Jeremías 3
3
Israelen bi guke be'nn wen dalixhej kone Diozen
1Kin ba bnee Xanllon:
Cha to be'nn llara'rene xhoren
na' noren keten ba bara'rene xhiewen,
na wachuynarene be'nn biew yubre,
be'nn nellen bill gak wadile le'e dayubre.
Len gaken to yelsdo xhen latj yell-li'on.
Axha rwe' Israel,
kone be'nn zan ba brow xtuw,
na na' llenlo wabiw kone nada'.
Nada' Xanle ba bnia ka'.
2Bwiayiankero rum llerllib ka',
¿gare bine gako bziw cha'?
Lliw ke to nor árabe latj dach yu billen,
llwa nez, na lliw llbexho xtuw ka'.
Ba beno bziw latj yell-li'on kone yel ree ko'on, na kone damar ko'o ka'.
3Kelen'na bill ne' gak yejwon
keten ba bde dazayen.
Yichjra'on naken kan nak ke nor ree,
llayal wayero chenak.
4Batnigaze llew nada':
Xa kia, rwen brow nada' nez kan ne' naka bi weo.
5¿Do tiemp gakllaw nada' cha'?
¿Scha sibia yel llruk ko'on cha'?
Axha kere llnew doyichj do rallon
ne' nawkso lluno damaren.
Xanllon llpere Israelen rente Judán nench wayat akre
6Ke llan llnebia Josíazen, Xanllon gulle'e nada': ¿Ba brero kan ben Israel wednayen? Ba benee ka nor ngo xtu. Ba biaje berawe loe lsak ka' raw rum sib ka', na xhan yay xhen ka'. 7Nada' bena xbab kanake yoyte da ka' ba benen, nall wazerene nada' axha le'en bi babie'e kone nada', na bi zanee wednayen nzi Judán brere dani, 8na brere ke balliya Israel wednayen kale, na bsanlalle ke naken ba nxenlalle dios yub akre. Axha Judá wednayen bi bllebe'e, na lekse ka' benee ke to nor ree, na bxenlalle dios yub akre. 9Na gukre ke bi kwize, na btitjre latj yell-li'on. Bi guke be'nn wendalixhaj kone nada' ke naken berawe loe lsak de yaj, na de yayen. 10Na lekse ka' Judá wednayen bi babie'e kone nada' doyichj doralle, axha bxhiyeze nadan. Nada' Xanle ba bnia ka'.
11Xanllon gulle'e nada': Yel wednay ke Israelen binaken katken nak ke Judán. 12Biaj na bdixjwe di'll ki, axha wiateo rale:
Xanllon ba bnee:
Bazeren nada' Israel wednay.
Bi gunla rwe' sban,
na bi gaklla rwe' ke chnare,
le nada' wa llayiachralla.
Nada' Xanle ba bnia ka'.
13Bazake ke damar ka' ba benon,
na guko wednay kone Xanllo Diozen,
le bllojo zit jadirjo dios ka' bi nombieron,
xhan yay xhen ka',
na bi bzenayo kia.
Nada' Xanle ba bnia ka'.
14Xanllon ba bnee: Lewabi xhi'nna wednay ake' le nada' naka Xanle. Sia toaj re' sjalla yell xhen'na, na ye chop be'nn sjalla to kwen wej lo yo' rill nench'na lljasana le ake' gan nzi Sión'na. 15Nada' wzoa be'nn wnebia re', be'nn gun kon kan llazralla nada', nench'na ko ake' re' nez kone yel llajnie, na kone yel sin. 16Na ket ba nianle, na ba nakre be'nn zan latj yell-li'on, na ba nian xhi'nnre ka', na nullno llajdinlall kaj gan sjalla dan bchajlla be'nn yell ka' kone Xanllon, na nullno walse len, na bill llunen bien gak ye to da kub. Nada' Xanle ba bnia ka'. 17Kenall yell xhen ke Jerusalén'na gumbie akren, gan lli Xanllon llnebie'e. Yoyte latj yell-liw ka' wadup ake' Jerusalén'na nench'na werao ake' nada', na bill naw ake' gun ake' kan ne' yichj raxhdao ake' wednayen.
18Ket llin lla'na Judán wadilen Israelen, na llop akten wabi aken latj yell-li'on lli rale, yell-li'on bia xustaw re' ka'.
Dan llwerao Israelen
19Israel, nada' bachuyralla sia rwe' ke to xhi'nna,
na guna' rwe' to yell-liw da nak wen,
latj yell-liw da nak nbaraz.
Nada' bena xbab yew nada' xa,
na chras bi wabiyo kwitan.
20Axha beno ke to nor bi bdap baran xhiewe,
kan ba ben re', bi bdapre nada' baran.
Nada' Xanle ba bnia ka'.
21Ba'ren llak llakia raw rum yu bill ka',
le be'nn Israel ka' llusia ake', na llnab ake' yel llayachrallen.
Bnit ake' nezen zajze lixhejen,
na gulall ake' nada' naka Xan ake' Dios.
22Lewabi kone nada' xhi'nna wednay ake',
nada' wayuna re' nench wayak yichj raxhdao ren yall.
Be'nn Israelitas ka' balli ake' xtill Xanllon
Gani' ba zeto nench'na wazerento rwe',
le rwen nako Xanto Dios.
23Nike bi zakzen'na llajto raw rum ka'
o cha lljento llakia raw ya' ka',
tuze ra'o rwe' Xanto Dios
llallelre Israelen yel wasran.
24Da yelsdo ka' berawton ba benen bnit'to
ke llin ka' ben xato ka'
kan ne' nakteto bidao:
xhir ka', na bell ka', xhi'nnto bi biew ka', na xhi'nnto bi nor ka'.
25Llayal gunyiachllo,
to wayere yichjraollo,
le kan naktello bidao, xte na' lla,
lliw, na xustawllo ka'
ba benllo daxhinj kone Xanllo Diozen,
na bine' wzenayllo ke'e.
Currently Selected:
Jeremías 3: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios
