cán wee wi da téè pye yaà lè nlaa gi sélimi na, yele n wee bee cán. Yele nìgɔcaribèle, mii i sɛ́bɛw naa sɛ́bɛ bi tórigo yele ma, níì cán yele n Wobeew jáa.
14Yele pìíbèle, mii n sɛ́bɛw naa sɛ́bɛ bi tórigo yele ma, níì cán yele n Tofɔw cán. Yele tofɔbèle, mii n sɛ́bɛw naa sɛ́bɛ bi tórigo yele ma, níì cán wee wi da téè pye yaà lè nlaa gi sélimi na, yele n wee bee cán. Yele nìgɔcaribèle, mii n sɛ́bɛw naa sɛ́bɛ bi tórigo yele ma, níì cán yele n nìri, a Kolocɔlɔɔ syɛ́ɛnri wɔ́ɔ̀ kòro yele ni, a yele wɔ́ɔ̀ Wobeew jáa.
15Ki ga yɛlɛ yele í kɔ́ tàmaga le ní dulunyanw ní í, ki ga wɔ́ɔ̀ yɛlɛ yele í tàmaga le ní dulunyanw fúngo yárira ní í. Wàa ga tàmaga le ní dulunyanw ní, Tofɔw tàmaga o nyɛ wee bee fɔ́lɔ fúngo ni í. 16Níì cán yáriri myɛ di nyɛ lè dulunyanw ni, céri ki laànitaʔa yárira yoo, ní dee myɛ syɔɔn wéle lè ní nyabɛɛnnɛ ní, n fàra kpɔ́ɔmi kèlē na, dee bee tàa faala ga yìri Tofɔw ma í, fwɔɔ dulunyanw ma. 17Dulunyanw si i kwóo ni syée ní wi laànitaagi yárira myɛ ní. Kàjáa wee wi Kolocɔlɔɔ nyɛ́nɛ kérigèle kpéʔele lè, wee bee a kòro sìi na làla o làla.
Kirisi nigoow kéele
18Ni pìibēle, làrizanni n nan. Amɛɛ yele da gi lóʔo lè Kirisi nigoow a pan, Kirisi nigoobèle saʔa i beè n kwɔ́ɔ tɔ́ɔliw naa ni, gee bee na wo gi cán ncan làrizanni n nan. 19Pe n yiri wolo níngi ni n kári, kàjáa pe da pye wolo wòolo í. Níì cán pe ga maa pye wolo wòolo, pe mǎà dée kòro ní wolo ní. Amɛɛ si be yiri wolo níngi ni n kári lè, koro n gi tɛ̀ɛn pe wàa faala o nyɛ wolo wóo í.
20Yele si na, Wojanw n Pìicǎnni tìrige yele ma, a yele myɛ kányɛɛgi cán. 21Mii sɛ́bɛw tórigolo nyúngo o nyɛ yele ma n jo yele ga kányɛɛgi cán wii í, mii n wi tórigo yele ma níì cán yele n kányɛɛgi cán, ní wɔ́ɔ̀ gi cán ncan jànvaawaa faala a gbǎn taa kányɛɛgi ni í.
22Wìí wi nyɛ jànvaafɔw, kapye wee ban wi gi kábala lè níì jo Zyezu o nyɛ Kirisi lè í? Wee bee wi nyɛ Kirisi nigoow, wi n Tofɔw ní Jaafɔw cée. 23Syɔ́ɔnwee faala wi Jaafɔw cée lè, Tofɔw o nyɛ wee bee wóo í. Wee si wi fɔ̀lɔ lè Jaafɔw na, Tofɔw wɔ́ɔ i nyɛ wee bee wóo.
24Yele si na, gee yele lóʔo lè nlaa yaà gi sélimi na, ye gee bee yaʔa gi kòro yele fúnyi ni. Gee yele lóʔo lè nlaa yaà gi sélimi na, gee bee ga kòro yele ni, yele a wɔ́ɔ kòro Jaafɔw ní Tofɔw ni. 25Yárigee nyɔ́ɔ Kirisi fàli wolo ma lè, koro gi nyɛ sìibangwɔɔw.
26Bele be caa bi yele fáana pùuni lè, poro kéeli na mii kérigèle naa sɛ́bɛ bi tórigo yele ma. 27Yele si na, Kirisi n wi Pìicǎnni tìrige n lége yele fúnyi ni, àmɛɛ si wi Pǐli nyɛ yele ni lè, ki o náā nyɛ wàa í ní da yele tama í. Kàjáa li i yele tama kérigèle myɛ na, li tamani si i nyɛ kányɛʔɛ, jànvaa o nyɛ tamani bee ni í. Amɛɛ li yele tama lè, ki n yɛlɛ yele í kòro Kirisi ni kánmi bee na.
28Awá tɔ́ɔliw ni, ni pìibēle, ki n yɛlɛ yele í kòro Kirisi ni, koro ga pye lǎli ni wi ga baa wiyɛɛ dɛ̀ɛn lè, yele í gbǎn soro bi yére, jàngó fɛ̀ɛrɛ a kɔ́ ba yele taa wi làribanni ni yele í da làrá wi na í. 29Yele ga gi cán ncan wi n sín, yele a wɔ́ɔ gi cán bi cán syɔ́ɔnwee faala ga ni kasingèle kpéʔele lè, wi i nyɛ Kolocɔlɔɔ pyà.
Currently Selected:
1 Zyan 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
