Jeremías 38
38
Bro ake' Jeremíazen lo bej da bi yull nis
1Sefatías xhi'nn Matán, Guedalías xhi'nn Pashur, Jucal xhi'nn Selemías, na Pashur xhi'nn Malquías, ben akre llweren Jeremíazen be'nn yell ka' ke di'll ki: 2Xanllon ba bnee: Be'nnen waga'n raw yell xhen'na kweyie'e raw wdilen o cha tie'e win da yej gawe'e, o cha kweyie'e kone yillwe. Axha be'nnen llojen, na lljan kwine rallna be'nn caldeos ka', wakga wasre'e yelnban ke'en. 3Xanllon ba bnee: Yell xhen'ni yexjen rawna waka ya ke be'nnen llnebia Babilonian. Na le'e wlanen, na nutno gak wllun len.
4Natell be'nn ka' llunlen be'nn wnebian llin gull ake' le'e:
—Llayal gutllo be'nn ni, le kone xtille ka' ba llezatre be'nn waka ya ka' ba bagan' ye to chop raw yell xhen ni, na yoyte be'nn. Be'nn ni bi llwie'e gak dawen ke yell ni, sre damar ba bnee.
5Na Sedequías be'nnen llnebian bnee:
—Wakse cha, legun kon da zerallre kone le'e. Bitbi gak guna kone re'.
6Natell bex ake' Jeremíazen, na bro ake' le'e lo bej yech ke Malquías xhi'nn be'nn wnebian nzi Hamelec dan zu lia ke be'nn ka' sjalla llap. Na bletj ake' le'e kone du, le lo bejen bi yullen nis, sre benjze lli loen, na Jeremíazen byiche'e loen.
7To be'nn etíope nzi Ébed-mélec, na be'nn ni nake'e be'nn wen dalixhej llun llin lo yo'rao braon, na benle'e, ba bro ake' Jeremíazen lo bejen. Na ke lla ka' lli be'nn wnebian llwa reij ke Benjamín'na. 8Na be'nnen nzi Ébed-mélec bllojeꞌe lo yo'rao da braon, na biaje jerene di'll be'nn wnebian:
9—Be'nn wnebia llapa baran, mar kwis ba ben be'nn ka' kone Jeremíazen. Le kanaken ba bro ake' le'e lo bejen, na gana' kweyie'e yel dunze, le billbi pan de raw yell xhen ni.
10Na be'nn wnebian le gullte'e Ébed-mélec na wchie'e chilloa be'nn nench yebaj ake' Jeremíazen lo bejen chega kene' kweyie'e. 11Na Ébed-mélec na bchie'e be'nn ka', na lekse ka' biaje jaxie'e rall dan sjalla lo yo'raon, da ba nun ake' tokere, na bxhie'e to chop rall gur ake', na bletjen kone du lo bej gan yo Jeremíazen, 12na gulle'e le'e:
—Bro rall ki lo xhekw'nido nench ke gun du ki rwe' we.
Na ka' ben Jeremíazen. 13Natell be'nn ka' bzal ake' dun, na babej ake' le'e gana'. Bdena Jeremíazen goyeꞌe lia rill yan.
Sedequíazen guxhe'e Jeremíazen
14Sedequías be'nnen llnebian guxhe'e be'nnen llayixjwe di'llen nzi Jeremías gan zu raw wyone reij ke yoda'on. Na gana' gulle'e le'e:
—Wnabchkra rwe' to di'll, na llenla yew nada' di'll li.
15Na Jeremíazen gulle'e le'e:
—Cha nada' wallia xtillon, rwe' guto nada', na cha nada' yepa rwe' akre guno, nike chajlezo kia.
16Axha be'nn wnebian nzi Sedequíazen bchebe'e raw Jeremíazen:
—Dali nia rwe' raw Xanllon, le le'en bene'e yelnban kellon, bi guta' rwe', na nike gunza rwe' rallna be'nn ka' llenle gut rwen.
17Natell Jeremíazen gulle'e Sedequíazen:
—Xanllon nap doxhente yelwaken, Dios ke Israelen, nee: Cha rwe' lljayieno rallna kwino raw be'nn ka' sjanak xan waka ya' ke be'nnen llnebia Babilonian, rwe', na rente be'nn ka' sjallareno lo yo' rillon wasra yelnban keren, na yell xhen ni bi wzey aken. 18Axha cha rwe' bi lljan kwino rallna le aken, be'nn caldeos ka' wlan ake' yell xhen ni, na wzey aken, na rwe' bi waraw rallna aken.
19Na Sedequíazen ballie'e xtillen:
—Lleba be'nn Judíos ka' ba guk ake' be'nn caldeos ka' txhen, na cha nada' ba wexja raw na aken, to bi gun bine akre nada'.
20Na Jeremíazen ballie'e xtillen:
—Bigun ake' rwe' rallna be'nn ka'. Na bzenay xtill Xanllon dan wzenla rwen, na gak wen ko'o, na yesraw yelnban ko'on. 21Xanllon ba benee nench'na ba brera bixhan ze gak, cha rwe' bi lljayien kwino rallna be'nn babilonios ka', 22yoyte nor ka' yega'n lo yo'rao ke Judán, wchach ake' le ake', na lljayien ake' le ake' rallna xan waka ya ke be'nnen llnebia Babilonian, na kwin akse ne' ake':
Yoyte be'nn ka' zerawze nllie be'nn wnebian
bxhiye ake' le'e, na ben akte le ga'n,
be ake' latj ke nie'e ka' byichen lo benjen
na bsanlall ake' le'e.
23Na Jeremíazen bzerawe gulle'e be'nn wnebian:
—Yoyte nor ko'o ka', na xhi'nno ka' gak ake' rallna be'nn caldeos ka', na rwe' bi gak waraw rallna aken, le lljayien ake' rwe' rallna be'nnen llnebia Babilonian, na wzey ake' yell xhen'na.
24Natell Sedequíazen gulle'e Jeremíazen:
—Cha rwe' nlliero yelnban ko'on, nutno wzenlo ke di'll ki. 25Cha be'nn ka' llnebiarenan ba bnes akre ba berena rwe' di'll, yed ake' wadnab akre rwe' bixhan gullo nada', na bixhan gulla rwe', na wcheb ake' wasra ake' yelnban ko'on nenchze ye akoe yoyte di'll ka' ba bellon. 26Axha rwe' ye akoe llatwiero nada' nench bi lljalo ake' rwe' dayubre lo yo' rill Jonatán na, nench ke kweyio gana'.
27Na doxhen ka' guk, yoyte be'nn ka' llnebia, na ren be'nn wnebian biaj ake' jawia ake' Jeremíazen, na janab akre le'e, axha le'en ballie'e xtill aken na gulle'e le ake' doxhente kan gull be'nn wnebian le'en. Na bill ben akre le zed, le nutno benee ke di'llen be aken. 28Na Jeremíazen goye'e lia ke be'nn ka' sjalla llapen, bllinte lla Jerusalén'na ben aken ga'n.
Currently Selected:
Jeremías 38: ZPUPAT
Highlight
Copy
Compare
Share
Want to have your highlights saved across all your devices? Sign up or sign in
Bible Society of Mexico
Learn More About Be'nnka'be Xti'll Dios