Jeremías 4
4
Llixjwere le ake' nench wayat akre
1Xanllon nee:
Cha llenlo wabiw Israel,
kone nadan llayal wabireno.
Cha walliyo kale loe lsak sral ko'o ka',
na bill wsanlallo nada',
2kena gak walo ran
doyichj dorallo, na kone dalixhaj.
Na kena ran aken ke latj yell-liw ka'
to yel nak lay, na da werao ake',
na yoyte yell ka' yela yed ake' gunxhen aken nada'.
3Kin lle Xanllon be'nn Judá ka', na rente be'nn Jerusalén ka':
Le gasgan raw yell-liw ka' bine' gaz aken,
na bill gazre gan sjalla yiech ka'.
4Be'nn sjalla Judá, na Jerusalén,
legun dan nzi circuncisión, na le wazake nada' keto Xanle,
le wzoa lo raxhdaoren sen ke dan nun lliw tuzen,
na cha ne' nawllre llunle damaren,
yel llaklla kian galen keto yi' llalnin,
na galninen na nutno gak wasur len.
Da nxhollen zan rale
5Lechixjwe dani raw yell ke Jerusalén'na, na rente be'nn ka' sjalla Judán,
lewkoell trompeten, na le chixjoe latj yell-liw ni,
legusia zillj kwis:
Chejllo, na wadup wallayllo.
Yell xhen ka' nechjgoy ze war ka'.
6Lewlis banderren, na wiaten gan lli Jerusalén'na,
lewayirj ga lljakoachre, bi gayre donaze.
Le nada' wsela be'nn ka' sjalla rale
nench'na wcheb ake', na wlleyi ake' re'.
7Bell yixen ba bllojba lo rillban,
ba za dan lleyi latj yell-liw ka',
ba bllojba gan nak rallban nench'na wlleyiba latj yell-liw ko'on,
na kweyi yell xhen ko'o ka', na yegane'n llerllibze.
8Kelen'na legak rall zech,
le koell, na le gusia dan lljaleren,
le yel llruk ke Xanllon
bine' wabiyen kwitren.
9Xanllon ba bnee:
Ket llin lla'na,
be'nn wnebian, na rente xan ake' ka' to xistit ake' yel llebze,
na bxus ka' wcheben le ake',
na be'nn ka' llayixjwe xtill Diozen lekse ka wcheben le ake'.
10Nada' bnia: Niachraz naken Xana,
ba bxhiyeo be'nn Jerusalén ka'.
Bchebo suren akoe wen,
na spaden bazen le yellj yen aken.
11Ket llin lla na,
Xanllon ye'e yell Jerusalén'na:
To be la da za latj dach yu billen
zajen gan lli yell kian.
Kere ke to be da dabaze
ke dan llsu ake' trigo,
12le be xhen dan guna yeden
akllen daxhen kwis kelen,
le na' wchuybia kan gak ke aken.
Be'nn ka' llwiere Israelen ba nechj ake' le ake'
13Lewiakero, be'nn ka' llwieren ba zak ake' ke to bej gasj,
karret dan llajren ake' raw wdilen nakteksen ke be bdon,
kabay ke ake' ka' llxhonj akllba kerke bsia ka'.
Niachraz ke lliw, bakse blleyillon.
14Jerusalén, baxhi da maren yo' lo raxhdaon
na kone ka' waraw.
¿Batxha zeraw cho lo yichj raxhdaon
xbab xhinj ka'?
15Bzurawzen yell xhen'na nzi Dan, na raw rum ke Efraín
ba bllin di'll da llzoayiach.
16Ba llixhjoe akre latj yell-liw ka', na Jerusalén'na
ke to latj yell-liw zit, ba zak be'nn ka' llwieren,
to llusia ake' zak ake' gakdilren ake'
yell xhen ka' nbanle Judán.
17Chechjguy ake' Judán, kan llun be'nn ka' llap lix ka',
le bayechj ake' Xanllon.
Nada' Xanle ba bnia ka'.
18Xtol yel kan llun ko'o na
ba benen nench'na llak ko'o ke daki,
damar ko'on to naken sla kwis,
na to llunen we lo raxhdaon.
Jeremíazen lljelere kan llak raw rallen
19To llwagoja ke nake dan lleyllran.
To xhistit lo raxhdawan.
To zu'ze llaka, na bi llak sia lliteze.
Ba benla to bee ke trompeten,
na yel llakia ke dan llak raw wdilen.
20Nawze kull loellj dakenxhie ka',
doxhente latj yell-li'on ba blleyin.
To setegaze ba blleyi gan zoan,
lo yo' de rall zid kia ka' ba blleyi aken.
21¿Batxha zeraw rera banderr dan daren aken,
na trompet ka' llkoell ake' raw wdilen?
22Be'nn yell kian nak ake' be'nn wednay, bi numbie akre nada',
kan ne' Xanllon.
Bi llajnie xhi'nna ka' nak ake' be'nn bi llayun xbab.
Llajnie akre nench'na gun ake' damaren,
axha bines akre gun ake' dawen.
Jeremíazen llrere dan wlleyi willjwani
23Brera yell-li'on, na naken to latj dach yu bill da bi nkaraze,
na brera le yeban, na bibi beni den.
24Brera ya' yeo ka', na xhis aken,
na raw rum ka' to xhistit aken.
25Bwiayiana' na nullno be'nn nach brera,
na yoyte ba ka' zajzu xiren bazu akba.
26Brera yell-liw chao ka', bayak aken latj dach yu bill,
yoyte yell xhen ka' ba bayinj aken.
Yel llaklla ke Xanllon
ba benen nench'na guk yoyte daki.
27Xanllon nee:
Doxhente yell-li'on kweyin,
axha bi wlleyia dokenaken.
28Yell-li'on suyiachen
na yeban gazjen da xchul.
Ba bneksa kan ba bnian, na bi wacha xbab kian,
bakse naken kan naken na', bi wabia trase.
29Ket yen akre gun be'nn ka' llakia, be'nn ka' sjallia kabay ka', na be'nn ka' sjanox xhis waxiten,
yoyte be'nn ka' llxhonjdo ake',
llajkoach ake' yu lix ka'
o cha llep ake' le yaj bdinj ka'.
Yoyte yell xhen ka' ba nzanlall aken,
nullno be'nn sjalla rawen.
30Na rwe', yell xhen da ba nyinj,
¿bixhchen yedaleze nellako rall nbaraz ka'?
¿Bixhchen yedaleze ne' nlliaw yichjra'on ya chao ka' nzi oro cha'?
¿Bixhchen dlleno yajrao ka' da gasj?
Nike bi zakzen'na ne' llepa yichjra'on,
le xtuw ka' ba bsanlall ake' rwe',
na ba llen akre gut ake' rwe'.
31Llenla ke llusia ake', na ke lleyllra ake' ke to nor le sute xhi'nn,
ke to nor llzu xhi'nne bi nak bi nell,
Sión'na llusia,
lljelere, na llchirj take'e ka', na nee:
Niachraz naken kia nada', gut be'nn wenxhia ka' nada'.
Currently Selected:
Jeremías 4: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios