Isaías 40
40
Xanllon llayunxhenlalle Jerusalén'na
1Dios keren nee:
Lewayunxhenlall, lewayunxhenlall yell kian,
2to wallajlluteze le wne' be'nn ka' lla' Jerusalén'na
na leye ake' bill gak ake' be'nn wen xchin be'nn ga llsakzi ake' le ake',
le ba bdixhje'e dol ke'e ka',
na ba bxhie ke lo tak Xanllon
chop kuenre yel llsakzi ke yoyte daxhinj ke ka'.
3To bexne' llusia:
Legun xnid to nez ke Xanllon latj dach yu billen
le wllixh ke Dios kellon
to tnez xhen raw latj dach yu billen.
4Le waslla radj ya' ka'
le wayun ya' ka', na raw rum ka' rach,
na le wayun latj gan ba nyinjen, na raw ya' xhen ka'
to rach xhen.
5Natell Xanllon wroere yel wak ke'en,
na yoyte be'nn nach ka' re akren.
Xanllo naksen ba bnee ka'.
6To bexne' nee: Besia,
na, nada' llnaba: ¿Bixha dan gusia?
Yoyte be'nn nach ka' nak ake' ka to yix,
ke to yej da llarj lix.
7Yixen llyechen, na yejen llkoaden
keten bich ke Xanllon llden rawen.
Daliyan be'nn nach ka' nak ake' ka yix.
8Yixen llyechen, na yejen llkoaden,
axha xtill Dios kellon
nzibien ke chnare.
9Biep, Sión, raw yan,
zillj blep bexne' ko'on,
nench'na chixjoero to di'll wen.
Bi llebo blep bexne' kon, Jerusalén,
na bdixjwe yell xhen ke Judán:
Gani' zu Dios ke ren.
10Za' Xanllon konen yelwak,
na wnebie'e kone xhichje waren.
Zanchete yell ke'en
kan bayull basre le aken.
11Ze'e ka to be'nn llap xhir dao ke
ll-lise xhirda'o ka' kone xhichje ka'
na lldeba llwa lchoe,
na llapchie'e xhir dao nor ka' chin bxhanzen.
Yelwak ke Dios ke Israelen
12¿Nuxha ba bllix nista'on konen lo taken,
o cha bwiasake kone xbene ka' ke tonen nllirj le yeban?
Nuxha ba bllix
doxhente yu bichten de raw yell-li'on,
o cha ba bllixe'e kone xgons
rum ka', na ya' ka'?
13Nuxha ba bago nez Xanllon
o cha nuxha ba gull le'e gakren de gunee?
14¿Nuxha ba be le'e di'll da llzejnie, na yel sin?.
¿Nuxha ba broere le'e gunee yel korchis da zajze lixhaj?
¿Nuxha ba broere le yel llajnien?
¿Nuxha ba broere le'e kan nak yel sin'na cha?
15Latj yell-liw ka' naken ke le'e ka to bllun nis,
ka bichte da yo' lo xgons,
latj yell-liw ka' lla' lo nista'on zak aken ka to zak to blul yuxh.
16Raw doxhente gan nzi Líbano bi lla bayix zan
nench'na gut akeba, na werao ake',
ni way zan da chaj raw yi'.
17Yoyte latj yell-liw ka' bibi zaken ke le'e,
ke le'e bibi zak aken chras.
18¿Nuxha kone wsakrebere Diozen cha?
¿Bixha bxen wzoare' rawraze'e cha?
19To be'nn llunee to loe lsak,
na to be'nn llun llin konen yaj plat llwasjen yaj cha'on nzi oro,
na llune bga ken de ya plat.
20Be'nnen llunchaw loe lsaken
llbe'e bray da bi gull,
na llyirje to be'nn nun xchin len
nench'na wzoallen, na bi yalen.
21¿Axha bi neze re'?
¿Bine' yene re'?
¿Bitbi gull ake' re' ka danellte?
¿Bi biajniereren kan bxhe yell-liw nate?
22Diozen llie'e kull yeban dan nasj yell-li'on,
na llrere be'nn nach ka' ke bich soa ake'.
Le llchirje yeban ka to rall,
ll-lisen ka to yo' ga llzoe chull.
23Le'en llalane be'nn nach ka' nap yelwak,
na llalane be'nn braw ka' lla' raw yell-li'on.
24Nak ake' ka' yix llendao, daze gus akte,
da chin llyinze rue lo yu.
Na cha Diozen llrub rawen, le llkoad akten,
na be'e bdonen llwachachen len keto yixh.
25Dios Xhirallen llnabe'e:
¿Nuxha konen wsakrebere nada' cha?
¿Nuxha ke nak rebze nada'?
26Le wlis yejraore ka', na le wia le yeban:
¿Nuxha ben doxhente dani cha?
Nun lluslas toaj toajen,
na yoy akten llalwille'e kan le aken'na.
Daxhen nak yelwak ke'en, na yel ndiprall ke'en
na ni tich aken bi llden ka'ze.
27Israel, yell ke Jacob,
¿Bixhchen llawzo xhia? ¿Bixhchen neo:
Xanllon bi llakbere kan llak kian,
Diozen bi llakzedre nada'?
28¿Axha bi nezro? ¿Bine yenlo?
Xanllon, Diozen zoe ke chnare,
le'en benee doxhente yell-li'on,
bi llajchiere, na bi llajxakre;
yel llajnie ke'en naken ke chnare.
29Le'en llundipralle be'nnen llajxaken,
na be'nnen bill ndiprallen, llagultipe le'e.
30Xte rente bi weo ka' lljachie akrebe, na llajxak akrebe,
xte rente ben war ka' llajyal ake',
31axha be'nn ka' xhenlall Xanllon
du tiemp gat yel ndiprall ke ake',
na gak ta ake' raw lla kan llun bsia ka',
na gak wxhonj ake', na bi lljachie akre,
na bi llajxak akre keten ko ake' nez.
Currently Selected:
Isaías 40: ZPUPAT
Highlight
Share
Copy
Want to have your highlights saved across all your devices? Sign up or sign in
